Shah Rukh Khan: 17 ವರ್ಷದ ಬಳಿಕ ಜೊತೆಯಾಗಿ ನಟಿಸಲಿದ್ದಾರೆ ಅಮಿತಾಭ್ – ಶಾರುಖ್‌

Team Udayavani, Aug 26, 2023, 6:39 PM IST

ಮುಂಬಯಿ: ಶಾರುಖ್‌ – ಅಮಿತಾಭ್‌ ಬಚ್ಚನ್‌ ಇಬ್ಬರು ಬಾಲಿವುಡ್‌ ಸಿನಿಮಾರಂಗದ  ಸೂಪರ್‌ ಸ್ಟಾರ್‌. ಇಬ್ಬರನ್ನು ಒಂದೇ ಸ್ಕ್ರೀನ್‌ ನಲ್ಲಿ  ನೋಡುವುದು ಪ್ರತಿಯೊಬ್ಬರು ಆಸೆ. ಈ ಮಹಾದಾಸೆ ಶೀಘ್ರದಲ್ಲಿ ಈಡೇರಲಿದೆ.

ಶಾರುಖ್‌, ಅಮಿತಾಭ್‌ 2006 ರಲ್ಲಿ ಬಂದ ʼಕಭಿ ಅಲ್ವಿದಾ ನಾ ಕೆಹನಾʼ ಸಿನಿಮಾದಲ್ಲಿ ಜೊತೆಯಾಗಿ ಕಾಣಿಸಿಕೊಂಡಿದ್ದರು. ಆ ಬಳಿಕ ಇಬ್ಬರು ಯಾವ ಸಿನಿಮಾದಲ್ಲಿ ಜೊತೆಯಾಗಿ ನಟಿಸದಿದ್ದರೂ ಬಿಟೌನ್‌ ನಲ್ಲಿ ಅವರ ಜನಪ್ರಿಯತೆ ಈ ನಡುವಿನ ವರ್ಷದಲ್ಲಿ ಹೆಚ್ಚಾಗಿದೆ.

‘ಕಭಿ ಅಲ್ವಿದಾ ನಾ ಕೆಹನಾ’ ಕರಣ್ ಜೋಹರ್ ಬರೆದು ನಿರ್ದೇಶಿಸಿದ್ದಾರೆ. ಈ ಚಿತ್ರದಲ್ಲಿ ಅಭಿಷೇಕ್ ಬಚ್ಚನ್, ರಾಣಿ ಮುಖರ್ಜಿ, ಪ್ರೀತಿ ಜಿಂಟಾ ಮತ್ತು ಕಿರಣ್ ಖೇರ್ ಕೂಡ ನಟಿಸಿದ್ದಾರೆ.

ಆ ಬಳಿಕ ಅಮಿತಾಭ್‌ ಹಾಗೂ ಶಾರುಖ್‌ ಇಬ್ಬರನ್ನು ಜೊತೆಯಾಗಿ ಸಿನಿಮಾದಲ್ಲಿ ನೋಡಲು ಅಭಿಮಾನಿಗಳು ಬಯಸಿದ್ದರು. ಆದರೆ ಅದು ಸಾಧ್ಯವಾಗಿಲ್ಲ. ಇದೀಗ ವರದಿಗಳ ಪ್ರಕಾರ ಶಾರುಖ್‌ -ಅಮಿತಾಭ್‌ ಜೊತೆಯಾಗಿ ಒಂದು ಪ್ರಾಜೆಕ್ಟ್‌ ನಲ್ಲಿ ಕಾಣಿಸಿಕೊಳ್ಳಲಿದ್ದಾರೆ ಎನ್ನಲಾಗಿದೆ.

ಆಸ್ಕ್‌ ಶಾರುಖ್‌ ಅವರಿಗೆ ಟ್ವಿಟರ್ ನಲ್ಲಿ ಬಳಕೆದಾರರೊಬ್ಬರು ಪ್ರಶ್ನೆಯನ್ನು ಕೇಳಿದ್ದಾರೆ. ಅಮಿತಾಭ್‌ ಬಚ್ಚನ್‌ ಅವರ ಬಗ್ಗೆ ಏನಾದರೂ ಹೇಳಿ ಎಂದಿದ್ದಾರೆ.

ಇದಕ್ಕೆ ಶಾರುಖ್‌ ಖಾನ್‌ ಪ್ರತಿಕ್ರಿಯೆ ನೀಡಿದ್ದಾರೆ. “ಅಮಿತಾಭ್‌ ಅವರೊಂದಿಗೆ ಕೆಲಸ ಮಾಡುವುದು ತುಂಬಾ ಸಂತೋಷವಾಗುತ್ತದೆ. ಸ್ಫೂರ್ತಿ ಮತ್ತು ಆಶೀರ್ವಾದದಿಂದ ಚಿತ್ರೀಕರಣದಿಂದ ಹಿಂತಿರುಗಿದೆ. ಮತ್ತು ಅವರು ನನ್ನನ್ನು ರೇಸ್‌ ನಲ್ಲಿ ಸೋಲಿಸಿದರು” ಎಂದು ಅಮಿತಾಭ್‌ ಜೊತೆ ಓಡುವ ಫೋಟೋವೊಂದನ್ನು ಶಾರುಖ್‌ ಹಂಚಿಕೊಂಡಿದ್ದಾರೆ.

ಈ ಹಿಂದೆ ʼಮೊಹಬ್ಬತೇನ್’, ‘ಕಭಿ ಖುಷಿ ಕಭಿ ಗಮ್’, ಮತ್ತು ‘ವೀರ್ ಝಾರಾ’ ಮುಂತಾದ ಸಿನಿಮಾದಲ್ಲಿ ಶಾರುಖ್‌ – ಅಮಿತಾಭ್‌ ಜತೆಯಾಗಿ ಕಾಣಿಸಿಕೊಂಡಿದ್ದರು.

ಸದ್ಯ ಶಾರುಖ್‌ – ಅಮಿತಾಭ್‌ 17 ವರ್ಷದ ಬಳಿಕ ಒಟ್ಟಿಗೆ ಕೆಲಸ ಮಾಡುತ್ತಿರುವ ಸಿನಿಮಾದ ಬಗ್ಗೆ ಬೇರೆ ಯಾವುದೇ ಅಪ್ಡೇಡ್‌ ಲಭ್ಯವಾಗಿಲ್ಲ. ಯಾರು ನಿರ್ದೇಶಕರು, ನಿರ್ಮಾಪಕರು ಯಾವುದರ ಬಗ್ಗೆಯೂ ಮಾಹಿತಿ ಲಭ್ಯವಾಗಿಲ್ಲ.

ಇನ್ನು ಪೋಸ್ಟರ್‌ ನೋಡಿ ಅಭಿಮಾನಿಗಳು ಶಾರುಖ್‌ – ಅಮಿತಾಭ್ ʼಡಾನ್‌ -3ʼ ನಲ್ಲಿ ವಿಶೇಷ ಪಾತ್ರದಲ್ಲಿ ನಟಿಸಲಿದ್ದಾರೆ ಎಂದು ಗೆಸ್‌ ಮಾಡಿದ್ದಾರೆ.