Kollywood: 18 ವರ್ಷದ ಬಳಿಕ ಒಂದೇ ದಿನ ರಜಿನಿಕಾಂತ್ – ಕಮಲ್‌ ಹಾಸನ್‌ ಸಿನಿಮಾ ರಿಲೀಸ್

Team Udayavani, Nov 30, 2023, 12:03 PM IST

ಚೆನ್ನೈ: ಕಾಲಿವುಡ್‌ ಸಿನಿರಂಗದ ಸೂಪರ್‌ ಸ್ಟಾರ್‌ ಗಳಾದ ರಜಿನಿಕಾಂತ್‌ ಹಾಗೂ ಕಮಲ್‌ ಹಾಸನ್‌ ಅವರ ಬಗ್ಗೆ ಹೆಚ್ಚಿನ ಪರಿಚಯವೇ ಬೇಕಾಗಿಲ್ಲ. ಇಬ್ಬರು ಅಪಾರ ಅಭಿಮಾನಿಗಳ ಹೃದಯದಲ್ಲಿ‌ ಮನರಂಜನೆಯ ಮೂಲಕ ಪ್ರೀತಿ ಸಂಪಾದಿಸಿದವರು.

ಕಾಲಿವುಡ್‌ ಸಿನಿಮಾದಲ್ಲಿ ಮಾತ್ರವಲ್ಲದೆ ಭಾರತೀಯ ಸಿನಿಮಾ ಕ್ಷೇತ್ರದಲ್ಲಿ ಕಮಲ್‌ – ರಜಿನಿ ಮಾಡಿರುವ ಒಂದೊಂದು ಸಿನಿಮಾಗಳು ದಾಖಲೆಗಳನ್ನು ಬರೆದಿವೆ. ಬಾಕ್ಸ್‌ ಆಫೀಸ್‌ ಗಳಿಕೆಯಲ್ಲಿ ರಜಿನಿಕಾಂತ್‌ ಹಾಗೂ ಕಮಲ್‌ ಹಾಸನ್‌ ಸಮಾನವಾಗಿ ಹಿಟ್‌ ಕೊಟ್ಟವರು. ರಜಿನಿಕಾಂತ್‌ – ಕಮಲ್‌ ಹಾಸನ್‌ ಸಿನಿಮಾಗಳು ಒಂದೇ ದಿನ ರಿಲೀಸ್‌ ಆಗುವುದು ಹೊಸದಲ್ಲ. ಈ ಹಿಂದೆ ಇಬ್ಬರ ಸಿನಿಮಾಗಳು ಒಂದೇ ದಿನ ರಿಲೀಸ್ ಆಗಿದ್ದವು.

ಇದೀಗ 18 ವರ್ಷದ ಬಳಿಕ ಕಮಲ್‌ ಹಾಸನ್‌ ಹಾಗೂ ರಜಿನಿಕಾಂತ್‌ ಸಿನಿಮಾಗಳು ಮತ್ತೆ ರಿಲೀಸ್‌ ಆಗಲಿದೆ. ಆದರೆ ಈ ಬಾರಿ ಹೊಸ ಸಿನಿಮಾವಲ್ಲ‌ ಬದಲಾಗಿ ಹಳೆ ಸಿನಿಮಾಗಳೇ ರೀ – ರಿಲೀಸ್‌ ಆಗಲಿದೆ.

2001‌ರಲ್ಲಿ ಬಂದ ಕಮಲ್‌ ಹಾಸನ್ ಅವರ ʼಆಳವಂದನ್ʼ, 1995 ರಲ್ಲಿ ಬಂದ ರಜನಿಕಾಂತ್ ಅವರ ʼಮುತ್ತುʼ ಸಿನಿಮಾಗಳು ದೊಡ್ಡ ಪರದೆಯಲ್ಲಿ ಮತ್ತೆ ರೀ ರಿಲೀಸ್‌ ಆಗುತ್ತಿದೆ. ಅದು ಕೂಡ ಒಂದೇ ದಿನ.!

ಡಿಸೆಂಬರ್‌ 8 ರಂದು ರಜಿನಿ ಹಾಗೂ ಕಮಲ್‌ ಅವರ ಈ ಎರಡು ಸಿನಿಮಾಗಳು ರೀ – ರಿಲೀಸ್‌ ಆಗಲಿದೆ ಎಂದು ವರದಿಯಾಗಿದೆ.

ಈ ಹಿಂದೆ 2005 ರಲ್ಲಿ ರಜಿನಿಕಾಂತ್ ‌ʼಚಂದ್ರಮುಖಿʼ ಸಿನಿಮಾ ರಿಲೀಸ್‌ ವೇಳೆ ಕಮಲ್‌ ಹಾಸನ್ ಅವರ ʼಮುಂಬಯಿ ಎಕ್ಸ್‌ ಪ್ರೆಸ್‌ʼ ಸಿನಿಮಾ ಜೊತೆಯಾಗಿ ರಿಲೀಸ್‌ ಆಗಿತ್ತು.

ಕೆ ಎಸ್ ರವಿಕುಮಾರ್ ನಿರ್ದೇಶನದಲ್ಲಿ ಬಂದಿದ್ದ  ʼಮುತ್ತುʼ ಸಿನಿಮಾದಲ್ಲಿ ರಜಿನಿಕಾಂತ್ ,ಮೀನಾ, ಶರತ್ ಬಾಬು, ರಾಧಾ ರವಿ, ಸೆಂಥಿಲ್, ವಡಿವೇಲು, ಪೊನ್ನಂಬಲಂ ಮುಂತಾದವರು ನಟಿಸಿದ್ದರು.

ʼಆಳವಂದನ್ʼ ಸೈಕಲಾಜಿಕಲ್‌ ಆಕ್ಷನ್‌ ಸಿನಿಮಾವಾಗಿದ್ದು,ಸುರೇಶ್ ಕ್ರಿಸ್ನಾ ನಿರ್ದೇಶಿಸಿದ್ದಾರೆ. ಈ ಚಿತ್ರದಲ್ಲಿ ಕಮಲ್ ಹಾಸನ್ ದ್ವಿಪಾತ್ರದಲ್ಲಿ ಕಾಣಿಸಿಕೊಂಡಿದ್ದಾರೆ. ರವೀನಾ ಟಂಡನ್, ಮನಿಶಾ ಕೊಯಿರಾಲ, ಶರತ್ ಬಾಬು, ರಿಯಾಜ್ ಖಾನ್, ಅನು ಹಾಸನ್ ಮತ್ತು ನಟಿಸಿದ್ದರು.