ನಿಗಮ- ಮಂಡಳಿ: ಶತಕ ಸನಿಹ ಆಕಾಂಕ್ಷಿ ಪಟ್ಟಿ?- ಬೆಳಗ್ಗೆ 75; ಒಂದೇ ಬಾರಿಗೆ 85ಕ್ಕೆ ಜಿಗಿತ

Team Udayavani, Jan 19, 2024, 1:46 AM IST

ಬೆಂಗಳೂರು: ನಿಗಮ- ಮಂಡಳಿಗಳ ಅಧ್ಯಕ್ಷರ ನೇಮಕಾತಿ ಪಟ್ಟಿ ಹನುಮಂತನ ಬಾಲದಂತೆ ಬೆಳೆಯುತ್ತಲೇ ಇದೆ. ಶತಕ ಸಮೀಪಿಸುತ್ತಿರುವ ಆಕಾಂಕ್ಷಿಗಳ ಸಂಖ್ಯೆ ಈಗ ಸ್ವತಃ ನಾಯಕರನ್ನು ಇಕ್ಕಟ್ಟಿಗೆ ಸಿಲುಕಿಸುತ್ತಿದೆ!

ಒಂದು ದಿನದ ಹಿಂದಷ್ಟೇ ನಿಗಮ-ಮಂಡಳಿಗಳ ಅಧ್ಯಕ್ಷರ ನೇಮಕಾತಿ ಪಟ್ಟಿ 60ರ ಆಸುಪಾಸು ಇತ್ತು. ಗುರುವಾರ ಬೆಳಗ್ಗೆ ಅದರ ಸಂಖ್ಯೆ 75ಕ್ಕೆ ಏರಿಕೆಯಾಗಿತ್ತು. ಅದೇ ಪಟ್ಟಿ ಸಂಜೆ ಹೊತ್ತಿಗೆ 85ಕ್ಕೆ ಏರಿಕೆಯಾಗಿದೆ. ಸೇರ್ಪಡೆಗೊಳ್ಳುವವರ ಸಂಖ್ಯೆ ದಿನದಿಂದ ದಿನಕ್ಕೆ ಏರಿಕೆಯಾಗುತ್ತಿರುವುದರಿಂದ ಪಟ್ಟಿ ಅಂತಿಮ ಗೊಳಿಸಲು ರಾಜ್ಯದ ಕಾಂಗ್ರೆಸ್‌ ನಾಯಕರು ಹರಸಾಹಸ ಮಾಡಬೇಕಾಗಿದೆ. ಇದೇ ಸ್ಥಿತಿ ಮುಂದು ವರಿದರೆ ಪಟ್ಟಿ ಬಿಡುಗಡೆ ವಿಳಂಬ ರೂಪದಲ್ಲಿ ಪರಿಣಮಿಸುವ ಸಾಧ್ಯತೆಯೂ ಇದೆ ಎನ್ನಲಾಗಿದೆ.

ಇತ್ತ ಯಾವ ನಿಗಮ-ಮಂಡಳಿಗೆ ಯಾರು ಎಂಬುದನ್ನು ನಿರ್ಧರಿಸಿ, ಪಟ್ಟಿಯಲ್ಲಿ ಸ್ಥಾನ ಸಿಕ್ಕಿಲ್ಲ ಎಂದು ಗೊತ್ತಾಗುತ್ತಿದ್ದಂತೆ ನಾಯಕರು ಪ್ರಭಾವ ಬೀರಿ ತಮ್ಮನ್ನೂ ಸೇರಿಸಿ ಎಂದು ಒತ್ತಡ ತರುತ್ತಿದ್ದಾರೆ. ಹೀಗಾಗಿ ಪಟ್ಟಿ ಅಂತಿಮಗೊಳ್ಳುವಷ್ಟರಲ್ಲಿ ಹೊಸದಿಲ್ಲಿಯಿಂದ ಮತ್ತೆ ಕೆಲವು ಹೆಸರುಗಳು
ಬಂದು ಸೇರುತ್ತಿವೆ.