Online Madhuve Offline Shobana Review: ಆನ್‌ಲೈನ್‌ ಆಟದಲ್ಲಿ ಜೀವನ ಪರದಾಟ!

Team Udayavani, Jan 6, 2024, 2:31 PM IST

ಇಂದಿನ ಜಮಾನದಲ್ಲಿ ಎಲ್ಲವೂ ಆನ್‌ಲೈನ್‌ ಮಯವಾಗುತ್ತಿದೆ. ಫ‌ುಡ್‌ ಡೆಲಿವರಿ, ಸರಕು, ಸೇವೆಗಳಿಂದ ಹಿಡಿದು ಮದುವೆಯಾಗಲು ಸೂಕ್ತ ವಧು-ವರರ ಹುಡುಕಾಟದವರೆಗೆ ಎಲ್ಲದಕ್ಕೂ ಬಹುತೇಕರು ಆನ್‌ಲೈನ್‌ ಮೊರೆ ಹೋಗುತ್ತಿದ್ದಾರೆ. ಹೀಗೆ ಆನ್‌ಲೈನ್‌ನಲ್ಲೇ ಮದುವೆಯಾಗುವ ನವ ವಧು-ವರನ ಭವಿಷ್ಯ ಹೇಗಿರುತ್ತದೆ ಎಂಬುದನ್ನು ತೆರೆಮೇಲೆ ಹೇಳಿರುವ ಸಿನಿಮಾವೇ “ಆನ್‌ಲೈನ್‌ ಮದುವೆ ಆಫ್‌ಲೈನ್‌’.

ಸಿನಿಮಾದ ಹೆಸರೇ ಹೇಳುವಂತೆ, “ಆನ್‌ಲೈನ್‌ ಮದುವೆ ಆಫ್‌ಲೈನ್‌’ ಆನ್‌ಲೈನ್‌ ಆಟ ಮತ್ತದರ ಸಂಕಟಗಳ ಸುತ್ತ ನಡೆಯುವ ಕಥಾಹಂದರದ ಸಿನಿಮಾ. ಆನ್‌ಲೈನ್‌ ಆ್ಯಪ್‌ ಒಂದರಲ್ಲಿ ಪರಿಚಯವಾಗಿ ಮದುವೆಯಾಗುವ ಜೋಡಿ ಆನಂತರ ನಿಜ ಜೀವನದಲ್ಲಿ ಏನೇನು ಸಂಕಟ, ಸಮಸ್ಯೆಗಳು, ಸವಾಲುಗಳನ್ನು ಎದುರಿಸುತ್ತಾರೆ ಎಂಬುದನ್ನು ಹಾಸ್ಯಭರಿತವಾಗಿ ತೆರೆಮೇಲೆ ತೆರೆದಿಡಲಾಗಿದೆ.

ಕಿರುತೆರೆಯ ಜನಪ್ರಿಯ ಕಾಮಿಡಿ ರಿಯಾಲಿಟಿ ಶೋ ಖ್ಯಾತಿಯ ಜಗ್ಗಪ್ಪ ಮತ್ತು ಸುಶ್ಮಿತಾ “ಆನ್‌ಲೈನ್‌ ಮದುವೆ ಆಫ್‌ಲೈನ್‌’ ಸಿನಿಮಾದಲ್ಲಿ ತೆರೆಮೇಲೆ ಜೋಡಿಯಾಗಿ ಕಾಣಿಸಿಕೊಂಡಿದ್ದಾರೆ. ಆನ್‌ಲೈನ್‌ನಲ್ಲಿ ಮದುವೆಯಾಗುವ ನವ ವಧು-ವರನಾಗಿ ಇಬ್ಬರೂ ಒಂದಷ್ಟು ಕಾಮಿಡಿಯಿರುವ ಪಾತ್ರಗಳಲ್ಲಿ ಅಭಿನಯಿಸಿದ್ದಾರೆ. ಇಂದಿನ ದಿನಗಳಲ್ಲಿ ಅತಿಯಾದ ಆನ್‌ಲೈನ್‌ ಅವಲಂಬನೆಯಿಂದ ವೈಯಕ್ತಿಕ ಬದುಕು ಮತ್ತು ಸಾಂಸಾರಿಕ ಸಂಬಂಧಗಳು ಹೇಗೆಲ್ಲ ಏರುಪೇರಾಗುತ್ತದೆ ಎಂಬುದನ್ನು ಸಿನಿಮಾದಲ್ಲಿ ಮನರಂಜನಾತ್ಮಕವಾಗಿ ಹೇಳುವ ಪ್ರಯತ್ನ ಮಾಡಲಾಗಿದೆ. ಒಂದಷ್ಟು ಗಂಭೀರ ವಿಷಯಗಳನ್ನು ಇಟ್ಟುಕೊಂಡು ಪ್ರೇಕ್ಷಕರ ಮುಂದೆ ಬಂದಿರುವ “ಆನ್‌ಲೈನ್‌ ಮದುವೆ ಆಫ್ಲೈನ್‌ ಶೋಭನ’ವನ್ನು ಒಮ್ಮೆ ನೋಡಬಹುದು.

– ಜಿಎಸ್‌ಕೆ