ಭಾರತ ವಿರೋಧಿ ನೀತಿ: ಮಾಲ್ಡೀವ್ಸ್‌ ಅಧ್ಯಕ್ಷ ವಿರುದ್ಧ ಪ್ರತಿಪಕ್ಷಗಳ ಆಕ್ರೋಶ

Team Udayavani, Jan 26, 2024, 9:07 AM IST

ನವದೆಹಲಿ: ಮಾಲ್ಡೀವ್ಸ್‌ ಅಧ್ಯಕ್ಷ ಮೊಹಮ್ಮದ್‌ ಮುಯಿಜ್ಜುರ ಭಾರತ ವಿರೋಧಿ ನೀತಿಯ ವಿರುದ್ಧ ಆ ದೇಶದಲ್ಲೇ ತೀವ್ರ ಆಕ್ರೋಶ ಶುರುವಾಗಿದೆ.

ವಿರೋಧಪಕ್ಷಗಳಾಗಿರುವ ಎಂಡಿಪಿ ಮತ್ತು ಡೆಮೊಕ್ರಾಟ್‌ಗಳು ಪಿಎನ್‌ಸಿ ಸರ್ಕಾರದ ನೀತಿಗಳು, ದೀರ್ಘಾವಧಿಯಲ್ಲಿ ಮಾಲ್ಡೀವ್ಸ್‌ಗೆ ಭಾರೀ ಹಾನಿ ಮಾಡುತ್ತವೆ ಎಂದು ಪ್ರತಿಪಾದಿಸಿವೆ.

ಈ ಬಗ್ಗೆ ಜಂಟಿ ಪತ್ರಿಕಾ ಹೇಳಿಕೆ ಬಿಡುಗಡೆ ಮಾಡಿರುವ ಆ ಎರಡೂ ಪಕ್ಷಗಳು, ಯಾವುದೇ ಅಭಿವೃದ್ಧಿಪರ ಪಾಲುದಾರರನ್ನು ದೂರ ಮಾಡುವುದು; ಅದರಲ್ಲೂ ಹಳೆಯ ಸ್ನೇಹಿತನನ್ನು ದೂರ ಮಾಡುವುದು ದೇಶದ ಬೆಳವಣಿಗೆಗೆ ದೀರ್ಘಾವಧಿಯಲ್ಲಿ ಹಿನ್ನಡೆಯಾಗಲಿದೆ. ಹಿಂದೂ ಮಹಾಸಾಗರದಲ್ಲಿ ಸ್ಥಿರತೆ ಮತ್ತು ಭದ್ರತೆ ಸಾಧಿಸುವುದು, ಮಾಲ್ಡೀವ್ಸ್‌ನ ಸ್ಥಿರತೆ ಮತ್ತು ಭದ್ರತೆಗೆ ನೆರವಾಗಲಿದೆ ಎಂದು ಹೇಳಿವೆ. ಭಾರತ ವಿರೋಧಿ ನೀತಿಯನ್ನಿಟ್ಟುಕೊಂಡೇ ಅಧಿಕಾರಕ್ಕೆ ಬಂದ ಮೊಹಮ್ಮದ್‌ ಮುಯಿಜ್ಜು ಕಾರಣದಿಂದ, ಭಾರತ-ಮಾಲ್ಡೀವ್ಸ್‌ ಸಂಬಂಧ ತೀವ್ರವಾಗಿ ಹಳಸಿದೆ.