ಭಾರತದ ಫೈನಲ್‌ ಪಂದ್ಯವನ್ನು ನೋಡಬೇಡಿ: Amitabhಗೆ ಎಚ್ಚರಿಕೆ ಕೊಟ್ಟ ಫ್ಯಾನ್ಸ್‌; ಕಾರಣವೇನು?

Team Udayavani, Nov 16, 2023, 3:22 PM IST

ಮುಂಬಯಿ: ವಿಶ್ವಕಪ್‌ನ ಮಹತ್ವದ‌ ಮೊದಲ ಸೆಮಿಫೈನಲ್ ನಲ್ಲಿ ಟೀಮ್‌ ಇಂಡಿಯಾ ನ್ಯೂಜಿಲೆಂಡ್‌ ವಿರುದ್ಧ ರೋಚಕ ಗೆಲುವು ದಾಖಲಿಸಿ ಫೈನಲ್‌ ಗೇರಿದೆ. ಎಲ್ಲೆಡೆ ಸಂಭ್ರಮ ಮನೆ ಮಾಡಿದ್ದು, ಫೈನಲ್‌ ಗೆ ಯಾರು ಎದುರಾಳಿ ಆಗುತ್ತಾರೆ ಎನ್ನುವ ಕುತೂಹಲದಲ್ಲಿ ಕ್ರೀಡಾಭಿಮಾನಿಗಳಿದ್ದಾರೆ.

ಕೊಹ್ಲಿ, ಅಯ್ಯರ್‌ , ಗಿಲ್‌ ಅವರ ಅಮೋಘ ಬ್ಯಾಟಿಂಗ್‌ ಜೊತೆಗೆ ಶಮಿ ಅವರ ಶ್ರೇಷ್ಠಮಟ್ಟದ ಬೌಲಿಂಗ್‌ ದಾಳಿಯನ್ನು ಮೈದಾನದಲ್ಲಿ ಸಾವಿರಾರು ಅಭಿಮಾನಿಗಳು ಹಾಗೂ ರಜಿನಿಕಾಂತ್‌ ಸೇರಿದಂತೆ ಹಲವು ಸೆಲೆಬ್ರಿಟಿಗಳು ವೀಕ್ಷಿಸಿದ್ದಾರೆ.

ಭಾರತದ ಗೆಲುವಿಗೆ ನಟ ಅಮಿತಾಭ್‌ ಅವರು ಅಭಿನಂದಿಸಿದ್ದಾರೆ. ಆದರೆ ಈ ವೇಳೆ ಬಿಗ್‌ ಬಿ ಮಾಡಿದ ಒಂದು ಟ್ವೀಟ್‌ ಸೋಶಿಯಲ್‌ ಮೀಡಿಯಾದಲ್ಲಿ ವೈರಲ್‌ ಆಗಿದ್ದು, ಇದರಿಂದ ಅಭಿಮಾನಿಗಳು ಅಮಿತಾಭ್‌ ಅವರಿಗೆ ನೀವು ಫೈನಲ್‌ ಪಂದ್ಯವನ್ನು ನೋಡಬೇಡಿ ಎಂದು ಎಚ್ಚರಿಸಿದ್ದಾರೆ.

ಇದನ್ನೂ ಓದಿ: ಎಲ್ಲರ ಕೈಗೆ ಸಿಕ್ಕರೆ ಖಂಡಿತ… ರಶ್ಮಿಕಾ Deepfake ವಿಡಿಯೋ ಬಗ್ಗೆ ರಕ್ಷಿತ್‌ ಮಾತು

ಅಮಿತಾಭ್‌ ಮಾಡಿದ ಟ್ವೀಟ್‌ ನಲ್ಲೇನಿದೆ? : ಪಂದ್ಯ ಮುಗಿದ ಬಳಿಕ ಅಮಿತಾಭ್‌ ಬಚ್ಚನ್‌ ಅವರು, “ನಾವು ಯಾವಾಗ ಮ್ಯಾಚ್‌ ನೋಡುವುದಿಲ್ಲವೋ ಆ ದಿನವೇ ನಾವು ಪಂದ್ಯವನ್ನು ಗೆಲ್ಲುತ್ತೇವೆ” ಎಂದು ಟ್ವೀಟ್‌ ಮಾಡಿದ್ದಾರೆ.

ಈ ಟ್ವೀಟ್‌ ನ್ನು ನೋಡಿದ ಅಭಿಮಾನಿಗಳು ಅಮಿತಾಭ್‌ ಅವರಿಗೆ “ನೀವು ಫೈನಲ್‌ ಪಂದ್ಯವನ್ನು ನೋಡಬೇಡಿ ಸರ್”‌ ಎಂದು ಟ್ವೀಟ್‌ ಮಾಡಿ ಆಗ್ರಹಿಸಿದ್ದಾರೆ.

“ಸರ್‌ ನೀವು ಭಾನುವಾರ ಭಾರತದ ಫೈನಲ್‌ ಪಂದ್ಯವನ್ನು ನೋಡಬೇಡಿ” ಎಂದು ಒಬ್ಬರು ಟ್ವೀಟ್‌ ಮಾಡಿದ್ದಾರೆ. “ನಮ್ಮಗಾಗಿ ಇದೊಂದು ತ್ಯಾಗ ಮಾಡಿ, ದಯವಿಟ್ಟು ಫೈನಲ್ ಪಂದ್ಯವನ್ನು ನೋಡಬೇಡಿ” ಎಂದು ಮತ್ತೊಬ್ಬರು ಟ್ವೀಟ್‌ ಮಾಡಿದ್ದಾರೆ.

ಸದ್ಯ ಅಮಿತಾಭ್‌ ಮಾಡಿರುವ ಈ ಟ್ವೀಟ್‌ ವೈರಲ್‌ ಆಗಿದ್ದು, ಅಭಿಮಾನಿಗಳು ರಿಟ್ವೀಟ್‌ ಮಾಡಿ ಪಂದ್ಯ ನೋಡಬೇಡಿ ಎನ್ನುತ್ತಿದ್ದಾರೆ.