Noida: ಅಲ್ಲೊಂದು ಮದುವೆ, ಇಲ್ಲೊಂದು ಮದುವೆ.. ಬಾಂಗ್ಲಾದಿಂದ ಪತಿ ನೋಡಲು ಬಂದ ಪತ್ನಿಗೆ ಶಾಕ್!

Team Udayavani, Aug 22, 2023, 3:37 PM IST

ಲಕ್ನೋ: ಮೊದಲ ಪತ್ನಿಯ ಕಣ್ತಪ್ಪಿಸಿ ವ್ಯಕ್ತಿಯೊಬ್ಬ ಎರಡನೇ ಮದುವೆಯಾಗಿ, ಮೊದಲ ಪತ್ನಿಯ ಕೈಗೆ ಸಿಕ್ಕಿ ಬಿದ್ದಿರುವ ಘಟನೆ ಉತ್ತರ ಪ್ರದೇಶದ ನೋಯ್ಡಾದಲ್ಲಿ ನಡೆದಿದೆ.

ಘಟನೆ ಹಿನ್ನೆಲೆ: ನೋಯ್ಡಾ ಮೂಲದ ಸೌರಭ್ ಕಾಂತ್ ತಿವಾರಿ 2017 ರಿಂದ 2021ರವರೆಗೆ ಬಾಂಗ್ಲಾದೇಶದಲ್ಲಿ ಕೆಲಸ ಮಾಡುತ್ತಿದ್ದರು. ಈ ನಡುವೆ ಬಾಂಗ್ಲಾ ಮೂಲದ ಸನ್ಯಾ ಅಖ್ತರ್ ಎಂಬಾಕೆಯೊಂದಿಗೆ ಬಾಂಗ್ಲಾದಲ್ಲೇ ಸೌರಭ್‌ ವಿವಾಹ ಮಾಡಿಕೊಳ್ಳುತ್ತಾರೆ. ಮದುವೆಯ ಬಳಿಕ ಕೆಲ ಸಮಯದ ನಂತರ ಪತ್ನಿಯನ್ನು ಬಾಂಗ್ಲಾದಲ್ಲೇ ಬಿಟ್ಟು ತಮ್ಮ ಊರಾದ ನೋಯ್ಡಾಕ್ಕೆ ಬರುತ್ತಾರೆ. ಗಂಡನ ಬರುವಿಕೆಗೆ ಕಾದ ಪತ್ನಿ ಸನ್ಯಾ ಕೊನೆಗೆ ಪತಿ ಜೊತೆ ಇರಲು ತನ್ನ 1 ವರ್ಷದ ಮಗುವಿನೊಂದಿಗೆ ನೋಯ್ಡಾಕ್ಕೆ ಬರಲು ನಿರ್ಧರಿಸುತ್ತಾರೆ.

ಆದರೆ ಗಂಡನೊಂದಿಗೆ ಇರಲು ಬಂದ ಸನ್ಯಾ ಅವರಿಗೆ ಗಂಡನ ಹೊಸ ಸಂಬಂಧವನ್ನು ನೋಡಿ ಶಾಕ್‌ ಆಗುತ್ತದೆ. ಪತಿ ಸೌರಭ್‌ ಮೊದಲ ಮದುವೆಯ ವಿಚಾರವನ್ನು ಮುಚ್ಚಿಟ್ಟು, ಬೇರೊಬ್ಬ ಮಹಿಳೆಯೊಂದಿಗೆ ಆದಾಗಲೇ ಮದುವೆಯಾಗಿದ್ದಾರೆ. ಇದಲ್ಲದೇ ತಮ್ಮ ಸಂಬಂಧವನ್ನು ಮುಂದುವರೆಸುವುದಿಲ್ಲ ಎಂದು ಸೌರಭ್‌ ಹೇಳಿದ್ದಾರೆ.

ಈ ಕಾರಣದಿಂದ ಪತ್ನಿ ಸನ್ಯಾ ಮಹಿಳಾ ಪೊಲೀಸ್‌ ಠಾಣೆಯಲ್ಲಿ ದೂರು ದಾಖಲಿಸಿದ್ದಾರೆ. ಸದ್ಯ  ಪೊಲೀಸರು ತನಿಖೆ ನಡೆಸುತ್ತಿದ್ದು, ಈ ಬಗ್ಗೆ ಹೆಚ್ಚಿನ ಮಾಹಿತಿ ನಿರೀಕ್ಷಿಸಲಾಗಿದೆ.