Malaysia Open ಬ್ಯಾಡ್ಮಿಂಟನ್‌: ಸಾತ್ವಿಕ್‌-ಚಿರಾಗ್‌ ಸೆಮಿಫೈನಲ್‌ ಪ್ರವೇಶ

Team Udayavani, Jan 12, 2024, 11:57 PM IST

ಕೌಲಾಲಂಪುರ: “ಮಲೇಷ್ಯಾ ಓಪನ್‌ ಸೂಪರ್‌ 1000′ ಬ್ಯಾಡ್ಮಿಂಟನ್‌ ಪಂದ್ಯಾವಳಿಯಲ್ಲಿ ಭಾರತದ ಚಿರಾಗ್‌ ಶೆಟ್ಟಿ-ಸಾತ್ವಿಕ್‌ ಸಾಯಿರಾಜ್‌ ರಾಂಕಿರೆಡ್ಡಿ ಪುರುಷರ ಡಬಲ್ಸ್‌ನಲ್ಲಿ ಸೆಮಿಫೈನಲ್‌ ಪ್ರವೇಶಿಸಿದ್ದಾರೆ. ಆದರೆ ವನಿತಾ ಜೋಡಿ ಅಶ್ವಿ‌ನಿ ಪೊನ್ನಪ್ಪ-ತನಿಷಾ ಕ್ರಾಸ್ಟೊ ಜೋಡಿ ಸೋಲನುಭವಿಸಿದೆ.

ಶುಕ್ರವಾರದ ಕ್ವಾರ್ಟರ್‌ ಪೈನಲ್‌ನಲ್ಲಿ ವಿಶ್ವ ನಂ.2 ಜೋಡಿಯಾದ ಚಿರಾಗ್‌-ಸಾತ್ವಿಕ್‌ ಸೇರಿಕೊಂಡು ಚೀನದ 32ರಷ್ಟು ಕೆಳ ರ್‍ಯಾಂಕಿಂಗ್‌ ಜೋಡಿಯಾದ ರೆನ್‌ ಕ್ಸಿಯಾಂಗ್‌ ಯು ಮತ್ತು ಹೆ ಜಿ ಟಿಂಗ್‌ ಅವರನ್ನು 21-11, 21-8ರಿಂದ ಮಣಿಸಿದರು.

ವನಿತಾ ಡಬಲ್ಸ್‌ನಲ್ಲಿ ವಿಶ್ವದ 24ನೇ ರ್‍ಯಾಂಕಿಂಗ್‌ ಜೋಡಿಯಾದ ಅಶ್ವಿ‌ನಿ ಪೊನ್ನಪ್ಪ-ತನಿಷಾ ಕ್ರಾಸ್ಟೊ ಅವರನ್ನು ಜಪಾನ್‌ನ ರಿನ್‌ ಇವಾನಗಾ-ಕೀ ನಕನಿಶಿ ಸೇರಿಕೊಂಡು 21-15, 21-13 ಅಂತರದಿಂದ ಸೋಲಿಸಿದರು. ಅಶ್ವಿ‌ನಿ-ತನಿಷಾ ಹಿಂದಿನ ಪಂದ್ಯದಲ್ಲಿ ವಿಶ್ವದ ಮಾಜಿ ನಂ.1 ಹಾಗೂ ಎರಡು ಬಾರಿಯ ವಿಶ್ವ ಚಾಂಪಿಯನ್‌ ಮಯು ಮಟ್ಸುಮೊಟೊ-ವಕಾನೆ ನಗಹರಾ ಅವರನ್ನು ಸೋಲಿಸಿ ಅಚ್ಚರಿಯ ಫ‌ಲಿತಾಂಶ ದಾಖಲಿಸಿದ್ದರು. ಆದರೆ ಕ್ವಾರ್ಟರ್‌ ಫೈನಲ್‌ನಲ್ಲಿ ಇದೇ ಆಟವನ್ನು ಪುನರಾವರ್ತಿಸಲು ವಿಫ‌ಲರಾದರು.

ಇದು ಜಪಾನ್‌ ಜೋಡಿ ವಿರುದ್ಧ ಅಶ್ವಿ‌ನಿ-ತನಿಷಾ ಆನುಭವಿಸಿದ ಸತತ 2ನೇ ಸೋಲು. ಇದಕ್ಕೂ ಮೊದಲು, ವರ್ಷಾಂತ್ಯ ಲಕ್ನೋದಲ್ಲಿ ನಡೆದ ಸಯ್ಯದ್‌ ಮೋದಿ ಇಂಟರ್‌ನ್ಯಾಶನಲ್‌ ಸೂಪರ್‌ 300 ಪಂದ್ಯಾಳಿಯಲ್ಲೂ ಭಾರತದ ಆಟಗಾರ್ತಿಯರಿಗೆ ಇವರೆದುರು ಸೋಲು ಎದುರಾಗಿತ್ತು.