Tollywood: ಟಾಲಿವುಡ್‌ ನಟ ಅಖಿಲ್ ಅಕ್ಕಿನೇನಿ ಚಿತ್ರಕ್ಕೆ ಹೊಂಬಾಳೆ ಫಿಲ್ಮ್ಸ್‌ ಬಂಡವಾಳ?

Team Udayavani, Jan 25, 2024, 3:53 PM IST

ಹೈದರಾಬಾದ್: ಟಾಲಿವುಡ್‌ ನಟ ಅಖಿಲ್ ಅಕ್ಕಿನೇನಿ ಅವರ ಮುಂದಿನ ಸಿನಿಮಾದ ಅನೌನ್ಸ್‌ ಕುರಿತು ಕುತೂಹಲ ಹೆಚ್ಚಾಗಿದೆ. ದೊಡ್ಡ ಹಿಟ್‌ ಕೊಡುವ ನಿರೀಕ್ಷೆಯಿದ್ದ ಅವರ ʼ ಏಜೆಂಟ್ʼ ಸಿನಿಮಾ ಹೀನಾಯ ಸೋಲು ಕಂಡಿತು. ಆ ಬಳಿಕ ಅಖಿಲ್‌ ಯಾವ ಸಿನಿಮಾದಲ್ಲೂ ಕಾಣಿಸಿಕೊಂಡಿಲ್ಲ.‌

ಸುರೇಂದ್ರ ರೆಡ್ಡಿ ನಿರ್ದೇಶನದ ʼಏಜೆಂಟ್‌ʼ ಸಿನಿಮಾಕ್ಕಾಗಿ ಅಖಿಲ್‌ ಮೂರು ವರ್ಷ ಪರಿಶ್ರಮ ಹಾಕಿದ್ದರು. ಆದರೆ ಸಿನಿಮಾ ಮಾತ್ರ ಥಿಯೇಟರ್‌ ನಲ್ಲೂ ಓಡದೆ, ಪ್ರೇಕ್ಷಕರ ಮನದಲ್ಲೂ ಉಳಿಯದೆ ಹೀಗೆ ಬಂದು, ಹಾಗೇ ಹೋಯಿತು.

ʼಏಜೆಂಟ್‌ʼ ಬಳಿಕ ಅಖಿಲ್‌ ಮುಂದೆ ಯಾವ ಸಿನಿಮಾವನ್ನು ಘೋಷಿಸಿಲ್ಲ. ಕೆಲವು ದಿನಗಳ ಹಿಂದೆ, ಪ್ರಭಾಸ್ ಅವರ ಹೋಮ್ ಬ್ಯಾನರ್ ಯುವಿ ಕ್ರಿಯೇಷನ್ಸ್ ಅಖಿಲ್ ಅವರೊಂದಿಗೆ ಸಿನಿಮಾ ಮಾಡುವ ಬಗ್ಗೆ ಸುದ್ದಿ ಹರಿದಾಡಿತ್ತು. ಈ ಸಿನಿಮಾವನ್ನು ನವ ನಿರ್ದೇಶಕ ಅನಿಲ್‌ ಕುಮಾರ್‌ ನಿರ್ದೇಶನ ಮಾಡಲಿದ್ದಾರೆ ಎನ್ನಲಾಗಿತ್ತು.

ಇದೀಗ ಇದೇ ಸಿನಿಮಾದ ಬಗ್ಗೆ ಮತ್ತೊಂದು ಸುದ್ದಿ ಹರಿದಾಡಿದ್ದು, ಟಾಲಿವುಡ್‌ ನಲ್ಲಿ ಸದ್ದು ಮಾಡಿದೆ. ʼಕೆಜಿಎಫ್‌ʼ, ʼಸಲಾರ್‌ʼ ನಂತಹ ಸಿನಿಮಾಗಳನ್ನು ನಿರ್ಮಾಣ ಮಾಡಿರುವ ಹೊಂಬಾಳೆ ಫಿಲ್ಮ್ಸ್‌ ಅಖಿಲ್‌ ಅವರ ಸಿನಿಮಾಕ್ಕೆ ಯುವಿ ಕ್ರಿಯೇಷನ್ಸ್ ಜೊತೆಗೆ ಸಹ-ನಿರ್ಮಾಣ ಮಾಡಲಿದೆ ಎನ್ನಲಾಗುತ್ತಿದೆ.

ಇದಕ್ಕೆ ಪುಷ್ಟಿ ನೀಡುವಂತೆ, ಇತ್ತೀಚೆಗೆ ಅಖಿಲ್‌ ʼಸಲಾರ್‌ʼ ಸಕ್ಸಸ್‌ ಪಾರ್ಟಿಯಲ್ಲಿ ಕಾಣಿಸಿಕೊಂಡಿದ್ದರು. ಸದ್ಯ ಅಖಿಲ್‌ ಈ ಬಗ್ಗೆ ಯಾವ ಮಾಹಿತಿಯನ್ನು ನೀಡಿಲ್ಲ. ಮುಂದಿನ ದಿನಗಳಲ್ಲಿ ಚಿತ್ರತಂಡದಿಂದ ಹೆಚ್ಚಿನ ಮಾಹಿತಿ ಹೊರಬೀಳುವ ಸಾಧ್ಯತೆಯಿದೆ.