‘Salaar’ ಸಿನಿಮಾದಲ್ಲಿ ಯಶ್‌ ವಿಶೇಷ ಪಾತ್ರದಲ್ಲಿ ಇರುವುದು.. ಸ್ಪಷ್ಟನೆ ಕೊಟ್ಟ ನಿರ್ಮಾಪಕ

Team Udayavani, Dec 14, 2023, 11:59 AM IST

ಹೈದರಾಬಾದ್: ಪ್ಯಾನ್‌ ಇಂಡಿಯಾ ʼಸಲಾರ್‌ʼ ಸಿನಿಮಾ ರಿಲೀಸ್‌ ಗೆ ಕೆಲ ದಿನಗಳು ಮಾತ್ರ ಬಾಕಿ ಉಳಿದಿದೆ. ರಿಲೀಸ್‌ ಡೇಟ್‌ ಹತ್ತಿರವಾಗುತ್ತಿದ್ದಂತೆ ಸಿನಮಾದ ಬಗೆಗಿನ ಹೈಪ್‌ ಮತ್ತಷ್ಟು ಹೆಚ್ಚುತ್ತಿದೆ.

ʼಕೆಜಿಎಫ್‌ -2ʼ ಬಳಿಕ ನಿರ್ದೇಶಕ ಪ್ರಶಾಂತ್‌ ನೀಲ್ ʼಸಲಾರ್‌ʼ ಸಿನಿಮಾ ಮಾಡಿದ್ದು, ʼಕೆಜಿಎಫ್‌ʼ ನಷ್ಟೇ ನಿರೀಕ್ಷೆ ʼಸಲಾರ್‌ʼ ಮೇಲಿದೆ. ಇತ್ತೀಚೆಗ ಸಿನಿಮಾದ ಟ್ರೇಲರ್‌ ರಿಲೀಸ್‌ ಆಗಿದೆ. ಪ್ರಭಾಸ್‌ , ಪೃಥ್ವಿರಾಜ್‌ ಸುಕುಮಾರನ್‌ ಅವರ ಪಾತ್ರ ಗಮನ ಸೆಳೆದಿದೆ. ಇಬ್ಬರು ಸ್ನೇಹಿತರ ನಡುವಿನ ಕಥೆ ಎಂದು ನಿರ್ದೇಶಕ ಪ್ರಶಾಂತ್‌ ನೀಲ್‌ ಈ ಹಿಂದೆ ಹೇಳಿದ್ದರು.

ಸಿನಿಮಾದ ಪ್ರಚಾರದೊಂದಿಗೆ ಕಳೆದ ಕೆಲ ದಿನಗಳಿಂದ ರಾಕಿಂಗ್‌ ಸ್ಟಾರ್‌ ಯಶ್‌ ʼಸಲಾರ್‌ʼ ಸಿನಿಮಾದಲ್ಲಿ ಇರಲಿದ್ದಾರೆ ಎನ್ನುವ ಸುದ್ದಿಯೊಂದು  ಹರಿದಾಡುತ್ತಿದೆ. ಇದಕ್ಕೆ ಕಾರಣ ಯುವ ಗಾಯಕಿಯೊಬ್ಬಳ ಹೇಳಿಕೆ.

ವದಂತಿ ಹಬ್ಬಿತ್ತು ಹೇಗೆ? : 

ಯುವ ಗಾಯಕಿ ತೀರ್ಥ ಸುಭಾಷ್ ಇತ್ತೀಚೆಗೆ ಕೇರಳದಲ್ಲಿ ನಡೆದ ಗಾಯನ ಸ್ಪರ್ಧೆಯಲ್ಲಿ ವಿಜೇತರಾದ ಬಳಿಕ ಮಾಧ್ಯಮದವರೊಂದಿಗೆ ಮಾತನಾಡಿದ್ದರು. ಈ ವೇಳೆ ಅವರ ಬಳಿ ಹಿನ್ನೆಲೆ ಗಾಯನ ವೃತ್ತಿಜೀವನದ ಬಗ್ಗೆ ಕೇಳಿದಾಗ,” ಪ್ರಭಾಸ್ ಅಂಕಲ್, ಯಶ್ ಅಂಕಲ್ ಮತ್ತು ಪೃಥ್ವಿರಾಜ್ ಅಂಕಲ್ ಅಭಿನಯದ ʼʼಸಲಾರ್ʼʼ ಸಿನಿಮಾದ ಮೂರು ಭಾಷೆಯಲ್ಲಿ ಹಾಡುವ ಅವಕಾಶ ನನಗೆ ಸಿಕ್ಕಿತ್ತು” ಎಂದು ತೀರ್ಥ ಸುಭಾಷ್‌ ಹೇಳಿದ್ದರು.

ಇದಾದ ನಂತರ ಯಶ್‌ ʼಸಲಾರ್‌ʼ ನಲ್ಲಿ ವಿಶೇಷ ಪಾತ್ರದಲ್ಲಿ ಇರಲಿದ್ದಾರೆ ಎನ್ನುವ ಸುದ್ದಿ ಸಿನಿವಲಯದಲ್ಲಿ ಹಬ್ಬಿತ್ತು.

ಈ ಬಗ್ಗೆ ʼಇಂಡಿಯಾ ಟುಡೇʼ ಜೊತೆ ಹೊಂಬಾಳೆ ಫಿಲ್ಮ್ಸ್‌ ನ ವಿಜಯ್ ಕಿರಗಂದೂರು ಅವರು ಮಾತನಾಡಿ ಸ್ಪಷ್ಟನೆ ನೀಡಿದ್ದಾರೆ. “ನನ್ನ ಪ್ರಕಾರ ನಿರ್ದೇಶಕ ಪ್ರಶಾಂತ್ ಅವರು ಈಗಾಗಲೇ [ಕೆಜಿಎಫ್ ಮತ್ತು ಸಲಾರ್ ನಡುವೆ] ಯಾವುದೇ ಲಿಂಕ್ ಇಲ್ಲ ಎಂದು ಸ್ಪಷ್ಟಪಡಿಸಿದ್ದಾರೆ. ಚಿತ್ರದಲ್ಲಿ ಯಶ್‌ ಅವರ ಯಾವುದೇ ಅತಿಥಿ ಪಾತ್ರವಿಲ್ಲ. ಆದ್ದರಿಂದ ಅದು ನಿಜವಲ್ಲ. ” ಎಂದು ಹೇಳಿದ್ದಾರೆ.

ʼಸಲಾರ್‌ʼ ಸಿನಿಮಾಕ್ಕೆ ಸೆನ್ಸಾರ್‌ ಬೋರ್ಡ್‌ ʼಎʼ ಸರ್ಟಿಫಿಕೇಟ್‌ ನೀಡಿದೆ. ಯುಎಇ ಹಾಗೂ ಅಂತರಾಷ್ಟ್ರೀಯ ಮಾರುಕಟ್ಟೆಯಲ್ಲಿ ʼಸಲಾರ್‌ʼ ಅಡ್ವಾನ್ಸ್‌ ಬುಕ್ಕಿಂಗ್‌ಗೆ ಹೆಚ್ಚಿನ ಬೇಡಿಕೆಯಿದೆ.

ಇದೇ ಡಿ.22 ರಂದು ʼಸಲಾರ್‌ʼ ವರ್ಲ್ಡ್‌ ವೈಡ್‌ ಸಿನಿಮಾ ತೆರೆ ಕಾಣಲಿದೆ.