Arunachal Pradesh: “ಕ್ವಾಕ್‌ ಕ್ವಾಕ್‌” ಎನ್ನುವ ಕಪ್ಪೆಗಳು ಪತ್ತೆ

Team Udayavani, Dec 9, 2023, 11:51 PM IST

ಹೊಸದಿಲ್ಲಿ: ಇಷ್ಟು ವರ್ಷಗಳು ನಾವು ಬಾತುಕೋಳಿಗಳು ಮಾತ್ರ “ಕ್ವಾಕ್‌ ಕ್ವಾಕ್‌” ಎಂದು ಶಬ್ದ ಮಾಡುತ್ತವೆ ಎಂದು ತಿಳಿದಿದ್ದೆವು. ಆದರೆ ನೂತನ ಸಂಶೋಧನೆಯೊಂದರ ಪ್ರಕಾರ, ಕೆಲವು ಜಾತಿಯ ಕಪ್ಪೆಗಳು ಸಹ “ಕ್ವಾಕ್‌ ಕ್ವಾಕ್‌” ಎಂದು ಶಬ್ದ ಮಾಡುತ್ತವೆ ಎಂಬುದು ಬಹಿರಂಗವಾಗಿದೆ.

ಅರುಣಾಚಲ ಪ್ರದೇಶದ ನಾಮದಾಫ‌ ಹುಲಿ ಸಂರಕ್ಷಿತ ಪ್ರದೇಶದಲ್ಲಿ ಹೊಸ ಜಾತಿಯ ಕಪ್ಪೆಗಳನ್ನು ಬ್ರಿಟನ್‌ ಮೂಲದ ವಾಲ್ವಹ್ಯಾಂಪ್ಟನ್‌ ವಿಶ್ವವಿದ್ಯಾಲಯ ಹಾಗೂ ಭಾರತೀಯ ವನ್ಯಜೀವಿ ಸಂಸ್ಥೆಯ ವಿಜ್ಞಾನಿಗಳು ಪತ್ತೆಹಚ್ಚಿದ್ದಾರೆ. ನೋವಾ-ದಿಹಿಂಗ್‌ ನದಿ ಸಮೀಪ ಪತ್ತೆ ಆಗಿರುವ ಈ ಕಪ್ಪೆಗಳಿಗೆ “ಮ್ಯೂಸಿಕ್‌ ಫ್ರಾಗ್ಸ್‌” ಎಂದು ವಿಜ್ಞಾನಿಗಳು ನಾಮಕರಣ ಮಾಡಿದ್ದಾರೆ. ಇವು “ಕ್ವಾಕ್‌ ಕ್ವಾಕ್‌” ಎಂದು ಶಬ್ದ ಮಾಡುತ್ತವೆ. ಸುಮಾರು ಆರು ಸೆಂಟಿಮೀಟರ್‌ಗಳಷ್ಟು ಬೆಳೆಯುವ ಈ ಕಪ್ಪೆಗಳು, ದೇಹದ ಮಧ್ಯದಲ್ಲಿ ಮಸುಕಾದ, ಕೆನೆ ಬಣ್ಣದ ರೇಖೆಯನ್ನು ಹೊಂದಿವೆ ಎಂದು ವಿಜ್ಞಾನಿಗಳು ಮಾಹಿತಿ ನೀಡಿದ್ದಾರೆ.