Goa: ಜ. 5 ರಿಂದ 25 ರವರೆಗೆ ಅನ್ಮೋಡ್ ಘಾಟ್ ರಸ್ತೆಯಲ್ಲಿ ಭಾರೀ ವಾಹನ ಸಂಚಾರ ನಿಷೇಧ

Team Udayavani, Jan 3, 2024, 6:01 PM IST

ಪಣಜಿ: ಜನವರಿ 5 ರಿಂದ 25 ರವರೆಗೆ ಭಾರೀ ವಾಹನಗಳಿಗೆ ಅನ್ಮೋಡ್ ಘಾಟ್ ರಸ್ತೆಯನ್ನು ಮುಚ್ಚಲಾಗಿದೆ. ರೈಲ್ವೆ ಇಲಾಖೆಯ ಡಬ್ಲಿಂಗ್ ಕಾಮಗಾರಿಗಾಗಿ ರಸ್ತೆ ಬಂದ್ ಮಾಡುವುದಾಗಿ ಜಿಲ್ಲಾಧಿಕಾರಿ ಆದೇಶ ಹೊರಡಿಸಿದ್ದಾರೆ.

ಈ ಮಾರ್ಗವಾಗಿ ಓಡಾಡುವ ವಾಹನಗಳಿಗೆ ರಾಮನಗರ, ತಿನೇಘಾಟ್, ಸಣ್ಣ ವಾಹನಗಳಿಗೆ ಮಸರ್ಂಗಲ್ ಮತ್ತು ಅನ್ಮೋಡ್, ಕಾಸರ್ಲಾಕ್, ಚಂಡೆವಾಡಿ ಜಗಲಬೆಟ್ ಮಾರ್ಗವನ್ನು ನೀಡಲಾಗಿದೆ. ಭಾರಿ ವಾಹನಗಳಿಗೆ ಅಳ್ನಾವರ-ತಾಳಾಪುರ-ಯಲ್ಲಾಪುರ ಮಾರ್ಗವಾಗಿ ಸಂಚಾರಕ್ಕೆ ಅನುವು ಮಾಡಿಕೊಡಲಾಗಿದೆ ಎಂದು ತಿಳಿಸಲಾಗಿದೆ.

ಟ್ರಾಫಿಕ್ ಜಾಮ್ ಸಮಸ್ಯೆ:– ಅನ್ಮೋಡ್‌ ಘಾಟ್ ಬೆಳಗಾವಿ ಮತ್ತು ಗೋವಾವನ್ನು ಸಂಪರ್ಕಿಸುವ ಪ್ರಮುಖ ಘಾಟ್ ಮಾರ್ಗವಾಗಿದ್ದು, ಈ ಮಾರ್ಗದಲ್ಲಿ ಪ್ರತಿದಿನ ಸಾವಿರಾರು ವಾಹನಗಳು ಸಂಚರಿಸುತ್ತವೆ. ಒಂದು ವಾರದ ಹಿಂದೆ ಟ್ರಾಲಿಯೊಂದು ಘಾಟ್‍ನಲ್ಲಿ ಭಾರಿ ಟ್ರಾಫಿಕ್ ಜಾಮ್ ಉಂಟು ಮಾಡಿತ್ತು. ಅಲ್ಲದೆ ಕೆಲ ತಿಂಗಳ ಹಿಂದೆ ಅನ್ಮೋಡ್‌ನಿಂದ ರಾಮನಗರದವರೆಗಿನ ರಾಷ್ಟ್ರೀಯ ಹೆದ್ದಾರಿ ಕಾಮಗಾರಿಗೆ ಚಾಲನೆ ನೀಡಿದ್ದರಿಂದ ವಾಹನ ಚಾಲಕರು ಈ ಮಾರ್ಗವಾಗಿ ಓಡಾಟ ನಡೆಸಲು ಕಸರತ್ತು ನಡೆಸಬೇಕಾಯಿತು.

ಪ್ರವೇಶ ಶುಲ್ಕ:-ಗೋವಾದಿಂದ ಕರ್ನಾಟಕಕ್ಕೆ ಬರುವ ವಾಹನಗಳು ಅನ್ಮೋಡ್ ಚೆಕ್ ಪೋಸ್ಟ್‍ನಲ್ಲಿ ಪ್ರವೇಶ ಶುಲ್ಕವನ್ನು ಪಾವತಿಸಬೇಕು ಮತ್ತು ಕರ್ನಾಟಕ ಅರಣ್ಯ ಇಲಾಖೆಯು ಹುಲಿ ಸಂರಕ್ಷಿತ ಪ್ರದೇಶಗಳು ಮತ್ತು ರಾಷ್ಟ್ರೀಯ ವನ್ಯಜೀವಿ ಉದ್ಯಾನವನಗಳ ಮೂಲಕ ಹಾದುಹೋಗುವ ವಾಹನಗಳಿಗೆ ಪ್ರವೇಶ ಶುಲ್ಕವನ್ನು ವಿಧಿಸಲು ಪ್ರಾರಂಭಿಸಿದೆ.