Crime: ಮಹಿಳಾ ಸಿಬ್ಬಂದಿ ಮೇಲೆ ಅತ್ಯಾಚಾರ, ಹತ್ಯೆ

Team Udayavani, Aug 29, 2023, 8:50 PM IST

ಲಕ್ನೋ: ಘಾಜಿಯಾಬಾದ್‌ನ ಹೌಸಿಂಗ್‌ ಸೊಸೈಟಿಯಲ್ಲಿ ಕಾವಲುಗಾರ ತಂಡದ ಸಿಬ್ಬಂದಿಯಾಗಿದ್ದ ಮಹಿಳೆಯೊಬ್ಬರ ಮೇಲೆ ಆಕೆಯ ತಂಡದ ಸೂಪರ್‌ವೈಸರ್‌ ಹಾಗೂ ಇನ್ನಿತರ ಇಬ್ಬರು ಕಾವಲುಗಾರರು ಸಾಮೂಹಿಕ ಅತ್ಯಾಚಾರವೆಸಗಿ, ಥಳಿಸಿ ಕೊಂದಿರುವ ಘಟನೆ ವರದಿಯಾಗಿದೆ. ಜಾರ್ಖಂಡ್‌ ಮೂಲದ ಮಹಿಳೆ ತಮ್ಮ ಸಂಬಂಧಿ ಮಹಿಳೆಯೊಂದಿಗೆ ಹೌಸಿಂಗ್‌ ಸೊಸೈಟಿ ಬಳಿ ವಾಸವಿದ್ದರು. ಅಲ್ಲಿಯೇ ಗಾರ್ಡ್‌ ಆಗಿ ಸೇವೆ ಸಲ್ಲಿಸುತ್ತಿದ್ದರು.

ಭಾನುವಾರ ಅವರದ್ದೇ ತಂಡದ ಸೂಪರ್‌ವೈಸರ್‌ ಮತ್ತು ಇನ್ನಿಬ್ಬರು ಸೇರಿ ಆಕೆಯನ್ನು ಥಳಿಸಿದ್ದಾರೆ. ಅಲ್ಲದೇ, ಆಕೆ ಮೇಲೆ ಸಾಮೂಹಿತ ಅತ್ಯಾಚಾರವೆಸಗಿ, ಬಳಿಕ ನೋಯ್ಡಾದ ಖಾಸಗಿ ಆಸ್ಪತ್ರೆಗೆ ದಾಖಲಿಸಿ, ಪರಾರಿಯಾಗಲು ಯತ್ನಿಸಿದ್ದಾರೆ. ನಂತರ ಪೊಲೀಸರು ಪ್ರಮುಖ ಆರೋಪಿ ಅಜಯ್‌ ಎಂಬಾತನನ್ನು ಬಂಧಿಸಿ, ಮಹಿಳೆಯನ್ನು ದೆಹಲಿಯ ಸಫ‌ªರ್‌ಜಂಗ್‌ ಆಸ್ಪತ್ರೆಗೆ ಸ್ಥಳಾಂತರಿಸಿದ್ದಾರೆ. ಆದರೆ, ಸ್ಥಿತಿ ಗಂಭೀರವಾಗಿದ್ದ ಕಾರಣ ಮಹಿಳೆ ಉಸಿರು ಚೆಲ್ಲಿದ್ದಾರೆ. ಪ್ರಕರಣ ಸಂಬಂಧಿಸಿದಂತೆ ಪೊಲೀಸರು ಕೇಸು ದಾಖಲಿಸಿ, ಉಳಿದ ಆರೋಪಿಗಳನ್ನು ಹುಡುಕುತ್ತಿರುವುದಾಗಿ ತಿಳಿಸಿದ್ದಾರೆ.