ಎಲ್ಲರ ಕೈಗೆ ಸಿಕ್ಕರೆ ಖಂಡಿತ… ರಶ್ಮಿಕಾ Deepfake ವಿಡಿಯೋ ಬಗ್ಗೆ ರಕ್ಷಿತ್‌ ಮಾತು

Team Udayavani, Nov 16, 2023, 2:51 PM IST

ಬೆಂಗಳೂರು: ಬಹುಭಾಷಾ ನಟಿ ರಶ್ಮಿಕಾ ಮಂದಣ್ಣ ಡೀಪ್‌ ಫೇಕ್‌ ವಿಡಿಯೋ ಬಳಿಕ ಸುದ್ದಿಯಲ್ಲಿದ್ದಾರೆ. ಡೀಪ್‌ ಫೇಕ್‌ ವಿರುದ್ಧ ಅನೇಕ ಕಲಾವಿದರು ಧ್ವನಿ ಎತ್ತಿದ್ದಾರೆ. ಈ ಕುರಿತು ದೆಹಲಿ ಪೊಲೀಸರು ಕೇಸ್‌ ಕೂಡ ದಾಖಲಿಸಿದ್ದಾರೆ.

ಇಂಡೋ – ಬ್ರಿಟಿಷ್‌ ಸೋಶಿಯಲ್ ಮೀಡಿಯಾ ತಾರೆ ಝಾರಾ ಪಟೇಲ್‌ ಅವರ ಅಸಲಿ ವಿಡಿಯೋವನ್ನು ಬಳಸಿಕೊಂಡು ರಶ್ಮಿಕಾ ಅವರ ಮುಖವನ್ನು ಎಐ ಮೂಲಕ ಜೋಡಿಸಿ ಡೀಪ್‌ ಫೇಕ್‌ ಮಾಡಲಾಗಿತ್ತು. ಈ ವಿಡಿಯೋ ಸೋಶಿಯಲ್‌ ಮೀಡಿಯಾದಲ್ಲಿ ವೈರಲ್‌ ಆಗಿತ್ತು.

ಈ ಕುರಿತು ಬಿಟೌನ್‌ ಹಿರಿಯ ನಟ ಅಮಿತಾಭ್‌‌ ,ಟಾಲಿವುಡ್‌ ನಟ ನಾಗಚೈತನ್ಯ, ಗಾಯಕಿ ಚಿನ್ಮಯಿ, ನಟ ವಿಜಯ್ ದೇವರಕೊಂಡ ಸೇರಿದಂತೆ ಹಲವರು ರಶ್ಮಿಕಾ ಬೆನ್ನಿಗೆ ನಿಂತಿದ್ದರು.

ಇದೀಗ ಈ ಬಗ್ಗೆ ನಟ ರಕ್ಷಿತ್‌ ಶೆಟ್ಟಿ ಮಾತನಾಡಿದ್ದಾರೆ. ಸಿಂಪಲ್‌ ಸ್ಟಾರ್‌ ಅವರ  ‘ಸಪ್ತ ಸಾಗರದಾಚೆ ಎಲ್ಲೋ ಸೈಡ್- B’ ಸಿನಿಮಾ ರಿಲೀಸ್‌ ರೆಡಿಯಾಗಿದೆ. ಸಿನಿಮಾದ ಪ್ರಚಾರದ ಅಂಗವಾಗಿ ನಾನಾ ಸಂದರ್ಶನದಲ್ಲಿ ಭಾಗಿಯಾಗುತ್ತಿದ್ದಾರೆ.

ತೆಲುಗಿನ ಪ್ರೇಮ ಜರ್ನಲಿಸ್ಟ್‌ ಎನ್ನುವ ಯೂಟ್ಯೂಬ್‌ ಚಾನೆಲ್‌ ನ ಸಂದರ್ಶನದಲ್ಲಿ ಅವರು ರಶ್ಮಿಕಾ ಮಂದಣ್ಣ ಅವರ ಡೀಪ್‌ ಫೇಕ್‌ ವಿಡಿಯೋ ಬಗ್ಗೆ ಮಾತನಾಡಿದ್ದಾರೆ.

“ಇಂತಹ ಸಾಫ್ಟ್‌ ವೇರ್‌ ಗಳ ಬಗ್ಗೆ ಸರ್ಕಾರ ಸೂಕ್ತ ಕ್ರಮ ಕೈಗೊಳ್ಳಬೇಕು. ವಿಡಿಯೋ ವೈರಲ್‌ ಆಗುವ ಅದನ್ನು ನಿಯಂತ್ರಣಕ್ಕೆ ತರಬೇಕು. ಈ ರೀತಿಯ ಸಾಫ್ಟ್‌ ವೇರ್‌ ಗಳು ಎಲ್ಲರ ಕೈಗೆ ಸಿಕ್ಕರೆ ಖಂಡಿತ ಅಪಾಯ ಎದುರಾಗುತ್ತದೆ. ಇಂತಹ ಸಾಫ್ಟ್‌ ವೇರ್‌ ಗಳು ಸೂಕ್ತ ನಿಯಮಗಳೊಂದಿಗೆ ಬರಬೇಕು” ಎಂದು ರಕ್ಷಿತ್‌ ಶೆಟ್ಟಿ ಹೇಳಿದ್ದಾರೆ.

ಸದ್ಯ ಈ ಸಂದರ್ಶನದ ಪ್ರೋಮೊ ಮಾತ್ರ ರಿಲೀಸ್‌ ಆಗಿದೆ.

ʼಕಿರಿಕ್‌ ಪಾರ್ಟಿʼಯಲ್ಲಿ ಜೊತೆಯಾಗಿ ನಟಿಸಿದ್ದ ರಕ್ಷಿತ್‌ – ರಶ್ಮಿಕಾ ಪರಸ್ಪರ ಪ್ರೀತಿಸಿ ಮದುವೆಯಾಗುವ ನಿಟ್ಟಿನಲ್ಲಿ ಎಂಗೇಜ್ ಮೆಂಟ್‌ ಆಗಿದ್ದರು.

ಶುಕ್ರವಾರ(ನ.17 ರಂದು) ನಾಲ್ಕು ಭಾಷೆಗಳಲ್ಲಿ ‘ಸಪ್ತ ಸಾಗರದಾಚೆ ಎಲ್ಲೋ ಸೈಡ್- Bʼ ತೆರೆ ಕಾಣಲಿದೆ.