Pro Kabaddi; ಇಂದಿನಿಂದ ಪುಣೆಯಲ್ಲಿ ಹೋರಾಟ: ಯು ಮುಂಬಾಗೆ ಪಾಟ್ನಾ ಸವಾಲು

Team Udayavani, Dec 15, 2023, 5:15 AM IST

ಪುಣೆ: ಪ್ರೊ ಕಬಡ್ಡಿ 10ನೇ ಋತುವಿನ ಪುಣೆ ಚರಣದ ಪಂದ್ಯಗಳು ಶುಕ್ರವಾರದಿಂದ ಪುಣೆಯ
ಬಾಳೇವಾಡಿ ಕ್ರೀಡಾ ಸಂಕೀರ್ಣದ ಬ್ಯಾಡ್ಮಿಂಟನ್‌ ಹಾಲ್‌ನಲ್ಲಿ ನಡೆಯಲಿದೆ. ಶುಕ್ರವಾರ ಎರಡು ಪಂದ್ಯಗಳು ನಡೆಯಲಿವೆ. 8 ಗಂಟೆಗೆ ನಡೆಯುವ ಮೊದಲ ಪಂದ್ಯದಲ್ಲಿ ಯು ಮುಂಬಾ ತಂಡವು ಪಾಟ್ನಾ ಪೈರೇಟ್ಸ್‌ ತಂಡವನ್ನು ಎದುರಿಸಲಿದ್ದರೆ 9 ಗಂಟೆಗೆ ನಡೆಯುವ ದ್ವಿತೀಯ ಪಂದ್ಯದಲ್ಲಿ ಪುನೇರಿ ಪಲ್ಟಾನ್ಸ್‌ ಮತ್ತು ಹರಿಯಾಣ ಸ್ಟೀಲರ್ ಹೋರಾಡಲಿದೆ.

ಅಹ್ಮದಾಬಾದ್‌ ಮತ್ತು ಬೆಂಗಳೂರು ಚರಣದ ಪಂದ್ಯಗಳು ಈಗಾಗಲೇ ಮುಗಿದಿದೆ. ಈ ಬಾರಿ ಆಯಾಯ ತಂಡಗಳ ತವರಿನಲ್ಲಿಯೂ ಪಂದ್ಯಗಳು ನಡೆಯಲಿವೆ. ಹಾಗಾಗಿ ಪ್ರತಿಯೊಂದು ತಂಡವು ತವರಿನ ಅಭಿಮಾನಿಗಳ ಪ್ರೋತ್ಸಾಹದಿಂದ ಆಡುವ ಅವಕಾಶ ಪಡೆದಿದೆ. ಬೆಂಗಳೂರು ಚರಣದ ವೇಳೆ ಆತಿಥೇಯ ಬೆಂಗಳೂರು ಬುಲ್ಸ್‌ ಸಾಧಾರಣ ನಿರ್ವಹಣೆ ನೀಡಿದೆ. ಈ ಚರಣದ ಅಂತಿಮ ದಿನವಾದ ಬುಧವಾರ ಬೆಂಗಳೂರು ಬುಲ್ಸ್‌ ಜೈಪುರ ವಿರುದ್ಧ ಕಷ್ಟಪಟ್ಟು ಗೆದ್ದು ಸಮಾಧಾನಪಟ್ಟುಕೊಂಡಿದೆ.

ಸದ್ಯದ ಅಂಕಪಟ್ಟಿಯಲ್ಲಿ ಬೆಂಗಾಲ್‌ ವಾರಿಯರ್ ಅಗ್ರಸ್ಥಾನದಲ್ಲಿದೆ. ಆಡಿದ ನಾಲ್ಕು ಪಂದ್ಯಗಳಲ್ಲಿ ಮೂರು ಪಂದ್ಯಗಳಲ್ಲಿ ಗೆದ್ದಿರುವ ಬೆಂಗಾಲ್‌ ಒಟ್ಟು 18 ಅಂಕ ಗಳಿಸಿದೆ. ಗುಜರಾತ್‌ ಜೈಂಟ್ಸ್‌ 5 ಪಂದ್ಯ ಆಡಿದ್ದು ಮೂರು ಪಂದ್ಯಗಳಲ್ಲಿ ಗೆದ್ದು 17 ಅಂಕ ಪಡೆದು ದ್ವಿತೀಯ ಸ್ಥಾನದಲ್ಲಿದೆ.

1. ಮುಂಬಾ-ಪಾಟ್ನಾ
 ಆರಂಭ: ರಾತ್ರಿ 8.00

2. ಪುನೇರಿ-ಹರಿಯಾಣ
ಆರಂಭ: ರಾತ್ರಿ 9.00
ಪ್ರಸಾರ: ಸ್ಟಾರ್‌ ಸ್ಪೋರ್ಟ್ಸ್