Mukesh Ambani: ಮುಖೇಶ್‌ ಅಂಬಾನಿಯ ಮ್ಯಾನ್‌ ಹಟ್ಟನ್‌ ನ ಐಶಾರಾಮಿ ನಿವಾಸ ಮಾರಾಟ…

Team Udayavani, Aug 25, 2023, 3:51 PM IST

ನ್ಯೂಯಾರ್ಕ್:‌ ರಿಲಯನ್ಸ್‌ ಇಂಡಸ್ಟ್ರೀಸ್‌ ಅಧ್ಯಕ್ಷ, ಆಡಳಿತ ನಿರ್ದೇಶಕರಾಗಿರುವ ಉದ್ಯಮಿ ಮುಕೇಶ್‌ ಅಂಬಾನಿ ನ್ಯೂಯಾರ್ಕ್‌ ನ ಮ್ಯಾನ್‌ ಹಟ್ಟನ್‌ ನಲ್ಲಿರುವ ತಮ್ಮ ಐಶಾರಾಮಿ ಅಪಾರ್ಟ್‌ ಮೆಂಟ್‌ ಅನ್ನು 74 ಕೋಟಿ ರೂಪಾಯಿಗೆ ಮಾರಾಟ ಮಾಡಿರುವುದಾಗಿ ನ್ಯೂಯಾರ್ಕ್‌ ಪೋಸ್ಟ್‌ ವರದಿ ಮಾಡಿದೆ.

ಇದನ್ನೂ ಓದಿ:ಯೋಗರಾಜ್ ಭಟ್ರ ‘ಕರಟಕ ದಮನಕ’ದಲ್ಲಿ ಶಿವಣ್ಣ- ಪ್ರಭುದೇವ ಬ್ಯುಸಿ

ಮ್ಯಾನ್‌ ಹಟ್ಟನ್‌ ನಲ್ಲಿರುವ ಅಂಬಾನಿಯವರ ಅಪಾರ್ಟ್‌ ಮೆಂಟ್ 2,406 ಚದರ ಅಡಿ ವಿಸ್ತೀರ್ಣ ಹೊಂದಿದ್ದು, ಎರಡು ಕೋಣೆ, ಹಾಲ್‌ ಮತ್ತು ಶೌಚಾಲಯನ್ನೊಳಗೊಂಡಿದೆ. ಈ ಮನೆಯಿಂದ ಹಡ್ಸನ್‌ ನದಿಯನ್ನು ವೀಕ್ಷಿಸಬಹುದಾಗಿದೆ.

ಹತ್ತು ಅಡಿ ಎತ್ತರದ ಗೋಡೆ, ಅತ್ಯಾಧುನಿಕ ಅಡುಗೆ ಕೋಣೆ, ಸೌಂಡ್‌ ಫ್ರೂಫ್ ಕಿಟಕಿ, ಆಕರ್ಷಕ ಪೀಠೋಪಕರಣಗಳು ಈ ಅಪಾರ್ಟ್‌ ಮೆಂಟ್‌ ನಲ್ಲಿರುವುದಾಗಿ ವರದಿ ತಿಳಿಸಿದೆ. ಅಂಬಾನಿ ನಿವಾಸದ ಈ ಅಪಾರ್ಟ್‌ ಮೆಂಟ್‌ ಗೆ ಸುಪೀರಿಯರ್‌ ಇಂಕ್‌ ಎಂದು ಕರೆಯಲಾಗುತ್ತದೆ. ಯಾಕೆಂದರೆ ಈ ಮೊದಲು ಅಪಾರ್ಟ್‌ ಮೆಂಟ್‌ ನಲ್ಲಿ ಹಿಲರಿ ಸ್ವಾಂಕ್‌, ನಾಸ್ಕರ್‌ ಜಿಮ್ಮೈ ಜಾನ್ಸನ್‌, ಡಿಸೈನರ್‌ ಮಾರ್ಕ್‌ ಜಾಕೋಬ್ಸ್‌ ಹಾಗೂ ಕೋಟ್ಯಧಿಪತಿ ಲೆಸ್ಲೈ ಅಲೆಕ್ಸಾಂಡರ್‌ ವಾಸವಾಗಿದ್ದರು.

1919ರಲ್ಲಿ ಸುಪೀರಿಯರ್‌ ಇಂಕ್‌ ಫ್ಯಾಕ್ಟರಿಯಾಗಿದ್ದ ಈ 17 ಅಂತಸ್ತಿನ ಕಟ್ಟಡವನ್ನು 2019ರಲ್ಲಿ ಜನರು ವಾಸಿಸಲು ಅನುಕೂಲವಾಗುವ ನಿಟ್ಟಿನಲ್ಲಿ ಜಿಮ್‌, ಯೋಗ ಕೋಣೆ, ಮಕ್ಕಳ ಆಟದ ಕೋಣೆ ಮತ್ತು ಬೈಕ್‌ ರೂಂ, ಪಾರ್ಕಿಂಗ್‌ ವ್ಯವಸ್ಥೆಯೊಂದಿಗೆ ಪುನರ್‌ ನವೀಕರಣ ಮಾಡಲಾಗಿತ್ತು ಎಂದು ವರದಿ ವಿವರಿಸಿದೆ.