ಸ್ಟಾರ್‌ಗಳು ಒಂದಲ್ಲ 20 ಫ್ಲಾಪ್‌ ಕೊಟ್ಟರೂ ಸ್ಟಾರ್‌ಗಳೇ.. ಪ್ರಭಾಸ್‌ ಸೋಲಿನ ಬಗ್ಗೆ ನೀಲ್‌

Team Udayavani, Dec 20, 2023, 3:25 PM IST

ಹೈದರಾಬಾದ್: ʼಸಲಾರ್‌ʼ ಸಿನಿಮಾ ರಿಲೀಸ್‌ ಕ್ಷಣಗಣನೆ ಆರಂಭವಾಗಿದೆ. ಸಿನಿಮಾದ ಪ್ರಚಾರವೂ ಅಬ್ಬರದಿಂದ ಸಾಗುತ್ತಿದೆ. ಸಂದರ್ಶನದ ಮೂಲಕವೂ ಸಿನಿಮಾ ತಂಡ ಪ್ರೇಕ್ಷಕರನ್ನು ಥಿಯೇಟರ್‌ ನತ್ತ ಸೆಳೆಯುವ ಹಂತಕ್ಕೆ ಮುಂದಾಗಿದೆ.

ಪ್ರಭಾಸ್‌ ಅವರಿಗೆ ʼಸಲಾರ್‌ʼದೊಡ್ಡ ಹಿಟ್‌ ನೀಡುವ ಸಾಧ್ಯತೆಯಿದೆ. ಈ ಹಿಂದಿನ ಅವರ ʼರಾಧೆ ಶ್ಯಾಮ್‌ʼ, ʼಆದಿಪುರುಷ್‌ʼ ಸಿನಿಮಾಗಳ ಸೋಲಿನಿಂದ ʼಬಾಹುಬಲಿʼ ನಟನ ಫ್ಯಾನ್ಸ್‌ ಗಳು ನಿರಾಶರಾಗಿದ್ದಾರೆ. ಪ್ರಭಾಸ್‌ ಕೂಡ ಒಂದು ದೊಡ್ಡ ಹಿಟ್‌ ಮೂಲಕ ಮತ್ತೆ ಗೆಲುವಿನ ಟ್ರ್ಯಾಕ್‌ ಗೆ ಮರಳುವ ನಿರೀಕ್ಷೆಯಲ್ಲಿದ್ದಾರೆ.

ಪ್ರಭಾಸ್‌ ಅವರ ಸೋಲು ಹಾಗೂ ʼಸಲಾರ್‌ʼ ಸಿನಿಮಾದ ಬಗ್ಗೆ ನಿರ್ದೇಶಕ ಪ್ರಶಾಂತ್‌ ನೀಲ್‌ ಸಂದರ್ಶನದಲ್ಲಿ ಮಾತನಾಡಿದ್ದಾರೆ. ಪ್ರಚಾರದ ಅಂಗವಾಗಿ ಇತ್ತೀಚೆಗೆ ರಾಜಮೌಳಿ ಅವರು ʼಸಲಾರ್‌ʼ ತಂಡದ ಸಂದರ್ಶನವನ್ನು ನಡೆಸಿದ್ದಾರೆ. ಈ ವೇಳೆ ಅವರು ʼಸಲಾರ್‌ʼ ಬಗ್ಗೆ ಅನೇಕ ವಿಚಾರದ ಬಗ್ಗೆ ಮಾತನಾಡಿದ್ದಾರೆ.

“ಸ್ಟಾರ್‌ ಗಳು ಯಾವತ್ತಿದ್ದರೂ ಸ್ಟಾರ್‌ ಗಳೇ. ಅವರು 1 ಫ್ಲಾಪ್‌ ಅಥವಾ 20 ಫ್ಲಾಪ್‌ ಗಳನ್ನು ಬೇಕಾದರೂ ನೀಡಲಿ ಅವರು ಯಾವಾಗಲೂ ಸ್ಟಾರ್‌ ಆಗಿಯೇ ಇರುತ್ತಾರೆ. ಅವರು ಜಸ್ಟ್‌ ಒಂದು ಹಿಟ್‌ ಕೊಟ್ಟರೆ ಸಾಕು. ಇತ್ತೀಚೆಗೆ ಶಾರುಖ್ ಖಾನ್ ನಮಗೆ ಸ್ಟಾರ್ ಯಾವಾಗಲೂ ಸ್ಟಾರ್ ಎನ್ನುವುದನ್ನು ತೋರಿಸಿದರು” ಎಂದು ಹೇಳಿದ್ದಾರೆ.

ʼʼಸಲಾರ್‌ ಸಿನಿಮಾಕ್ಕೆ ʼಎʼ ಸರ್ಟಿಫಿಕೇಟ್‌ ನೀಡಲಾಗಿದೆ. ಈ ಬಗ್ಗೆ ಮಾತನಾಡಿರುವ ಅವರು, “ಈ ವಿಚಾರದ ಬಗ್ಗೆ ನನಗೆ ತುಂಬಾ ಬೇಸರವಿದೆ. ನಾನು ಅಶ್ಲೀಲ ಸಿನಿಮಾವನ್ನಾಗಲಿ, ಹಿಂಸೆಯ ಸಿನಿಮಾವನ್ನಾಗಲಿ ಮಾಡಿಲ್ಲ ಅಂತ ನನಗೆ ಗೊತ್ತು. ಸಿನಿಮಾದಲ್ಲಿರುವುದೆಲ್ಲ ಅಗತ್ಯದ ಹಿಂಸೆ. ಸೆನ್ಸಾರ್ ಮಂಡಳಿಯು ಚಿತ್ರದಲ್ಲಿ ಕೆಲವು ಕಡಿತಗಳನ್ನು ಮಾಡಲು ಕೇಳಿತ್ತು. ಆದರೆ ಇದು ಚಿತ್ರದ ವೀಕ್ಷಣೆಯ ಅನುಭವವನ್ನು ಬದಲಾಯಿಸಬಹುದೆನ್ನುವ ಕಾರಣಕ್ಕೆ ಅದನ್ನು ಕಡಿತಗೊಳಿಸದಿರಲು ನಿರ್ಧರಿಸಿದೆ” ಎಂದು ಹೇಳಿದರು.

ʼಸಲಾರ್‌ʼ ಇಬ್ಬರು ಸ್ನೇಹಿತರು, ಅವರ ಭಾವನೆಗಳು ಮತ್ತು ಅವರ ಬಂಧಗಳ ಸುತ್ತ ಸುತ್ತುತ್ತದೆ. ತಮ್ಮ ಉದ್ದೇಶ ಎಂದಿಗೂ ಹಿಂಸಾತ್ಮಕ ಸಿನಿಮಾ ಮಾಡುವುದಲ್ಲ ಬದಲಾಗಿ ಹಿಂಸಾತ್ಮಕ ಜಗತ್ತಿನಲ್ಲಿ ನಾಟಕೀಯ ಸಿನಿಮಾ ಮಾಡುವುದಾಗಿದೆ ಎಂದು ತಿಳಿಸಿದರು.‌

ಡಿ.22 ರಂದು ʼಸಲಾರ್‌ʼ ವರ್ಲ್ಡ್‌ ವೈಡ್‌ ತೆರೆ ಕಾಣಲಿದೆ.