Ind V/s Zim: ಜಿಂಬಾಬ್ವೆಯಲ್ಲಿ ಟಿ20 ಸರಣಿ- ಜುಲೈಯಲ್ಲಿ ಟೀಮ್‌ ಇಂಡಿಯಾ ಪ್ರವಾಸ

Team Udayavani, Feb 6, 2024, 10:50 PM IST

ಜಿಂಬಾಬ್ವೆ: ಜುಲೈ ತಿಂಗಳಲ್ಲಿ ಪ್ರವಾಸಿ ಭಾರತದ ವಿರುದ್ಧ 5 ಪಂದ್ಯಗಳ ಟಿ20 ಸರಣಿಯನ್ನು ಆಯೋಜಿಸಲು ಜಿಂಬಾಬ್ವೆ ನಿರ್ಧರಿಸಿದೆ. ಜಿಂಬಾಬ್ವೆ ಕ್ರಿಕೆಟ್‌ ಮಂಡಳಿ ಮಂಗಳವಾರ ಇದರ ವೇಳಾಪಟ್ಟಿಯನ್ನು ಬಿಡುಗಡೆ ಮಾಡಿದೆ.

ಟಿ20 ಸರಣಿ ಜುಲೈ 6ರಿಂದ 14ರ ತನಕ ನಡೆಯಲಿದೆ. ಜು. 6, 7, 10, 13 ಮತ್ತು 14ರಂದು ಈ ಸರಣಿ ನಡೆಯಲಿದೆ. ಎಲ್ಲ ಪಂದ್ಯಗಳನ್ನು ಹರಾರೆಯಲ್ಲಿ ಆಡಲಾಗುವುದು.

“ಜಿಂಬಾಬ್ವೆ ಕ್ರಿಕೆಟ್‌ ಮಂಡಳಿ ಮತ್ತು ಬಿಸಿಸಿಐ ನಡುವಿನ ಮಾತುಕತೆ ಬಳಿಕ ಈ ದ್ವಿಪಕ್ಷೀಯ ಸರಣಿಯನ್ನು ಆಯೋಜಿಸಲು ನಿರ್ಧರಿಸಲಾಗಿದೆ. ಭಾರತದೆದುರಿನ ಸರಣಿಯನ್ನು ನಡೆಸುವುದೊಂದು ರೋಮಾಂಚಕಾರಿ ಅನುಭವ. ಇದು ತವರಿನ ಕ್ರಿಕೆಟ್‌ ಅಭಿಮಾನಿಗಳ ಪಾಲಿಗೆ ವಿಶೇಷ ಆಕರ್ಷಣೆ ಆಗಿರಲಿದೆ’ ಎಂಬುದಾಗಿ ಜಿಂಬಾಬ್ವೆ ಕ್ರಿಕೆಟ್‌ ಮಂಡಳಿ ಅಧ್ಯಕ್ಷ ಟವೆಂಗ ಮುಕುಲಾನಿ ಹೇಳಿದ್ದಾರೆ.
“ಬಿಸಿಸಿಐ ಜಾಗತಿಕ ಕ್ರಿಕೆಟ್‌ ಸಮುದಾಯಕ್ಕೆ ಮುಂಚೂಣಿಯಲ್ಲಿ ನಿಂತು ಕೊಡುಗೆ ಸಲ್ಲಿಸಿದೆ. ಜಿಂಬಾಬ್ವೆ ಕ್ರಿಕೆಟ್‌ ಪುನರುತ್ಥಾನಕ್ಕೆ ಇದು ಸಕಾಲ. ಅದಕ್ಕೆ ನಮ್ಮ ಸಹಾಯ ಸದಾ ಲಭಿಸಲಿದೆ’ ಎಂಬುದು ಬಿಸಿಸಿಐ ಕಾರ್ಯದರ್ಶಿ ಜಯ್‌ ಶಾ ಹೇಳಿಕೆ.

ಇಂಥ ದ್ವಿಪಕ್ಷೀಯ ಸರಣಿಗಳಿಗೆ ಹೆಚ್ಚಿನ ಆದ್ಯತೆ ನೀಡಿ ಇದನ್ನು ಆರ್ಥಿಕವಾಗಿ ಸಬಲಗೊಳಿಸುವುದೂ ಬಿಸಿಸಿಐ ಉದ್ದೇಶ ಎಂಬುದಾಗಿ ಜಯ್‌ ಶಾ ಅವರು ಹೇಳಿದರು.