Pro Kabaddi: ಅಗ್ರಸ್ಥಾನಿ ಪುನೇರಿ ಪಲ್ಟಾನ್ಸ್‌  ಜಯಭೇರಿ

Team Udayavani, Jan 3, 2024, 11:29 PM IST

ನೋಯ್ಡಾ: ಪ್ರೊ ಕಬಡ್ಡಿ 10ನೇ ಆವೃತ್ತಿಯ ಬುಧವಾರದ ಪಂದ್ಯದಲ್ಲಿ ಅಂಕಪಟ್ಟಿಯಲ್ಲಿ ಅಗ್ರಸ್ಥಾನದಲ್ಲಿರುವ ಪುನೇರಿ ಪಲ್ಟಾನ್ಸ್‌ ತಂಡವು ಯುಪಿ ಯೋಧಾಸ್‌ ತಂಡವನ್ನು 40-31 ಅಂಕಗಳಿಂದ ಸೋಲಿಸಿದೆ. ಅಸ್ಲಾಮ್‌ ಮುಸ್ತಾಫ‌ ಮತ್ತು ಮೊಹಿತ್‌ ಗಯಾತ್‌ ಅವರ ಉತ್ತಮ ಆಟದಿಂದಾಗಿ ಪುನೇರಿ ಮೇಲುಗೈ ಸಾಧಿಸಿತು. ಯುಪಿ ಯೋಧಾಸ್‌ ಪರ ಪ್ರದೀಪ್‌ ನರ್ವಾಲ್‌ ಮತ್ತು ಗಗನ ಗೌಡ ರೈಡ್‌ನ‌ಲ್ಲಿ ಉತ್ತಮ ನಿರ್ವಹಣೆ ನೀಡಿದರೂ ತಂಡ ಗೆಲುವಿನಿಂದ ದೂರವೇ ಉಳಿಯಿತು.

ಪುನೇರಿ ಪಲ್ಟಾನ್ಸ್‌ ಆಡಿದ 9 ಪಂದ್ಯಗಳಲ್ಲಿ ಎಂಟರಲ್ಲಿ ಜಯ ಸಾಧಿಸಿದ್ದು ಒಟ್ಟು 41 ಅಂಕಗಳೊಂದಿಗೆ ಅಗ್ರಸ್ಥಾನದಲ್ಲಿ ಮುಂದುವರಿಯಿತು. ಗುಜರಾತ್‌ ದ್ವಿತೀಯ ಸ್ಥಾನದಲ್ಲಿದ್ದರೆ ಜೈಪುರ ಮೂರನೇ ಸ್ಥಾನದಲ್ಲಿದೆ.

ಜೈಪುರಕ್ಕೆ ಜಯ
ಈ ಮೊದಲು ನಡೆದ ಪಂದ್ಯದಲ್ಲಿ ಹಾಲಿ ಚಾಂಪಿಯನ್‌ ಜೈಪುರ ಪಿಂಕ್‌ ಪ್ಯಾಂಥರ್ಸ್‌ ತಂಡವು 45-34 ಅಂಕಗಳಿಂದ ಹರಿಯಾಣ ಸ್ಟೀಲರ್ಸ್‌ ತಂಡವನ್ನು ಸೋಲಿಸಿದೆ. ಜೈಪುರ ತಂಡದ ಪರ ಅರ್ಜುನ್‌ ದೇಶ್ವಾಲ್‌ (14), ರೆಜಾ ಮಿರ್‌ಬಘೇರಿ (7) ಉತ್ತಮ ದಾಳಿ ಮಾಡಿದರು. ರಕ್ಷಣೆಯಲ್ಲಿ ಅಂಕುಶ್‌ ಮಿಂಚಿದರು. ಹರಿಯಾಣ ಪರ ಚಂದ್ರನ್‌ ರಂಜಿತ್‌ (11) ದಾಳಿಯಲ್ಲಿ, ಮೋಹಿತ್‌ ನಂದಲ್‌ (5) ರಕ್ಷಣೆಯಲ್ಲಿ ಯಶಸ್ವಿ ಪ್ರದರ್ಶನ ನೀಡಿದರು.

ಗುರುವಾರ ಪ್ರೊ ಕಬಡ್ಡಿಗೆ ವಿಶ್ರಾಂತಿ ದಿನವಾಗಿದ್ದು ಶುಕ್ರವಾರದಿಂದ ಮುಂಬಯಿ ಚರಣದ ಪಂದ್ಯಗಳು ಆರಂಭವಾಗಲಿದೆ. ಶುಕ್ರವಾರ ನಡೆ ಯುವ ಪಂದ್ಯಗಳಲ್ಲಿ ಪಾಟ್ನಾ ಪೈರೇಟ್ಸ್‌ ತಂಡವು ದಬಾಂಗ್‌ ಡೆಲ್ಲಿ ತಂಡವನ್ನು ಎದುರಿಸಲಿದ್ದರೆ ದ್ವಿತೀಯ ಪಂದ್ಯದಲ್ಲಿ ಆತಿಥೇಯ ಯು ಮುಂಬಾ ತಂಡವು ಬೆಂಗಳೂರು ತಂಡವನ್ನು ಎದುರಿಸಲಿದೆ.