Pakistan: ಉಗ್ರ ದಾಳಿಗೆ ಐವರ ಸಾವು

Team Udayavani, Oct 31, 2023, 10:24 PM IST

ಇಸ್ಲಾಮಾಬಾದ್‌: ಪಾಕಿಸ್ತಾನದ ನೈಋತ್ಯ ಬಲೂಚಿಸ್ತಾನದ ಪೊಲೀಸ್‌ ಠಾಣೆಯೊಂದರ ಮೇಲೆ ಉಗ್ರರು ದಾಳಿ ನಡೆಸಿದ್ದು, ಘಟನೆಯಲ್ಲಿ ಓರ್ವ ಪೊಲೀಸ್‌ ಸೇರಿದಂತೆ 5 ಮಂದಿ ಮೃತಪಟ್ಟಿರುವುದು ವರದಿಯಾಗಿದೆ. ಟರ್ಬತ್‌ ಪ್ರದೇಶದ ನಸೀರಾಬಾದ್‌ನ ಠಾಣೆಯ ಮೇಲೆ ಮಂಗಳವಾರ ಮುಂಜಾನೆಯೇ 20 ಮಂದಿ ಉಗ್ರರು ದಾಳಿ ನಡೆಸಿದ್ದಾರೆ.

ಈ ವೇಳೆ ಠಾಣೆಯಲ್ಲಿದ್ದ ಪೇದೆಗಳಾದ ಎಸ್ಸಾ ಮತ್ತು ಹಸ್ಸನ್‌ ಉಗ್ರರನ್ನು ಹಿಮ್ಮೆಟ್ಟಿಸಲು ಮುಂದಾದಾಗ ಭಯೋತ್ಪಾದಕರು ಪೊಲೀಸರ ಶಸ್ತ್ರಾಸ್ತ್ರಗಳನ್ನೇ ಕಸಿದು ಪೇದೆಯನ್ನು ಕೊಂದಿದ್ದಾರೆ. ಅಲ್ಲದೇ, ಠಾಣೆಯಲ್ಲಿ ರಾತ್ರಿವೇಳೆ ಆಶ್ರಯ ಪಡೆದಿದ್ದ ಇನ್ನಿತರ ನಾಲ್ವರು ಕೂಲಿಕಾರ್ಮಿಕರನ್ನೂ ಹತ್ಯೆಗೈಯ್ಯಲಾಗಿದೆ. ಇನ್ನಿಬ್ಬರು ಗಂಭೀರವಾಗಿ ಗಾಯಗೊಂಡಿದ್ದಾರೆಂದು ಜಿಲ್ಲಾ ಪೊಲೀಸ್‌ ಅಧಿಕಾರಿ ಮೊಹಮ್ಮದ್‌ ಬಲೂಚ್‌ ಹೇಳಿದ್ದಾರೆ. ಘಟನೆ ಸಂಬಂಧ ಪ್ರಕರಣ ದಾಖಲಿಸಿ, ತನಿಖೆ ನಡೆಸುತ್ತಿರುವುದಾಗಿಯೂ ಹೇಳಿದ್ದಾರೆ.