Politics: ಮೋದಿ ಶ್ರೇಷ್ಠ ವ್ಯಕ್ತಿ: ದೇವೇಗೌಡ ಶ್ಲಾಘನೆ

Team Udayavani, Jan 18, 2024, 10:28 PM IST

ನಾಗಮಂಗಲ (ಮಂಡ್ಯ): ರಾಮಮಂದಿರ ನಿರ್ಮಾಣ, ಗಂಗಾನದಿ ಶುದ್ಧೀಕರಣ ಸಹಿತ ಸಾಕಷ್ಟು ಅಭಿವೃದ್ಧಿ ಕೆಲಸಗಳನ್ನು ಪ್ರಧಾನಿ ನರೇಂದ್ರ ಮೋದಿ ಮಾಡಿದ್ದಾರೆ. ವಾಜಪೇಯಿ, ಮನಮೋಹನ್‌ ಸಿಂಗ್‌, ನಾನು ಕೂಡ ಮಾಡಲಾಗದ್ದನ್ನು ಮೋದಿ ಮಾಡಿದ್ದು, ಅವರೊಬ್ಬ ಶ್ರೇಷ್ಠ ವ್ಯಕ್ತಿ ಎಂದು ಮಾಜಿ ಪ್ರಧಾನಿ ಎಚ್‌.ಡಿ.ದೇವೇಗೌಡ ಶ್ಲಾಘಿಸಿದರು.

ತಾಲೂಕಿನ ಆದಿಚುಂಚನಗಿರಿ ಮಹಾ ಸಂಸ್ಥಾನ ಮಠದಲ್ಲಿ ನಡೆಯುತ್ತಿರುವ ಭೈರವೈಕ್ಯ ಬಾಲಗಂಗಾಧರನಾಥ ಶ್ರೀಗಳ 79ನೇ ಜಯಂತ್ಯುತ್ಸವ ಮತ್ತು 11ನೇ ವರ್ಷದ ಸಂಸ್ಮರಣ ಮಹೋತ್ಸವ ಅಂಗವಾಗಿ ನಡೆದ ಭಕ್ತ ಸಂಗಮ ಕಾರ್ಯಕ್ರಮ ಉದ್ಘಾಟಿಸಿ ಮಾತನಾಡಿದರು. ನಮ್ಮದು ರೈತ ಸಮುದಾಯ, ನಾವು ಬಡವರು. ಭೂಮಿ ಉಳುತ್ತೇವೆ. ಮೋದಿ ಅವರೂ ರೈತ ಸಮುದಾಯದಲ್ಲಿ ಜನಿಸಿದ್ದಾರೆ. ನಾನು ಶೂದ್ರ. ಮೋದಿಯವರೂ ಶೂದ್ರರಾಗಿದ್ದಾರೆ. ಆದರೆ ದೊಡ್ಡ ಸಾಧನೆ ಮಾಡಿದ್ದಾರೆ ಎಂದರು.

ಮೋದಿಯವರ ನಾಯಕತ್ವವನ್ನು ಯಾಕೆ ಒಪ್ಪಿಕೊಳ್ಳುತ್ತೇನೆ ಎಂದರೆ, ಮೋದಿಯವರನ್ನು ಕಳೆದ 10 ವರ್ಷಗಳಿಂದ ನೋಡಿದ್ದೇನೆ. ಇದುವರೆಗೂ ನಾನು ಮೋದಿ ವಿರುದ್ಧ ಒಂದು ಮಾತು ಆಡಿಲ್ಲ. ಸೋಮನಾಥ, ಕೇದಾರನಾಥದಲ್ಲಿ ಅವರ ಭಕ್ತಿಯನ್ನು ಕಂಡಿದ್ದೇನೆ. ಅವರು ಹುಟ್ಟಿದ ಸ್ಥಳ ಗುಜರಾತ್‌. ಆದರೆ ಅವರ ಕ್ಷೇತ್ರ ವಾರಾಣಸಿ. ಗಂಗಾನದಿ ಶುದ್ಧೀಕರಣ ಮಾಡಿ ಅದರ ನೀರನ್ನು ತೆಂಗಿನ ನೀರಿನಂತೆ ಮಾಡಿದರು. ಶುದ್ಧ ಮನಸ್ಸಿನಿಂದ ಮೋದಿ ಕಾರ್ಯನಿರ್ವಹಿಸಿದರು. ಇದು ನನ್ನ ಮನಸ್ಸಿನ ಮಾತು ಎಂದರು.