The Last Ride: ಇತಿಹಾಸ ಪುಟಕ್ಕೆ ಸೇರಿದ ಮುಂಬಯಿ ಜೀವನಾಡಿ ಡಬ್ಬಲ್‌ ಡೆಕ್ಕರ್‌ ಬಸ್‌

Team Udayavani, Sep 15, 2023, 7:02 PM IST

ಮುಂಬಯಿ: ಮುಂಬಯಿಯ‌ ಜೀವನಾಡಿ ಎಂದು ಕರೆಯಲಾಗಿದ್ದ ಡಬಲ್‌ ಡೆಕ್ಕರ್‌ ಬಸ್‌ ಶೀಘ್ರದಲ್ಲೇ ಇತಿಹಾಸಕ್ಕೆ ಸೇರಲಿದೆ.

ಮುಂಬಯಿ ನಿವಾಸಿಗರ ಬಿಡುವಿಲ್ಲದ ಜೀವನಶೈಲಿಯಲ್ಲಿ, ಅಗತ್ಯದ ಸಮಯದಲ್ಲಿ ಸೇವೆಯನ್ನು ನೀಡಿದ ಮತ್ತು 86 ವರ್ಷಗಳಿಂದ ನಿರಂತರವಾಗಿ ಮುಂಬಯಿ ಜನತೆಯ ಬೆಂಬಲವು ಕಣ್ಮರೆಯಾಗಲಿದೆ. ಬ್ರಿಟಿಷರು ಭಾರತಕ್ಕೆ ತಂದಿದ್ದ ಈ ಡಬಲ್‌ ಡೆಕ್ಕರ್‌ ಬಸ್‌ನ ತನ್ನ ಪ್ರಯಾಣ ಸ್ಥಗಿತಗೊಳಿಸಿದೆ. ಹಳೆಯ ಡಬಲ್‌ ಡೆಕ್ಕರ್‌ ಬಸ್‌ ಶುಕ್ರವಾರ ಮುಂಬಯಿ ರಸ್ತೆಗಳಲ್ಲಿ ತನ್ನ ಕೊನೆಯ ಪ್ರಯಾಣವನ್ನು ಬೆಳೆಸಿದೆ.

ಇಂದು ಬೆಳಗ್ಗೆ ಮರೋಲ್‌ ಡಿಪೋದಿಂದ ಕೊನೆಯ ನಾನ್‌ ಎಸಿ ಡಬಲ್‌ ಡೆಕ್ಕರ್‌ ಕೆಂಪು ಬಸ್‌ ಹೊರಟಿತು. ಈ ವೇಳೆ ಕೆಂಪು ಬಣ್ಣದ ನಾನ್‌ ಎಸಿ ಡಬಲ್‌ ಡೆಕ್ಕರ್‌ಗೆ ಅಲಂಕರಿಸಲಾಯಿತು.

ಮುಂಬಯಿ ದರ್ಶನ ಅಥವಾ ಗೇಟ್‌ ವೇ ಆಫ್‌ ಇಂಡಿಯಾ ಆಗಿರಲಿ ಡಬಲ್‌ ಡೆಕ್ಕರ್‌ ಬಸ್‌ ಪ್ರಯಾಣವನ್ನು ಎಲ್ಲರಿಗೂ ಆಹ್ಲಾದಕರವಾಗಿದೆ. ಮುಂಬಯಿಯಂತಹ ಜನನಿಬಿಡ ಪ್ರದೇಶದಲ್ಲಿ ಡಬಲ್‌ ಡೆಕ್ಕರ್‌ ಕಂಡರೆ ಮಕ್ಕಳಲ್ಲೂ ಕುತೂಹಲ ಹೆಚ್ಚಾಗುತ್ತಿತ್ತು. ಕೆಂಪು ಬಣ್ಣವು ಅನೇಕರ ನೆಚ್ಚಿನ ಮತ್ತು ಆಕರ್ಷಣೆಯ ಕೇಂದ್ರವಾಗಿದೆ. ಮುಂಬಯಿ ನೋಡಬೇಕಾದರೆ ಉದ್ದನೆಯ ಸರತಿ ಸಾಲಿನಲ್ಲಿ ನಿಂತು ಟಿಕೆಟ್‌ ಕೊಳ್ಳುವ ಉತ್ಸಾಹ ಹಾಗೂ ಈ ಡಬಲ್‌ ಡೆಕ್ಕರ್‌ ಪಯಣ ಎಲ್ಲರ ಅಚ್ಚುಮೆಚ್ಚಿನದಾಗಿತ್ತು.

ಸಿನಿಮಾದಿಂದ ಹಿಡಿದು ಧಾರಾವಾಹಿಯವರೆಗೂ ಈ ಡಬ್ಬಲ್‌ ಡೆಕ್ಕರ್‌ ಬಸ್‌ ನಿಂದ ಮುಂಬಯಿಯ ಪರಿಚಯವೇ ಆಗಿತ್ತು. ಅದು ಬಸ್ಸಿನಲ್ಲಿ ನಡೆದ ಕಥೆಯೇ ಆಗಿರಲಿ ಅಥವಾ ಅದರಿಂದ ನಡೆದ ನಟನೇ ಇರಲಿ. ಸಿನಿಮಾದಲ್ಲಿ ಮುಂಬಯಿ ತೋರಿಸುವಾಗ ಬಸ್‌ ಕ್ರೇಜ್‌ ಹೆಚ್ಚಾಯಿತು. ಕೆಲವೊಮ್ಮೆ ಕಿಟಕಿಯ ಬಳಿ ಮತ್ತು ಕೆಲವೊಮ್ಮೆ ಹರಟೆ ಹೊಡೆಯುತ್ತಾ ನಾವು ಸಂತೋಷದಿಂದ ಪ್ರಯಾಣಿಸಿರಬೇಕು. ಇಂದು ಡಿಸೇಲ್‌ನಲ್ಲಿ ಓಡುವ ಡಬಲ್‌ ಡೆಕ್ಕರ್‌ ಬಸ್‌ಗಳನ್ನು ನಿಲ್ಲಿಸಲು ಬೆಸ್ಟ್ ಆಡಳಿತ ನಿರ್ಧರಿಸಿದೆ.

ಆದ್ದರಿಂದ, ಮುಂಬಯಿಯ ರಸ್ತೆಗಳಲ್ಲಿ ಓಡುವ ಡಬ್ಬಲ್‌ ಡೆಕ್ಟರ್‌ ನಾನ್‌ ಎಸಿ ಇನ್ನು ನೆನಪು ಮಾತ್ರ.

1937ರಲ್ಲಿ ಮೊದಲ ಬಸ್‌
1937 ರಲ್ಲಿ ಮುಂಬಯಿ ಬೀದಿಗಳಲ್ಲಿ ಡಬಲ್‌ ಡೆಕ್ಕರ್‌ ಬಸ್ಸುಗಳು ಓಡಲಾರಂಭಿಸಿದವು. ಅನಂತರ ಓಪನ್‌ ಟಾಪ್‌ ಡಬಲ್‌ ಡೆಕ್ಕರ್‌ ಬಸ್‌ಗಳನ್ನು 1997 ರಲ್ಲಿ ಮಹಾರಾಷ್ಟ್ರ ಪ್ರವಾಸೋದ್ಯಮ ಅಭಿವೃದ್ಧಿ ನಿಗಮವು ಪ್ರಾರಂಭಿಸಿತು.

90 ರ ದಶಕದ ಮಧ್ಯದಿಂದ, ಈ ಬಸ್ಸುಗಳು ಹಳೆಯದಾಗಲಾರಂಭಿಸಿದವು ಮತ್ತು ಅವುಗಳ ಸಂಖ್ಯೆಯು ಕಡಿಮೆಯಾಗ ತೊಡಗಿದವು. ಬದಲಾಗುತ್ತಿರುವ ಪ್ರಪಂಚದ ಪ್ರಕಾರ, ಬೆಸ್ಟ್ ಫ್ಲೀಟ್‌ ಓಪನ್‌ ಡೆಕ್‌ ಬಸ್‌ಗಳನ್ನು ಸಹ ಒಳಗೊಂಡಿದೆ. ಡಿಸೇಲ್‌ ಚಾಲಿತ ಬಸ್‌ಗಳ ಬದಲಿಗೆ ವಿದ್ಯುತ್‌ ಚಾಲಿತ ಹವಾನಿಯಂತ್ರಿತ ಡಬಲ್‌ ಡೆಕ್ಕರ್‌ ಬಸ್‌ಗಳು ಖಾಸಗಿ ಗುತ್ತಿಗೆಯ ಆಧಾರದ ಮೇಲೆ ಬೆಸ್ಟ್ ಮಾರ್ಗಗಳಲ್ಲಿ ಸಂಚರಿಸಲಾರಂಭಿಸಿದೆ.