Mulki ಮಹಿಳೆಯರ ಸರ ಅಪಹರಣಕಾರನ ಬಂಧನ

Team Udayavani, Nov 3, 2023, 10:16 PM IST

ಮೂಲ್ಕಿ: ಇಲ್ಲಿಯ ಠಾಣಾ ವ್ಯಾಪ್ತಿಯ ಹಳೆಯಂಗಡಿಯ ಪಾವಂಜೆಯ ಬಳಿ ಕಳೆದ ಅ. 14ರಂದು ಮಹಿಳೆಯೊರ್ವರ ಕುತ್ತಿಗೆಯ ಚಿನ್ನದ ಸರ ಅಪಹರಣ ಮಾಡಲು ಯತ್ನಿಸಿದ ಹಾಗೂ ಉಡುಪಿಯ ಕಟಪಾಡಿಯಲ್ಲಿ ಮಹಿಳೆಯೊರ್ವರ ಕುತ್ತಿಗೆಯ ಹವಳದ ಚಿನ್ನದ ಸರವನ್ನು ಅಪಹರಿಸಿದ ಪ್ರಕರಣದ ಆರೋಪಿಯನ್ನು ಮೂಲ್ಕಿ ಪೊಲೀಸರ ತಂಡ ಬಂಧಿಸಿದ್ದು, ಆತ ಉಪಯೋಗಿಸುತ್ತಿದ್ದ ದ್ವಿಚಕ್ರ ವಾಹನವನ್ನು ಮತ್ತು ಚಿನ್ನದ ಸರವನ್ನು ವಶಕ್ಕೆ ಪಡೆದುಕೊಂಡಿದ್ದಾರೆ.

ಆರೋಪಿ ವಿನಯ ಪ್ರಸಾದ್‌ (30) ಬಂಧಿತ ಯುವಕ. ಈತ ಮಂಗಳೂರು ಮಾಲೆಮಾರ್‌ ಬಳಿಯ ಬಾಡಿಗೆ ಮನೆಯಲ್ಲಿ ವಾಸ ಇದ್ದ. ಕಳವಾದ, ಪೊಲೀಸರು ವಶಕ್ಕೆ ಪಡೆದ ಸೊತ್ತಿನ ಒಟ್ಟು ಮೌಲ್ಯ 2.53 ಲಕ್ಷ ರೂ. ಎಂದು ಅಂದಾಜಿಸಲಾಗಿದೆ.

ಮಂಗಳೂರು ಕಮಿಷನರ್‌ ಅನುಪಮ್‌ ಅಗರ್‌ವಾಲ್‌ ಅವರ ಮಾರ್ಗದರ್ಶನದಲ್ಲಿ ಡಿಸಿಪಿಗಳಾದ ಸಿದ್ದಾರ್ಥ ಗೋಯಲ್‌ ಮತ್ತು ದಿನೇಶ್‌ ಕುಮಾರ್‌ ಅವರ ನಿರ್ದೇಶನದಲ್ಲಿ ಎಸಿಪಿ ಮಂಗಳೂರು ಉತ್ತರ ಮನೋಜ್‌ ಕುಮಾರ್‌ ಅವರ ನೇತೃತ್ವದಲ್ಲಿ ಮೂಲ್ಕಿ ಇನ್‌ಸ್ಪೆಕ್ಟರ್‌ ವಿಧ್ಯಾಧರ್‌ ಬಾಯ್ಕೆರಿಕಾರ್‌ ಹಾಗೂ ಪಿಎಸ್‌ಐ ವಿನಾಯಕ ಬಾವಿಕಟ್ಟೆ ಮತ್ತು ಮಾರತಿ ಪಿ. ಹಾಗೂ ಇತರ ಸಿಬಂದಿಗಳ ತಂಡ ಆರೋಪಿಯನ್ನು ಬಂಧಿಸಿ ಕಳವಿನ ಸೊತ್ತುಗಳನ್ನು ವಶಪಡಿಸಿಕೊಂಡಿದ್ದಾರೆ.