PIB ಮಹಾನಿರ್ದೇಶಕರಾಗಿ ಸಿಬಿಸಿ ಮುಖ್ಯಸ್ಥ ಮನೀಶ್ ದೇಸಾಯಿ ನೇಮಕ

Team Udayavani, Sep 1, 2023, 9:43 PM IST

ನವದೆಹಲಿ: ಸೆಂಟ್ರಲ್‌ ಬ್ಯೂರೋ ಆಫ್ ಕಮ್ಯೂನಿಕೇಶನ್ಸ್‌ (ಸಿಬಿಸಿ) ಮುಖ್ಯಸ್ಥ ಮನೀಷ್‌ ದೇಸಾಯಿ ಅವರನ್ನು ಪಿಐಬಿ (ಮಾಧ್ಯಮ ಮಾಹಿತಿ ಮಂಡಳಿ-ಪ್ರಸ್‌ ಇನ್‌ಫಾರ್ಮೇಶನ್‌ ಬ್ಯೂರೊ) ಮಹಾನಿರ್ದೇಶಕರಾಗಿ ನೇಮಿಸಲಾಗಿದೆ ಎಂದು ಕೇಂದ್ರ ಮಾಹಿತಿ ಮತ್ತು ಪ್ರಸಾರ ಖಾತೆ ಸಚಿವಾಲಯ ತಿಳಿಸಿದೆ.

1989ರ ಬ್ಯಾಚ್‌ನ ಹಿರಿಯ ಭಾರತೀಯ ಮಾಹಿತಿ ಸೇವೆ ಅಧಿಕಾರಿಯಾಗಿರುವ ಮನೀಶ್‌ ದೇಸಾಯಿ ಅವರು ಶುಕ್ರವಾರ ಅಧಿಕಾರ ಸ್ವೀಕರಿಸಲಿದ್ದಾರೆ. 2022ರಿಂದ ಪಿಐಬಿ ಪ್ರಧಾನ ಮಹಾನಿರ್ದೇಶಕರಾಗಿರುವ ರಾಜೇಶ್‌ ಮಲ್ಹೋತ್ರಾ ಅವರ ನಿವೃತ್ತಿ ಹಿನ್ನೆಲೆಯಲ್ಲಿ ಅವರ ಸ್ಥಾನಕ್ಕೆ ದೇಸಾಯಿ ಅವರನ್ನು ನೇಮಿಸಲಾಗಿದೆ.

ಈ ಹಿಂದೆ ದೇಸಾಯಿ ಅವರು ಸಿಬಿಸಿ ಜಾಹೀರಾತು ಮತ್ತು ಸಾರ್ವಜನಿಕ ಸಂಪರ್ಕ ವಿಭಾಗದ ಮುಖ್ಯ ಕಾರ್ಯನಿರ್ವಹಕ ಅಧಿಕಾರಿ, ರಿಜಿಸ್ಟ್ರಾರ್‌ ಆಫ್ ನ್ಯೂಸ್‌ಪೇಪರ್ ಆಫ್ ಇಂಡಿಯಾ (ಆರ್‌ಎನ್‌ಐ) ಪ್ರಧಾನ ನಿರ್ದೇಶಕ, ಪಿಐಬಿ ಹೆಚ್ಚುವರಿ ನಿರ್ದೇಶಕರಾಗಿ ಕಾರ್ಯ ನಿರ್ವಹಿಸಿ ಅಪಾರ ಅನುಭವ ಹೊಂದಿದ್ದಾರೆ. ಅಲ್ಲದೇ ಆಕಾಶವಾಣಿ ಹಾಗೂ ಇಂಡಿಯನ್‌ ಇನ್ಸ್‌ಸ್ಟಿಟ್ಯೂಟ್‌ ಆಫ್ ಮಾಸ್‌ ಕಮ್ಯೂನಿಕೇಶನ್‌ನಲ್ಲಿ ಸಹ ಕರ್ತವ್ಯ ನಿರ್ವಹಿಸಿದ್ದಾರೆ.