SEBI: ಹೂಡಿಕೆದಾರರ ಟ್ರೇಡಿಂಗ್‌ ಅಕೌಂಟ್‌ ಸ್ವಯಂ ನಿರ್ಬಂಧ ವ್ಯವಸ್ಥೆ ಜುಲೈನಿಂದ ಲಭ್ಯ

Team Udayavani, Jan 13, 2024, 9:55 PM IST

ನವದೆಹಲಿ: ಷೇರುಪೇಟೆಗಳಲ್ಲಿ ಹೂಡಿಕೆದಾರರ ಹಿತಾಸಕ್ತಿಯನ್ನು ಗಮನದಲ್ಲಿಟ್ಟುಕೊಂಡು, ಹೂಡಿಕೆದಾರರು ತಮ್ಮ ಟ್ರೇಡಿಂಗ್‌ ಅಕೌಂಟ್‌ಗಳನ್ನು ತಾವಾಗಿಯೇ ಸ್ಥಗಿತಗೊಳಿಸಿಕೊಳ್ಳಲು ಅನುವಾಗುವಂಥ ವ್ಯವಸ್ಥೆಯನ್ನು ರೂಪಿಸುವಂತೆ ಮಧ್ಯವರ್ತಿ ಸಂಸ್ಥೆಗಳಿಗೆ ಮಾರುಕಟ್ಟೆ ನಿಯಂತ್ರಕ ಸೆಬಿ ನಿರ್ದೇಶಿಸಿದೆ. ಮುಂದಿನ ಜುಲೈನಿಂದ ಈ ವ್ಯವಸ್ಥೆ ಜಾರಿಯಾಗಲಿದೆ ಎಂದೂ ಹೇಳಿದೆ. ಪ್ರಸಕ್ತ ಹೂಡಿಕದಾರರು ತಮ್ಮ ಡಿಮ್ಯಾಟ್‌ ಅಕೌಂಟ್‌ಗಳನ್ನು ಮಾತ್ರ ತಾವಾಗಿಯೇ ಸ್ಥಗಿತಗೊಳಿಸಿಕೊಳ್ಳುವ ಅವಕಾಶ ಹೊಂದಿದ್ದಾರೆ.

ಆದರೆ, ಟ್ರೇಡಿಂಗ್‌ ಅಕೌಂಟ್‌ಗೆ ಈ ವ್ಯವಸ್ಥೆ ಲಭ್ಯವಿಲ್ಲ. ಈ ಹಿನ್ನೆಲೆಯಲ್ಲಿ ಹೂಡಿಕೆದಾರರ ಡೆಬಿಟ್‌ ಅಥವಾ ಕ್ರೆಡಿಟ್‌ ಕಾರ್ಡ್‌ಗಳಿಗೆ ಬೇರೆ ಯಾರೋ ಪ್ರವೇಶ ಪಡೆದಿದ್ದಾರೆಂಬ ಅನುಮಾನಸ್ಪದ ಸಂದರ್ಭಗಳಲ್ಲಿ ಆನ್‌ಲೈನ್‌ ಮೂಲಕ ತಾವಾಗಿಯೇ ತಮ್ಮ ಖಾತೆಗಳನ್ನು ನಿರ್ಬಂಧಿಸಿಕೊಳ್ಳುವ ಅವಕಾಶ ಹೂಡಿಕೆದಾರರಿಗೆ ಸಿಗಬೇಕೆಂದು ಸೆಬಿ ನಿರ್ದೇಶಿಸಿದೆ. ಈ ನಿಟ್ಟಿನಲ್ಲಿ ಏ.1ರಿಂದಲೇ ವ್ಯವಸ್ಥೆ ರೂಪಿಸುವ ಪ್ರಕ್ರಿಯೆ ಆರಂಭವಾಗಲಿದ್ದು, ಜುಲೈನಿಂದ ಹೂಡಿಕದಾರರಿಗೆ ಈ ಸೌಲಭ್ಯ ದೊರೆಯಲಿದೆ ಎಂದು ಸೆಬಿ ಹೇಳಿದೆ.