Brisbane International Tennis: ಎಲೆನಾ ರಿಬಾಕಿನಾ ಚಾಂಪಿಯನ್‌

ಆಕ್ಲೆಂಡ್‌ ಪ್ರಶಸ್ತಿ ಉಳಿಸಿಕೊಂಡ ಕೊಕೊ ಗಾಫ್ , 6 ವರ್ಷಗಳ ಬಳಿಕ ಡಿಮಿಟ್ರೋವ್‌ಗೆ ಪ್ರಶಸ್ತಿ

Team Udayavani, Jan 8, 2024, 12:08 AM IST

ಬ್ರಿಸ್ಬೇನ್‌: ವಿಶ್ವದ ನಂ. 2 ಆಟಗಾರ್ತಿ ಅರಿನಾ ಸಬಲೆಂಕಾ ಅವರನ್ನು 6-0, 6-3 ಅಂತರ ದಿಂದ ಹಿಮ್ಮೆಟ್ಟಿಸಿದ ಎಲೆನಾ ರಿಬಾಕಿನಾ “ಬ್ರಿಸ್ಬೇನ್‌ ಇಂಟರ್‌ನ್ಯಾಶನಲ್‌’ ಟೆನಿಸ್‌ ಚಾಂಪಿಯನ್‌ ಆಗಿ ಮೂಡಿಬಂದಿದ್ದಾರೆ. ಇದರೊಂದಿಗೆ ಕಳೆದ ವರ್ಷದ ಆಸ್ಟ್ರೇಲಿಯನ್‌ ಓಪನ್‌ ಫೈನಲ್‌ ಫ‌ಲಿತಾಂಶ ಪುನರಾ ವರ್ತನೆಗೊಂಡಂತಾಯಿತು.

ರಷ್ಯಾ ಮೂಲದ ಕಜಕಸ್ಥಾನದ ಆಟಗಾರ್ತಿ ಯಾಗಿರುವ ಎಲೆನಾ ರಿಬಾಕಿನಾ ಮೊದಲ 8 ಗೇಮ್‌ಗಳನ್ನು ತಮ್ಮದಾಗಿಸಿಕೊಂಡು ಸಬಲೆಂಕಾ ವಿರುದ್ಧ ಪ್ರಭುತ್ವ ಸಾಧಿಸಿದರು. 73 ನಿಮಿಷಗಳಲ್ಲಿ ಪಂದ್ಯವನ್ನು ವಶಪಡಿಸಿಕೊಂಡರು. ಇದು ವಿಶ್ವದ 6ನೇ ರ್‍ಯಾಂಕಿಂಗ್‌ ಆಟಗಾರ್ತಿಗೆ ಒಲಿದ 6ನೇ ಡಬ್ಲ್ಯುಟಿಎ ಪ್ರಶಸ್ತಿ. ಇದರೊಂದಿಗೆ ವರ್ಷಾರಂಭದ ಆಸ್ಟ್ರೇಲಿಯನ್‌ ಓಪನ್‌ ಗ್ರ್ಯಾನ್‌ಸ್ಲಾಮ್‌ ಪಂದ್ಯಾವಳಿಗೆ ಹೊಸ ಹುರುಪಿನಿಂದ ಸಜ್ಜುಗೊಂಡರು.

ಕೊಕೊ ಗಾಫ್ ಸಾಧನೆ
ಆಕ್ಲೆಂಡ್‌: ಅಮೆರಿಕದ 19 ವರ್ಷದ ಆಟಗಾರ್ತಿ ಕೊಕೊ ಗಾಫ್ “ಆಕ್ಲೆಂಡ್‌ ಕ್ಲಾಸಿಕ್‌’ ಟೆನಿಸ್‌ ಪ್ರಶಸ್ತಿಯನ್ನು ಉಳಿಸಿಕೊಳ್ಳುವಲ್ಲಿ ಯಶಸ್ವಿಯಾಗಿದ್ದಾರೆ. ರವಿವಾರದ ಫೈನಲ್‌ನಲ್ಲಿ ಅವರು ಉಕ್ರೇನ್‌ನ ಎಲಿನಾ ಸ್ವಿಟೋಲಿನಾ ವಿರುದ್ಧ 3 ಸೆಟ್‌ಗಳ ಹೋರಾಟ ನಡೆಸಿ 6-7 (4-7), 6-3, 6-3 ಅಂತರದ ಗೆಲುವು ಸಾಧಿಸಿದರು.
“ನಾನು ಉಳಿಸಿಕೊಂಡ ಮೊದಲ ಟೆನಿಸ್‌ ಪ್ರಶಸ್ತಿ ಇದಾಗಿದೆ. ಸಹಜ ವಾಗಿಯೇ ಹೆಚ್ಚು ಖುಷಿಯಾಗಿದೆ’ ಎಂದು 7ನೇ ಡಬ್ಲ್ಯುಟಿಎ ಪ್ರಶಸ್ತಿ ಗೆದ್ದ ಕೊಕೊ ಗಾಫ್ ಹೇಳಿದರು.

6 ವರ್ಷಗಳ ಬಳಿಕ ಡಿಮಿಟ್ರೋವ್‌ಗೆ ಪ್ರಶಸ್ತಿ
ಬ್ರಿಸ್ಬೇನ್‌ ಇಂಟರ್‌ನ್ಯಾಶನಲ್‌ ಪುರುಷರ ಸಿಂಗಲ್ಸ್‌ ಪ್ರಶಸ್ತಿ ಬಲ್ಗೇರಿಯಾದ ಗ್ರಿಗರ್‌ ಡಿಮಿಟ್ರೋವ್‌ ಪಾಲಾಗಿದೆ. ಫೈನಲ್‌ನಲ್ಲಿ ಅವರು ಡೆನ್ಮಾರ್ಕ್‌ನ ಹೋಲ್ಗರ್‌ ರುನೆ ವಿರುದ್ಧ 7-6 (5), 6-4 ಅಂತರದ ಗೆಲುವು ಸಾಧಿಸಿ ಎಟಿಪಿ ಪ್ರಶಸ್ತಿ ಬರಗಾಲವನ್ನು ನೀಗಿಸಿಕೊಂಡರು. ಇದರೊಂದಿಗೆ ಸುದೀರ್ಘ‌ 6 ವರ್ಷಗಳ ತರುವಾಯ ಡಿಮಿಟ್ರೋವ್‌ ಎಟಿಪಿ ಪ್ರಶಸ್ತಿಯೊಂದನ್ನು ತಮ್ಮದಾಗಿಸಿ ಕೊಂಡಂತಾಯಿತು.