Asian TT ಚಾಂಪಿಯನ್‌ಶಿಪ್‌ : ಭಾರತಕ್ಕೆ ಕಂಚಿನ ಪದಕ ಖಾತ್ರಿ

Team Udayavani, Sep 5, 2023, 12:18 AM IST

ಹೊಸದಿಲ್ಲಿ: ದಕ್ಷಿಣ ಕೊರಿಯಾದಲ್ಲಿ ನಡೆಯುತ್ತಿರುವ ಏಷ್ಯನ್‌ ಟೇಬಲ್‌ ಟೆನಿಸ್‌ ಚಾಂಪಿಯನ್‌ಶಿಪ್‌ನಲ್ಲಿ ಭಾರತ ಕನಿಷ್ಠ ಕಂಚಿನ ಪದಕವೊಂದನ್ನು ಖಾತ್ರಿಗೊಳಿಸಿದೆ. ಸೋಮವಾರ ನಡೆದ ಕ್ವಾರ್ಟರ್‌ ಫೈನಲ್‌ನಲ್ಲಿ ಭಾರತ 3-0 ಅಂತರದಿಂದ ಸಿಂಗಾಪುರವನ್ನು ಮಣಿಸಿತು.

ಏಷ್ಯನ್‌ ಚಾಂಪಿಯನ್‌ಶಿಪ್‌ ಟಿಟಿಯಲ್ಲಿ ಸೆಮಿಫೈನಲ್‌ನಲ್ಲಿ ಪರಾಭವಗೊಂಡ ತಂಡಕ್ಕೂ ಕಂಚಿನ ಪದಕ ನೀಡಲಾಗುವುದು.
ಮೊದಲ ಸಿಂಗಲ್ಸ್‌ನಲ್ಲಿ ಭಾರತದ 41 ವರ್ಷಗಳ ಹಿರಿಯ ಆಟಗಾರ ಅಚಂತ ಶರತ್‌ ಕಮಲ್‌ ಭಾರೀ ಹೋರಾಟ ನಡೆಸಿ ಇಝಾಕ್‌ ಕ್ವೆಕ್‌ ಅವರನ್ನು 11-1, 10-12, 11-8, 11-3, 14-12 ಅಂತರದಿಂದ ಮಣಿಸುವಲ್ಲಿ ಯಶಸ್ವಿಯಾದರು.

ದ್ವಿತೀಯ ಸಿಂಗಲ್ಸ್‌ನಲ್ಲಿ ಜಿ. ಸಥಿಯನ್‌ 11-6, 11-8, 12-10ರಿಂದ ವ್ಯೂ ಎನ್‌ ಕೋನ್‌ ಪಾಂಗ್‌ ವಿರುದ್ಧ ಜಯ ಸಾಧಿಸಿದರು. ಅನಂತರದ ಮುಖಾಮುಖಿಯಲ್ಲಿ ಜೆ ಯು ಕ್ಲಾರೆನ್ಸ್‌ ಚ್ಯೂ ವಿರುದ್ಧ ಹರ್ಮೀತ್‌ ದೇಸಾಯಿ 11-9, 11-4, 11-6ರಿಂದ ಗೆದ್ದು ಬಂದರು.
ಭಾರತವಿನ್ನು ಇರಾನ್‌ ಅಥವಾ ಚೈನೀಸ್‌ ತೈಪೆ ವಿರುದ್ಧ ಸೆಮಿಫೈನಲ್‌ ಆಡಲಿದೆ. ಕಳೆದ ದೋಹಾ ಕೂಟದಲ್ಲಿ ಭಾರತ ಕಂಚಿನ ಪದಕ ಜಯಿಸಿತ್ತು.