Bangalore: ನಶೆಯಲ್ಲಿ ನಡುರಸ್ತೆಯಲ್ಲೇ ಯುವತಿಯರ ರಂಪಾಟ

Team Udayavani, Oct 21, 2023, 1:15 PM IST

ಬೆಂಗಳೂರು: ಕೋರಮಂಗಲದ ಡ್ರಂಕನ್‌ ಡ್ಯಾಡಿ  ಪಬ್‌ ಮುಂದೆ  ಪಾನಮತ್ತ ಯುವತಿಯರಿಬ್ಬರು ಸಾರ್ವಜನಿಕರೊಂದಿಗೆ ಜಗಳಕ್ಕಿಳಿದು ಹೈಡ್ರಾಮ ಮಾಡಿರುವ ಆರೋಪ ಕೇಳಿ ಬಂದಿದ್ದು, ಪೊಲೀಸರು ಎಚ್ಚರಿಕೆ ಕೊಟ್ಟು ಕಳುಹಿಸಿದ್ದಾರೆ.

ಗುರುವಾರ ತಡರಾತ್ರಿ ಕೋರಮಂಗಲದ ಡ್ರಂಕನ್‌ ಡ್ಯಾಡಿ ಪಬ್‌ ಬಳಿ ಇಬ್ಬರು ಯುವತಿಯರು ಹಾಗೂ ಯುವಕರು ಮದ್ಯದ ಅಮಲಿನಲ್ಲಿ ತೇಲುತ್ತಿದ್ದರು. ರಸ್ತೆಯಲ್ಲಿ ಬರುತ್ತಿದ್ದ ಕಾರಿನ ಮೇಲೆ ಕುಳಿತುಕೊಂಡು ಜೋರಾಗಿ ಕಿರುಚಾಡಿ ಅಸಭ್ಯವಾಗಿ ವರ್ತನೆ ತೋರಿದ್ದರು. ನಶೆಯಲ್ಲಿ ತೇಲುತ್ತಾ ಇವರ ಪುಂಡಾಟ ನೋಡಲು ಹತ್ತಾರು ಮಂದಿ ರಸ್ತೆ ಮಧ್ಯೆ ನಿಂತುಕೊಂಡ ಪರಿಣಾಮ  ಕೆಲ ಹೊತ್ತಿನವರೆಗೆ ರಸ್ತೆಯಲ್ಲಿ ಸಂಚಾರ ದಟ್ಟಣೆಯೂ ಉಂಟಾಯಿತು. ಒಬ್ಬ ಯುವತಿ ಕಾರಿನ ಮೇಲೆ ಏರಿ ಕೂಳಿತುಕೊಂಡು ಕೂಗಾಡಿದರೆ, ಮತ್ತೂಬ್ಬಳು, ಮದ್ಯದ ಅಮಲಿನಲ್ಲಿ ಸರಿಯಾಗಿ ನಿಲ್ಲಲು ಸಾಧ್ಯವಾಗದೇ ರಸ್ತೆಯಲ್ಲೇ ಅಡ್ಡಾದಿಡ್ಡಿ ಹೊರಳಾಡಿದ್ದಾಳೆ.

ಸಾಲದಕ್ಕೆ ರಸ್ತೆಯಲ್ಲಿ ತಿರುಗಾಡುತ್ತಿದ್ದ ಸಾರ್ವಜನಿಕರೊಂದಿಗೆ ಸುಖಾ ಸುಮ್ಮನೆ ಜಗಳ ಮಾಡಲು ಆರಂಭಿಸಿದ್ದರು. ಆ ವೇಳೆ ಸ್ಥಳೀಯರು ಕೋರಮಂಗಲ ಪೊಲೀಸರಿಗೆ ಈ ಕುರಿತು ಮಾಹಿತಿ ನೀಡಿದ್ದಾರೆ.  ಸ್ಥಳಕ್ಕೆ ಪೊಲೀಸರು ಹೋಗಿ ಪುಂಡಾಟ ಮಾಡುತ್ತಿದ್ದವರನ್ನ ವಶಕ್ಕೆ ಪಡೆದು ಎಚ್ಚರಿಕೆ ನೀಡಿ ಕಳುಹಿಸಿದ್ದಾರೆ. ಯುವತಿಯರು ನಶೆಯಲ್ಲಿ ತೇಲುತ್ತಿರುವುದನ್ನು ಸ್ಥಳೀಯರು ಮೊಬೈಲ್‌ನಲ್ಲಿ ಸೆರೆಹಿಡಿದಿದ್ದು, ಇದೀಗ ಸಾಮಾಜಿಕ ಜಾಲತಾಣಗಳಲ್ಲಿ ಈ ವಿಡಿಯೋ ವೈರಲ್‌ ಆಗಿದೆ. ಮದ್ಯಪಾನ ಮಾಡುವುದು ತಪ್ಪಲ್ಲ. ಆದರೆ, ನಡು ರಸ್ತೆಯಲ್ಲಿ ಯುವತಿಯರ ನಶೆಯ ತೇಲಾಟವು ಸಾರ್ವಜನಿಕರಿಗೆ ಕಿರಿ-ಕಿರಿಯಾಗಬಾರದು ಎಂದು ಸಾರ್ವಜನಿಕರು ಅಭಿಪ್ರಾಯ ವ್ಯಕ್ತಪಡಿಸಿದ್ದಾರೆ.