Israel; ಟೆಲ್ ಅವೀವ್‌ಗೆ ನಿಗದಿತ ವಿಮಾನಗಳನ್ನು ಅ 18 ರವರೆಗೆ ಸ್ಥಗಿತಗೊಳಿಸಿದ ಏರ್ ಇಂಡಿಯಾ

Team Udayavani, Oct 14, 2023, 9:23 PM IST

ಹೊಸದಿಲ್ಲಿ: ಇಸ್ರೇಲ್ ಮತ್ತು ಉಗ್ರಗಾಮಿ ಗುಂಪು ಹಮಾಸ್ ನಡುವೆ ನಡೆಯುತ್ತಿರುವ ಸಂಘರ್ಷದ ಮಧ್ಯೆ ಏರ್ ಇಂಡಿಯಾ ತನ್ನ ನಿಗದಿತ ವಿಮಾನಗಳ ಹಾರಾಟವನ್ನು ಟೆಲ್ ಅವಿವ್‌ಗೆ ಮತ್ತು ಅಲ್ಲಿಂದ ಬರುವುದನ್ನು ಅಕ್ಟೋಬರ್ 18 ರವರೆಗೆ ವಿಸ್ತರಿಸಿದೆ.

ಸಾಮಾನ್ಯವಾಗಿ ಟೆಲ್ ಅವೀವ್‌ಗೆ ಐದು ವಾರದ ನಿಗದಿತ ವಿಮಾನಗಳನ್ನು ಈ ಮೊದಲು ಅಕ್ಟೋಬರ್ 14 ರವರೆಗೆ ಸ್ಥಗಿತಗೊಳಿಸಿತ್ತು. ಶನಿವಾರದಂದು ವಿಮಾನಯಾನ ಅಧಿಕಾರಿಯೊಬ್ಬರು ಟೆಲ್ ಅವೀವ್‌ಗೆ ಮತ್ತು ಅಲ್ಲಿಂದ ಬರುವ ನಿಗದಿತ ವಿಮಾನಗಳನ್ನು ಈಗ ಅಕ್ಟೋಬರ್ 18 ರವರೆಗೆ ಸ್ಥಗಿತಗೊಳಿಸಲಾಗಿದೆ ಎಂದು ಹೇಳಿದ್ದಾರೆ. ಅವಶ್ಯಕತೆಗಳಿಗೆ ಅನುಗುಣವಾಗಿ ಭಾರತೀಯರನ್ನು ಮರಳಿ ಕರೆತರಲು ಚಾರ್ಟರ್ಡ್ ವಿಮಾನಗಳನ್ನು ನಿರ್ವಹಿಸಲಿವೆ ಎಂದು ಅಧಿಕಾರಿ ಸೇರಿಸಿದ್ದಾರೆ.

ಏರ್ ಇಂಡಿಯಾ ರಾಷ್ಟ್ರೀಯ ರಾಜಧಾನಿಯಿಂದ ಟೆಲ್ ಅವೀವ್‌ಗೆ ವಾರಕ್ಕೆ 5 ವಿಮಾನಗಳನ್ನು(ಸೋಮವಾರ, ಮಂಗಳವಾರ, ಗುರುವಾರ, ಶನಿವಾರ ಮತ್ತು ಭಾನುವಾರ) ನಿರ್ವಹಿಸುತ್ತದೆ.  ಇಸ್ರೇಲ್‌ನಿಂದ ಹಿಂತಿರುಗಲು ಬಯಸುವ ಭಾರತೀಯರನ್ನು ಕರೆತರಲು ಸರ್ಕಾರವು ಪ್ರಾರಂಭಿಸಿದ ‘ಆಪರೇಷನ್ ಅಜಯ್’ ಅಡಿಯಲ್ಲಿ, ಏರ್‌ಲೈನ್ ಇಲ್ಲಿಯವರೆಗೆ ಎರಡು ವಿಮಾನಗಳಲ್ಲಿ ಕರೆತಂದಿದೆ.

ವಿಶೇಷ ವಿಮಾನಗಳು

ಸತತ ಎರಡು ದಿನಗಳಲ್ಲಿ ಇಸ್ರೇಲ್‌ನಿಂದ 400 ಕ್ಕೂ ಹೆಚ್ಚು ಭಾರತೀಯ ಪ್ರಜೆಗಳನ್ನು ಕರೆತಂದ ನಂತರ, ಇಸ್ರೇಲ್-ಹಮಾಸ್ ಸಂಘರ್ಷದ ಮಧ್ಯೆ ದೇಶವನ್ನು ತೊರೆಯಲು ಬಯಸುವ ಹೆಚ್ಚಿನ ಭಾರತೀಯರಿಗೆ ಮತ್ತಷ್ಟು ಅನುಕೂಲವಾಗುವಂತೆ ಟೆಲ್ ಅವಿವ್‌ನಲ್ಲಿರುವ ಭಾರತೀಯ ರಾಯಭಾರ ಕಚೇರಿ ‘ಆಪರೇಷನ್ ಅಜಯ್’ ಭಾಗವಾಗಿ ಶನಿವಾರ ಎರಡು ವಿಶೇಷ ವಿಮಾನಗಳನ್ನು ಘೋಷಿಸಿದೆ.

ಮೊದಲ ವಿಮಾನವು 230 ಪ್ರಯಾಣಿಕರನ್ನು ಹೊತ್ತು ಸ್ಥಳೀಯ ಸಮಯ ಸಂಜೆ 5 ಗಂಟೆಗೆ ಹೊರಟಿದ್ದು, ಎರಡನೇ ವಿಮಾನವು 330 ಪ್ರಯಾಣಿಕರನ್ನು ಹೊತ್ತು ಸ್ಥಳೀಯ ಸಮಯ ರಾತ್ರಿ 11 ಗಂಟೆಗೆ ನಿಗದಿಯಾಗಿದೆ.

“ಇಸ್ರೇಲ್‌ನಲ್ಲಿರುವ ನಮ್ಮ ಎಲ್ಲಾ ನಾಗರಿಕರನ್ನು ತೊರೆಯಲು ಬಯಸುವವರಿಗೆ ಅನುಕೂಲವಾಗುವಂತೆ ರಾಯಭಾರ ಕಚೇರಿಯು ಹಗಲಿರುಳು ಕೆಲಸ ಮಾಡುತ್ತಿದೆ. ನಾವು ವಿದ್ಯಾರ್ಥಿಗಳು, ಆರೈಕೆದಾರರು ಮತ್ತು ವ್ಯಾಪಾರಸ್ಥರನ್ನು ತಲುಪಿದ್ದೇವೆ. ಅವರಲ್ಲಿ ಕೆಲವರು ನಮ್ಮೊಂದಿಗೆ ಸ್ವಯಂಸೇವಕರಾಗಿ ಕೆಲಸ ಮಾಡುತ್ತಿದ್ದಾರೆ. ಎಲ್ಲರೂ ಶಾಂತವಾಗಿರಲು ನಾವು ಒತ್ತಾಯಿಸುತ್ತೇವೆ ಎಂದು ರಾಯಭಾರಿ ಸಂಜೀವ್ ಸಿಂಗ್ಲಾ ಪಿಟಿಐಗೆ ತಿಳಿಸಿದ್ದಾರೆ.