Bangalore: ದೇವನಹಳ್ಳಿಯಲ್ಲಿ ಶುರುವಾಗಲಿದೆ ಬೋಯಿಂಗ್‌ ಉತ್ಪಾದನಾ ಘಟಕ

Team Udayavani, Sep 22, 2023, 10:22 PM IST

ನವದೆಹಲಿ: ಅಮೆರಿಕದ ವೈಮಾನಿಕ ಸಂಸ್ಥೆ ಬೋಯಿಂಗ್‌ ಬೆಂಗಳೂರಿನ ದೇವನಹಳ್ಳಿಯಲ್ಲಿ ಅತಿ ದೊಡ್ಡ ಉತ್ಪಾದನಾ ಘಟಕ ಆರಂಭಿಸಲಿದೆ. 43 ಎಕರೆ ವ್ಯಾಪ್ತಿಯಲ್ಲಿ 1,600 ಕೋಟಿ ರೂ. ವೆಚ್ಚದಲ್ಲಿ ಅದನ್ನು ನಿರ್ಮಿಸಲಾಗಿದೆ. ಇದೇ ಮೊದಲ ಬಾರಿಗೆ ಅಮೆರಿಕದಿಂದ ಹೊರಗೆ ಕಂಪನಿ ತನ್ನ ಘಟಕವನ್ನು ಆರಂಭಿಸುತ್ತಿದೆ.

ಬೋಯಿಂಗ್‌ ಇಂಡಿಯಾ ಹೆಸರಿನಲ್ಲಿ ಅಮೆರಿಕದ ಕಂಪನಿ ವಹಿವಾಟು ನಡೆಸುತ್ತಿದ್ದು, ಸದ್ಯ ವಾರ್ಷಿಕವಾಗಿ 8 ಸಾವಿರ ಕೋಟಿ ರೂ. ನಡೆಸುತ್ತಿದೆ. ಮುಂದಿನ ವರ್ಷಗಳಲ್ಲಿ ಅದನ್ನು 10 ಸಾವಿರ ಕೋಟಿ ರೂ.ಗೆ ಏರಿಸುವ ಗುರಿಯನ್ನು ಕಂಪನಿ ಹಾಕಿಕೊಂಡಿದೆ. ದೇವನಹಳ್ಳಿಯಲ್ಲಿ ಬೋಯಿಂಗ್‌ ಘಟಕ ಸ್ಥಾಪನೆಯಾಗುವುದರಿಂದ ದೇಶದಲ್ಲಿ ವೈಮಾನಿಕ ಕ್ಷೇತ್ರದಲ್ಲಿ ಉದ್ದಿಮೆಗೆ ಮತ್ತಷ್ಟು ಬಲಬರಲಿದೆ.

ಕೆಂಪೇಗೌಡ ಅಂತಾರಾಷ್ಟ್ರೀಯ ವಿಮಾನನಿಲ್ದಾಣಕ್ಕೆ ಶೀಘ್ರದಲ್ಲಿಯೇ ಮೆಟ್ರೋ ಸಂಪರ್ಕವೂ ಸಿಗಲಿದೆ. ಹೀಗಾಗಿ, ಅಲ್ಲಿ ಹೆಚ್ಚಿನ ರೀತಿಯಲ್ಲಿ ಉದ್ಯೋಗದ ಅವಕಾಶಗಳೂ ಲಭ್ಯವಾಗಲಿದೆ. ಬೋಯಿಂಗ್‌ ಇಂಡಿಯಾ ಎಂಜಿನಿಯರಿಂಗ್‌ ಆ್ಯಂಡ್‌ ಟೆಕ್ನಾಲಜಿ ಸೆಂಟರ್‌ (ಬಿಐಇಟಿಸಿ) ಬೆಂಗಳೂರು ಮತ್ತು ಚೆನ್ನೈನಲ್ಲಿ ಸದ್ಯ ಕಾರ್ಯ ನಿರ್ವಹಿಸುತ್ತಿದೆ.
ಏರ್‌ ಇಂಡಿಯಾ ಇತ್ತೀಚೆಗೆ 200 ವಿಮಾನಗಳ ಖರೀದಿಗೆ ಒಪ್ಪಂದ ಮಾಡಿಕೊಂಡಿತ್ತು. ಇದರ ಜತೆಗೆ ಭಾರತೀಯ ನೌಕಾಪಡೆಯ 12 ಪಿ-81 ವಿಮಾನಗಳು ಬೋಯಿಂಗ್‌ನಿಂದಲೇ ನಿರ್ಮಾಣಗೊಂಡಿವೆ. ಅವುಗಳ ಸಂಖ್ಯೆಯನ್ನು 18ಕ್ಕೆ ಏರಿಸುವ ನಿಟ್ಟಿನಲ್ಲಿ ಈಗಾಗಲೇ ಒಪ್ಪಂದಕ್ಕೆ ಸಹಿ ಹಾಕಲಾಗಿದೆ. ಅವುಗಳನ್ನು ಮೇಕ್‌ ಇನ್‌ ಇಂಡಿಯಾ ಅಡಿಯಲ್ಲಿ ದೇಶದಲ್ಲಿಯೇ ಉತ್ಪಾದಿಸುವ ಯೋಜನೆಯನ್ನೂ ಕಂಪನಿ ಹೊಂದಿದೆ.

1,600 ಕೋಟಿ ರೂ– ಹೂಡಿಕೆ ಮಾಡಲಾಗಿರುವ ಬಂಡವಾಳ
43 ಎಕರೆ- ಕಂಪನಿಗೆ ನೀಡಲಾಗಿರುವ ಜಮೀನು