Helicopter Crash: ನೈಜೀರಿಯಾದ ಪ್ರತಿಷ್ಠಿತ ಬ್ಯಾಂಕ್‌ನ ಸಿಇಒ ಸೇರಿ 6 ಮಂದಿ ದುರ್ಮರಣ

Team Udayavani, Feb 11, 2024, 12:06 PM IST

ಕ್ಯಾಲಿಫೋರ್ನಿಯಾ: ದಕ್ಷಿಣ ಕ್ಯಾಲಿಫೋರ್ನಿಯಾದಲ್ಲಿ ಹೆಲಿಕಾಪ್ಟರ್ ಪತನಗೊಂಡು ಪ್ರಖ್ಯಾತ ಬ್ಯಾಂಕಿನ ಸಿಇಓ ಸೇರಿದಂತೆ ಆರು ಮಂದಿ ದುರ್ಮರಣಗೊಂಡಿರುವುದಾಗಿ ವರದಿಯಾಗಿದೆ.

ದುರ್ಘಟನೆಯಲ್ಲಿ ನೈಜೀರಿಯಾದ ಅತಿದೊಡ್ಡ ಸಾಲದಾತರ ಗುಂಪಿನ ಮುಖ್ಯ ಕಾರ್ಯನಿರ್ವಾಹಕ ಸೇರಿದಂತೆ ಆರು ಜನರು ಸಾವನ್ನಪ್ಪಿದ್ದಾರೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.

ಕ್ಯಾಲಿಫೋರ್ನಿಯಾದ ನಿಪ್ಟನ್ ಬಳಿ ರಾತ್ರಿ 10 ಗಂಟೆ ಸುಮಾರಿಗೆ ಹೆಲಿಕಾಪ್ಟರ್ ಪತನಗೊಂಡಿದ್ದು ಈ ವೇಳೆ ಅದರಲ್ಲಿ ಬ್ಯಾಂಕ್ ಸಿಇಓ ಸೇರಿದಂತೆ ಆರು ಮಂದಿ ಇದ್ದರು ಎಂದು ಯುಎಸ್ ಫೆಡರಲ್ ಏವಿಯೇಷನ್ ಅಡ್ಮಿನಿಸ್ಟ್ರೇಷನ್ ಹೇಳಿಕೆಯಲ್ಲಿ ತಿಳಿಸಿದೆ.

ಆಸೆಸ್ ಬ್ಯಾಂಕ್ ನ ಗ್ರೂಪ್ ಸಿಇಒ ಹರ್ಬರ್ಟ್ ವಿಗ್ವೆ ಅವರ ಮರಣವನ್ನು ವಿಶ್ವ ವ್ಯಾಪಾರ ಸಂಸ್ಥೆಯ ಮಹಾನಿರ್ದೇಶಕ ಎನ್‌ಗೊಜಿ ಒಕೊಂಜೊ-ಇವಾಲಾ ಅವರು X ನಲ್ಲಿ ದೃಢಪಡಿಸಿದ್ದಾರೆ.

ಟ್ವೀಟ್ ನಲ್ಲಿ ಆಸೆಸ್ ಬ್ಯಾಂಕ್ ನ ಗ್ರೂಪ್ ಸಿಇಒ ಹರ್ಬರ್ಟ್ ವಿಗ್ವೆ, ಅವರ ಪತ್ನಿ, ಮಗ ಮೃತಪಟ್ಟಿದ್ದ ವಿಚಾರವನ್ನು ತಿಳಿಸಲು ವಿಷಾದ ವ್ಯಕ್ತಪಡಿಸುವುದಾಗಿ ಒಕೊಂಜೊ-ಇವಾಲಾ ಹೇಳಿಕೊಂಡಿದ್ದಾರೆ.

ಹೆಲಿಕಾಪ್ಟರ್ ಲಾಸ್ ವೇಗಾಸ್‌ಗೆ ತೆರಳುತ್ತಿತ್ತು ಎನ್ನಲಾಗಿದ್ದು, ಸ್ಯಾನ್ ಬರ್ನಾರ್ಡಿನೊ ಕೌಂಟಿ ಶೆರಿಫ್ ಇಲಾಖೆಯು ಅಪಘಾತದ ದೃಶ್ಯವು 15-ಫ್ರೀವೇಯ ಪೂರ್ವಕ್ಕೆ, ಹಲೋರನ್ ಸ್ಪ್ರಿಂಗ್ಸ್ ರಸ್ತೆಯ ಸಮೀಪದಲ್ಲಿದೆ ಎಂದು ಹೇಳಿಕೊಂಡಿದ್ದು ಹೆಲಿಕಾಪ್ಟರ್ ನಲ್ಲಿ ಇದ್ದವರು ಯಾರೂ ಬದುಕುಳಿಯಲಿಲ್ಲ ಎಂದು ಹೇಳಿದ್ದಾರೆ.

ಹೆಲಿಕಾಪ್ಟರ್ ಪತನಕ್ಕೆ ಕಾರಣ ಏನು ಎಂಬುದರ ಕುರಿತು ಇನ್ನಷ್ಟೇ ತನಿಖೆ ನಡೆಯಬೇಕಿದೆ.

ಇದನ್ನೂ ಓದಿ: Kolkata; ಮನೆಯಿಂದಲೇ ಸೌರವ್ ಗಂಗೂಲಿ ಮೊಬೈಲ್ ಫೋನ್ ಕಳವು