Mangaluru ರೈಲು ಹತ್ತುವಾಗ ಆಯತಪ್ಪಿ ಬಿದ್ದ ಮಹಿಳೆಯ ರಕ್ಷಣೆ

Team Udayavani, Sep 27, 2023, 12:14 AM IST

ಮಂಗಳೂರು: ಮಂಗಳೂರು ಕೇಂದ್ರ ರೈಲ್ವೇ ನಿಲ್ದಾಣದಲ್ಲಿ ರೈಲು ಹತ್ತುವಾಗ ಬಿದ್ದ ಮಹಿಳೆ ಮತ್ತು ಆಕೆಯ ಸಂಬಂಧಿಯನ್ನು ರೈಲ್ವೇ ರಕ್ಷಣ ದಳದವರು ರಕ್ಷಿಸಿದ್ದಾರೆ.

ಮಂಗಳವಾರ ಮಧ್ಯಾಹ್ನ 12 ಗಂಟೆಯ ಸುಮಾರಿಗೆ ಮಂಗಳೂರು ಸೆಂಟ್ರಲ್‌-ಚೆನ್ನೈ ಎಕ್ಸ್‌ಪ್ರೆಸ್‌ ರೈಲು (12602) ಪ್ಲಾಟ್‌ಫಾರಂ 1ರಿಂದ ಹೊರಡುತ್ತಿದ್ದಾಗ ಕೊಯಮತ್ತೂರಿನ ಸೋಫಿಯಾ (50) ಹತ್ತಲು ಯತ್ನಿಸಿದರು. ಆದರೆ ಯಶಸ್ವಿಯಾಗದೆ ಕೆಳಕ್ಕೆ ಬಿದ್ದರು. ಅಲ್ಲಿಯೇ ಇದ್ದ ಆಕೆಯ ಸಂಬಂಧಿ ಆಕೆಯನ್ನು ರಕ್ಷಿಸಲು ಮುಂದಾದರು. ಆದರೆ ಇಬ್ಬರೂ ನಿಯಂತ್ರಣ ಕಳೆದುಕೊಂಡು ಹಳಿ ಮತ್ತು ರೈಲಿನ ನಡುವೆ ಸಿಲುಕುವ ಅಪಾಯದಲ್ಲಿದ್ದರು. ಹತ್ತಿರದಲ್ಲಿದ್ದ ಆರ್‌ಪಿಎಫ್ ಸಿಬಂದಿ ಪಿ.ಬಿ. ಬಾಬುರಾಜನ್‌ ಅವರು ಕೂಡಲೇ ಅವರಿಬ್ಬರನ್ನು ಎಳೆದು ರಕ್ಷಿಸಿದ್ದಾರೆ. ಮಹಿಳೆಯ ಎರಡು ಮೊಣಕಾಲುಗಳಿಗೂ ಗಾಯವಾಗಿದ್ದು ಪ್ರಥಮ ಚಿಕಿತ್ಸೆ ನೀಡಲಾಯಿತು.