Kota ಸಾರ್ವಜನಿಕ ಸ್ಥಳದಲ್ಲಿ ತ್ಯಾಜ್ಯ ಎಸೆದ ಆರೋಪಿ ಪೊಲೀಸ್‌ ವಶಕ್ಕೆ

Team Udayavani, Sep 9, 2023, 10:47 PM IST

ಕೋಟ: ಕೋಟ ಮೂಕೈì ಸಮೀಪ ಬೆಟ್ಲಕ್ಕಿಯ ಸಾರ್ವಜನಿಕ ಸ್ಥಳದಲ್ಲಿ ಕಸ ಹಾಗೂ ತ್ಯಾಜ್ಯ ಎಸೆಯುತ್ತಿದ್ದವರನ್ನು ಸ್ಥಳೀಯರು ರಾತ್ರಿ ಪೂರ್ತಿ ಕಾದು ಹಿಡಿದು ಪೊಲೀಸರಿಗೊಪ್ಪಿಸಿದ ಘಟನೆ ಶನಿವಾರ ಬೆಳಗಿನ ಜಾವ ಸಂಭವಿಸಿದೆ.

ಈ ಭಾಗದಲ್ಲಿ ನಿರಂತರವಾಗಿ ಕಸವನ್ನು ಎಸೆಯಲಾಗುತ್ತಿದ್ದು ಸ್ವತ್ಛಗೊಳಿಸಿದರೂ ಕೂಡ ಮತ್ತೆ-ಮತ್ತೆ ತ್ಯಾಜ್ಯ ರಾಶಿ ಬೀಳುತಿತ್ತು. ಹೀಗಾಗಿ ಸ್ಥಳೀಯ ಯುವಕರು ಎರಡು-ಮೂರು ದಿನಗಳಿಂದ ತ್ಯಾಜ್ಯ ಎಸೆಯುವವರನ್ನು ಪತ್ತೆ ಹಚ್ಚುವ ಸಲುವಾಗಿ ರಾತ್ರಿ ಪೂರ್ತಿ ನಿದ್ದೆಬಿಟ್ಟು ಕಾಯುತ್ತಿದ್ದರು. ಶನಿವಾರ ಬೆಳಗಿನ ಜಾವ 2 ಗಂಟೆಗೆ ಸಾಲಿಗ್ರಾಮ ಬಸ್‌ ನಿಲ್ದಾಣ ಸಮೀಪ ಹೊಸದಾಗಿ ತೆರೆಯಲಾದ ಫಾಸ್ಟ್‌ಪುಡ್‌ ಅಂಗಡಿಯೊಂದರಿಂದ ತ್ಯಾಜ್ಯವನ್ನು ತಂದು ಸುರಿಯುವಾಗ ಆರೋಪಿಗಳನ್ನು ಹಾಗೂ ವಾಹನವನ್ನು ಹಿಡಿದು ಪೊಲೀಸರಿಗೊಪ್ಪಿಸಿದ್ದಾರೆ.

ಈ ಬಗ್ಗೆ ಸಾಲಿಗ್ರಾಮ ಪ. ಪಂ. ಕೂಡ ಠಾಣೆಗೆ ದೂರು ನೀಡಿದ್ದು ಆರೋಪಿಗಳಿಗೆ ದಂಡ ವಿಧಿಸುವಂತೆ ತಿಳಿಸಲಾಗಿದೆ. ಸೋಮವಾರ ಮುಖ್ಯಾಧಿಕಾರಿಗಳು ಠಾಣೆಗೆ ತೆರಳಿ ಸೂಕ್ತ ಕ್ರಮ ಕೈಗೊಳ್ಳಲಿದ್ದಾರೆ ಎಂದು ಸ್ಥಳೀಯ ವಾರ್ಡ್‌ ಸದಸ್ಯೆ ಸುಕನ್ಯಾ ಶೆಟ್ಟಿ ತಿಳಿಸಿದ್ದಾರೆ.