MPhil ನೋಂದಣಿ ಬೇಡ-ಪದವಿಯನ್ನು ಸ್ಥಗಿತವಿದ್ದರೂ ಕೆಲವು ವಿ.ವಿ. ಅರ್ಜಿ ಆಹ್ವಾನ: UGC ಕಳವಳ

Team Udayavani, Dec 28, 2023, 12:25 AM IST

ಹೊಸದಿಲ್ಲಿ: ದೇಶದ ಕೆಲವು ವಿಶ್ವವಿದ್ಯಾನಿಲಯಗಳು ಎಂಫಿಲ್‌ ಕೋರ್ಸ್‌ಗಳಿಗೆ ಅರ್ಜಿ ಆಹ್ವಾನಿಸುತ್ತಿರುವುದರ ಬಗ್ಗೆ ವಿಶ್ವವಿದ್ಯಾನಿಲಯಗಳ ಧನಸಹಾಯ ಆಯೋಗ (ಯುಜಿಸಿ) ಕಳವಳ ವ್ಯಕ್ತಪಡಿಸಿದೆ. ಅಲ್ಲದೆ ಎಂಫಿಲ್‌ (ಮಾಸ್ಟರ್ ಆಫ್ ಫಿಲಾಸಫಿ ) ಮಾನ್ಯತೆ ಪಡೆದಿರುವ ಪದವಿ ಅಲ್ಲ, ಹೀಗಾಗಿ ಅದಕ್ಕೆ ನೋಂದಣಿ ಮಾಡಿಸಿಕೊಳ್ಳಬೇಡಿ ಎಂದು ಅರ್ಜಿ ಸಲ್ಲಿಸುತ್ತಿರುವ ವಿದ್ಯಾರ್ಥಿಗಳಿಗೆ ಎಚ್ಚರಿಕೆ ನೀಡಿದೆ.

ಯುಜಿಸಿ ನಿಯಮಾವಳಿ 2022ರ ಅನ್ವಯ -ನಿಯಮಾ ವಳಿ ಸಂಖ್ಯೆ 14ರಲ್ಲಿ (ಪಿಎಚ್‌ಡಿ ಪದವಿ ಸಂಬಂಧಿಸಿದ ಮಾನ ದಂಡ ಮತ್ತು ಕಾರ್ಯ ವಿಧಾನ) 2023-24ನೇ ಶೈಕ್ಷಣಿಕ ವರ್ಷ ಗಳಿಗೆ ಯಾವುದೇ ಉನ್ನತ ಶಿಕ್ಷಣ ಸಂಸ್ಥೆಗಳು ಎಂಫಿಲ್‌ ಪದವಿ ಗಳನ್ನು ನೀಡುವಂತಿಲ್ಲ ಎಂದು ಸ್ಪಷ್ಟವಾಗಿ ಹೇಳಲಾಗಿದೆ. ಈ ಹಿನ್ನೆಲೆಯಲ್ಲಿ ವಿದ್ಯಾರ್ಥಿಗಳು ಎಂಫಿಲ್‌ ಕೋರ್ಸ್‌ಗೆ ಪ್ರವೇಶ ಪಡೆಯಬಾರದು ಹಾಗೂ ಈ ಕೋರ್ಸ್‌ಗೆ ಸಂಬಂಧಿಸಿದ ಪ್ರವೇಶಗಳನ್ನು ತಡೆಯಲು ವಿ.ವಿ.ಗಳು ತತ್‌ಕ್ಷಣ ಕ್ರಮ ಕೈಗೊಳ್ಳಬೇಕು ಎಂದು ಯುಜಿಸಿ ಕಾರ್ಯದರ್ಶಿ ಮನೀಶ್‌ ಜೋಶಿ ಹೇಳಿದ್ದಾರೆ.
2022ರ ನವೆಂಬರ್‌ನಲ್ಲೇ ಯುಜಿಸಿ, ಎಂಫಿಎಲ್‌ ಪದವಿ ಗಳನ್ನು ರದ್ದು ಮಾಡಿತ್ತು. ಆದ್ದರಿಂದ ವಿ.ವಿ.ಗಳೂ ವಿದ್ಯಾರ್ಥಿ ಗಳ ಪ್ರವೇಶಾತಿಯನ್ನು ತತ್‌ಕ್ಷಣ ತಡೆಯಬೇಕು, ವಿದ್ಯಾರ್ಥಿ ಗಳು ಪ್ರವೇಶ ಪಡೆಯಬಾರದೆಂದು ಎಚ್ಚರಿಕೆ ನೀಡಿದೆ.

ಹಿಂದಿನ ಪ್ರವೇಶಾತಿಗೆ ತೊಂದರೆಯಿಲ್ಲ
2022ರ ನವೆಂಬರ್‌ಗಿಂತ ಮುನ್ನ ಎಂಫಿಎಲ್‌ಗೆ ನೋಂದಣಿ ಮಾಡಿಕೊಂಡಿದ್ದರೆ ಆ ವಿದ್ಯಾರ್ಥಿಗಳು ಅಧ್ಯಯನ ಮುಂದುವರಿಸಬಹುದು, ಪದವಿ ಪಡೆಯಬಹುದು, ಅದಕ್ಕೆ ಸಮಸ್ಯೆಯಿಲ್ಲ ಎಂದು ಯುಜಿಸಿ ಹೇಳಿದೆ.

ಕೆಲವು ವಿಶ್ವ ವಿದ್ಯಾ ಲಯಗಳು ಎಂಫಿಎಲ್‌ಗೆ ಹೊಸದಾಗಿ ಅರ್ಜಿಗಳನ್ನು ಆಹ್ವಾನಿಸಿರು ವುದು ಯುಜಿಸಿ ಗಮನಕ್ಕೆ ಬಂದಿದೆ. ಈ ಹಿನ್ನೆಲೆಯಲ್ಲಿ ಎಂಫಿಎಲ್‌ ಒಂದು ಮಾನ್ಯತೆ ಹೊಂದಿರುವ ಪದವಿಯಲ್ಲ ಎನ್ನುವುದನ್ನು ಸ್ಪಷ್ಟಪಡಿಸಲಾಗುತ್ತಿದೆ. ಎಂಫಿಲ್‌ ಪದವಿಗಳಿಗೆ ಅರ್ಜಿ ಆಹ್ವಾನಿಸಬಾರ ದೆಂದು ಉನ್ನತ ಶಿಕ್ಷಣ ಸಂಸ್ಥೆಗಳಿಗೆ ಈಗಾಗಲೇ ತಿಳಿಸಲಾಗಿದೆ.
-ಮನೀಶ್‌ ಜೋಶಿ, ಯುಜಿಸಿ ಕಾರ್ಯದರ್ಶಿ