G-20: ಭಾರತದಲ್ಲಿ ಜಾಗತಿಕ AI ಶೃಂಗ- ವರ್ಚುವಲ್‌ ಸಭೆಯಲ್ಲಿ ಪ್ರಧಾನಿ ಮೋದಿ ಘೋಷಣೆ

Team Udayavani, Nov 22, 2023, 11:57 PM IST

ಹೊಸದಿಲ್ಲಿ: ಬುಧವಾರ ವರ್ಚುವಲ್‌ ಮೂಲಕ ಜಿ20 ನಾಯಕರ ಸಭೆ ನಡೆಯಿತು. ಇದರಲ್ಲಿ ಭಾಗವಹಿಸಿದ್ದ ಪ್ರಧಾನಿ ನರೇಂದ್ರ ಮೋದಿ, ಜಾಗತಿಕ ದಕ್ಷಿಣ ದೇಶಗಳಲ್ಲಿ ಡಿಜಿಟಲ್‌ ಮೂಲಭೂತ ಸೌಕರ್ಯ ರೂಪಿಸಲು, ಒಂದು ಸಾಮಾಜಿಕ ಪರಿಣಾಮ ನಿಧಿಯನ್ನು ಸ್ಥಾಪಿಸಲು ಶಿಫಾರಸು ಮಾಡಿದರು. ಅಷ್ಟು ಮಾತ್ರವಲ್ಲ ಇದರ ಸಾಕಾರಕ್ಕೆ ಭಾರತ 25 ಮಿಲಿಯನ್‌ ಡಾಲರ್‌ ಹಣವನ್ನು ಪ್ರಾಥಮಿಕ ನಿಧಿಯಾಗಿ ನೀಡಲಿದೆ ಎಂದಿದ್ದಾರೆ. ಇದೇ ವೇಳೆ ಅವರು ಕೃತಕ ಬುದ್ಧಿಮತ್ತೆಯ ಅಪಾಯಗಳ ಬಗ್ಗೆಯೂ ಗಮನ ಸೆಳೆದಿದ್ದಾರೆ.

ಜಾಗತಿಕ ದಕ್ಷಿಣ ದೇಶಗಳಲ್ಲಿ ಡಿಜಿಟಲ್‌ ಮೂಲಸೌಕರ್ಯ ನಿರ್ಮಾಣಕ್ಕಾಗಿ, ನಾನು ಸಾಮಾಜಿಕ ಪರಿಣಾಮ ನಿಧಿ ಸ್ಥಾಪಿಸಬೇಕೆಂದು ಬಯಸುತ್ತೇನೆ. ಭಾರತದ ಪರವಾಗಿ ಪ್ರಾಥಮಿಕ ನಿಧಿಯಾಗಿ 25 ಮಿಲಿಯನ್‌ ಡಾಲರ್‌ ನೀಡಲಾಗುತ್ತದೆ. ನೀವೆಲ್ಲರೂ ಇದರಲ್ಲಿ ಪಾಲ್ಗೊಳ್ಳುತ್ತೀರೆಂಬ ಭರವಸೆಯಿದೆ ಎಂದು ಮೋದಿ ಹೇಳಿದ್ದಾರೆ. ಕೃತಕ ಬುದ್ಧಿಮತ್ತೆಯ ಅಪಾಯದ ಬಗ್ಗೆ ಮಾತನಾಡಿದ ಅವರು, ಕೃತಕ ಬುದ್ಧಿಮತ್ತೆಯನ್ನು ಋಣಾತ್ಮಕವಾಗಿ ಬಳಸಿಕೊಳ್ಳುತ್ತಿರುವ ಬಗ್ಗೆ ಇಡೀ ಜಗತ್ತಿನಲ್ಲಿ ಆತಂಕ ಶುರುವಾಗಿದೆ.

ಜಾಗತಿಕವಾಗಿ ಎಐಗಾಗಿ ನಿಯಮಾವಳಿ ರೂಪಿಸಬೇಕೆಂದು ಭಾರತ ಸ್ಪಷ್ಟವಾಗಿ ಹೇಳುತ್ತದೆ. ಡೀಪ್‌ಫೇಕ್‌ನ ಗಂಭೀರತೆಯನ್ನು ಅರ್ಥ ಮಾಡಿಕೊಳ್ಳುವುದು ಅಗತ್ಯವಾಗಿದೆ. ಇದು ಸಮಾಜಕ್ಕೆ, ವ್ಯಕ್ತಿಗಳಿಗೆ ಎಷ್ಟು ಅಪಾಯಕಾರಿ ಎಂದು ಅರಿಯಬೇಕಿದೆ. ಇದೇ ಹಿನ್ನೆಲೆಯಲ್ಲಿ ಜಾಗತಿಕ ಕೃತಕ ಬುದ್ಧಿಮತ್ತೆ (ಎಐ) ಶೃಂಗ ಮುಂದಿನ ತಿಂಗಳು ಭಾರತದಲ್ಲಿ ನಡೆಯಲಿದೆ. ಇದಕ್ಕೆ ನೀವೆಲ್ಲ ಸಹಕರಿಸುತ್ತೀರೆಂಬ ಭರವಸೆಯಿದೆ ಎಂದು ಮೋದಿ ಹೇಳಿದ್ದಾರೆ.