B.Ed. ಪದವೀಧರರು ಪ್ರೈಮರಿ ಶಾಲೆ ಶಿಕ್ಷಕರಾಗಲು ಅರ್ಹರಲ್ಲ: ಸುಪ್ರೀಂ

Team Udayavani, Aug 14, 2023, 5:09 AM IST

ನವದೆಹಲಿ: ಬಿ.ಎಡ್‌.(ಬ್ಯಾಚುಲರ್‌ ಆಫ್ ಎಜುಕೇಷನ್‌) ಪದವೀಧರರು ಪ್ರಾಥಮಿಕ ಶಾಲಾ ಶಿಕ್ಷಕರಾಗಲು ಅರ್ಹರೇ ಎಂಬ ಕುರಿತು ರಾಜಸ್ಥಾನ ಹೈಕೋರ್ಟ್‌ ನೀಡಿದ್ದ ತೀರ್ಪನ್ನು ಸುಪ್ರೀಂ ಕೋರ್ಟ್‌ ಎತ್ತಿಹಿಡಿದಿದೆ. ಬಿ.ಎಡ್‌. ಡಿಗ್ರಿ ಹೊಂದಿರುವ ವ್ಯಕ್ತಿಗಳು ಪ್ರಾಥಮಿಕ ಶಾಲಾ ಶಿಕ್ಷಕರ ಹುದ್ದೆಗೇರಲು ಅರ್ಹರಲ್ಲ ಎಂದು ಸರ್ವೋಚ್ಚ ನ್ಯಾಯಾಲಯ ಹೇಳಿದೆ.

ಪ್ರಾಥಮಿಕ ಶಾಲೆಯಲ್ಲಿ ಶಿಕ್ಷಕರ ಹುದ್ದೆ ಪಡೆಯುವವರು ಡಿಪ್ಲೋಮಾ ಇನ್‌ ಎಜುಕೇಷನ್‌(ಡಿ.ಎಡ್‌.) ಪದವೀಧರರಾಗಿರಬೇಕು ಎಂಬುದು ರಾಜ್ಯ ಸರ್ಕಾರದ ನಿಯಮವಾಗಿದೆ. ಹೀಗಾಗಿ, ಬಿ.ಎಡ್‌. ಮಾಡಿದವರು ಈ ಹುದ್ದೆಗಳಿಗೆ ಅರ್ಹರಲ್ಲ ಎಂದು ರಾಜಸ್ಥಾನ ಹೈಕೋರ್ಟ್‌ ತೀರ್ಪು ನೀಡಿತ್ತು. ಈಗ ಆ ತೀರ್ಪನ್ನು ಎತ್ತಿಹಿಡಿದಿರುವ ಸುಪ್ರೀಂ ಕೋರ್ಟ್‌, “ಶಿಕ್ಷಕರ ಹುದ್ದೆಯ ಅರ್ಹತೆ ಕುರಿತು ನಿರ್ಧರಿಸುವ ಹಕ್ಕು ರಾಜ್ಯ ಸರ್ಕಾರಕ್ಕಿದೆ. ಶಿಕ್ಷಕರ ಹುದ್ದೆ ಬೇಕೆನ್ನುವವರು ಡಿ.ಎಡ್‌. ಮಾಡಿರಬೇಕು’ ಎಂದು ತೀರ್ಪಿತ್ತಿದೆ.