BBMP: ಬಿಬಿಎಂಪಿ ಬಾಕಿ ತೆರಿಗೆದಾರರಿಗೆ ಒಂದು ಸಲ ಅವಕಾಶ

Team Udayavani, Feb 24, 2024, 11:04 AM IST

ಬೆಂಗಳೂರು: ಸರ್ಕಾರ ಸೂಚಿಸಿರುವಂತೆ “ಬೇ-ಬಾಕಿ ಆಸ್ತಿ ತೆರಿಗೆಯನ್ನು ಕೂಡಲೇ ವಸೂಲಾತಿ ಮಾಡಲು ಅಗತ್ಯ ಕ್ರಮ ಕೈಗೊಳ್ಳುವಂತೆ ಪಾಲಿಕೆ ಮುಖ್ಯ ಆಯುಕ್ತ ತುಷಾರ್‌ ಗಿರಿನಾಥ್‌ ಪಾಲಿಕೆ ಕಂದಾಯ ಇಲಾಖೆಯ ಅಧಿಕಾರಿಗಳಿಗೆ ಸೂಚನೆ ನೀಡಿದ್ದಾರೆ.

ಬೇ-ಬಾಕಿ ಉಳಿಸಿಕೊಂಡವರ ಸ್ವತ್ತುಗಳಿಗೆ ಪಾಲಿಕೆ ಅಧಿಕಾರಿಗಳು ಬೀಗ ಮುದ್ರೆ ಹಾಕಿದ ನಂತರ ಸರ್ಕಾರ ಸಾರ್ವಜನಿಕರ ಹಿತದೃಷ್ಟಿಯನ್ನು ಇಟ್ಟುಕೊಂಡು ಪಾಲಿಕೆ ಬಾಕಿ ಆಸ್ತಿ ತೆರಿಗೆ ಪಾವತಿಗೆ ಸಂಬಂಧಿಸಿದಂತೆ “ಒಂದು ಬಾರಿ ತೀರುವಳಿ’ (ಒಟಿಎಸ್‌) ಯೋಜನೆಯನ್ನು ಸರ್ಕಾರ ಜಾರಿಗೊಳಿಸಿ ಕೆಲವು ಆದೇಶಗಳನ್ನು ನೀಡಿದ್ದು, ಅದರಂತೆ ಕ್ರಮ ಕೈಗೊಳ್ಳುವಂತೆ ತಿಳಿಸಿದ್ದಾರೆ.

ಸರ್ಕಾರ ಮಾಡಿರುವ ಆದೇಶದಲ್ಲಿ ಏನಿದೆ:  ಬಿಬಿಎಂಪಿ ಅಧಿನಿಯಮ 2020 ಕಲಂ 144 ಉಪ ಕಲಂ 15ಕ ಖಂಡ (ಬಿ) ಅಡಿಯಲ್ಲಿ ದಂಡವು ವಂಚಿಸಿದ ತೆರಿಗೆ ಮೊತ್ತಕ್ಕೆ ಸಮಾನಾಗಿರತಕ್ಕದ್ದು. ಎಸ್‌ಎಸ್‌ 2016 ಅಧಿಸೂಚನೆಯ ವಸತಿ ವರ್ಗ -3ರ ಅಡಿಯಲ್ಲಿ ಸ್ವಂತ ಉಪಯೋಗದ 1000 ಚದರ ಅಡಿಗಿಂತ ಹೆಚ್ಚಿಲ್ಲದ ಹಾಗೂ ಕೇವಲ ನೆಲಮಹಡಿಯನ್ನು ಹೊಂದಿರುವ ಟೈಲ್ಡ್‌ ಅಥವಾ ಶೀಟ್‌ ರೂಫ್ (ಆರ್‌ಸಿಸಿ ಅಲ್ಲದ) ವಸತಿ ಆಸ್ತಿಗಳಿಗೆ (ವಂಚಿಸಿದ ತೆರಿಗೆ ಮೇಲೆ) ಶೇ.25ರಷ್ಟು ದಂಡವಿಧಿಸಲಾಗಿದೆ.

ಗುಡಿಸಲುಗಳು, ಬಡವರಿಗಾಗಿ ಸರ್ಕಾರಿ ವಸತಿ ಸೌಲಭ್ಯ, ಕರ್ನಾಟಕ ಕೊಳೆಗೇರಿ ಅಭಿವೃದ್ಧಿ ಮಂಡಳಿ ಅಥವಾ ಬಿಬಿಎಂಪಿಯಿಂದ ಕೊಳಗೇರಿ ಎಂದು ಘೋಷಿಸಿದ ವಸತಿ ಆಸ್ತಿಗಳಲ್ಲಿ ಸ್ವಂತ ಉಪಯೋಗದ 300 ಚದರ ಅಡಿಗಳಿಗಿಂತ ಕಡಿಮೆ ವಿಸ್ತೀರ್ಣದ ಮನೆಗಳಿಗೆ ಯಾವುದೇ ದಂಡ ಅನ್ವಯಿಸುವುದಿಲ್ಲ ಎಂದು ಆದೇಶದಲ್ಲಿ ತಿಳಿಸಲಾಗಿದೆ.

ಬಡ್ಡಿ ಮೊತ್ತದಲ್ಲಿ ವಿನಾಯಿತಿ: ಆಸ್ತಿತೆರಿಗೆ ವಿಳಂಬ ಪಾವತಿ ಮೇಲಿನ ಬಡ್ಡಿ, ಕಲಂ 144 (15) ಖಂಡ (ಬಿ)ರ ಪ್ರಕಾರ ವಂಚಿಸಿದ ತೆರಿಗೆ ಮೇಲಿನ ಬಡ್ಡಿ ಹಾಗೂ ಆಸ್ತಿ ತೆರಿಗೆ ನಿಗದಿಯಾದ ಹಾಗೂ ಆಸ್ತಿ ತೆರಿಗೆ ವ್ಯಾಪ್ತಿಯಿಂದ ಹೊರಗಿರುವ ಸ್ವತ್ತುಗಳಿಗೆ ವಿಧಿಸುವ ಬಡ್ಡಿ, ಈ ಮೂರು ಪ್ರಕರಣಗಳಲ್ಲಿ ಬಡ್ಡಿ ಮೊತ್ತವನ್ನು ವಿನಾಯಿತಿ ನೀಡಲಾಗಿದೆ. ತೆರಿಗೆ ವಂಚನೆ ಪ್ರಕರಣಗಳಲ್ಲಿ ಅಥವಾ ಆಸ್ತಿ ತೆರಿಗೆ ಬಾಕಿಯಿರುವ ಸ್ವತ್ತುಗಳಿಗೆ ಈಗಾಗಲೇ ನೀಡಿರುವ ಬೇಡಿಕೆಗೆ ಸಂಪೂರ್ಣ ಆಸ್ತಿ ತೆರಿಗೆ ಪಾವತಿ ಮಾಡದೆ ಇರುವ ಪ್ರಕರಣಗಳಲ್ಲಿ ಅದರ ಮೇಲೆ ಪಾವತಿ ಮಾಡಬೇಕಾದ ಬಡ್ಡಿ ಹಾಗೂ ದಂಡಗಳ ಮೇಲೆ ಸರ್ಕಾರದ ಆದೇಶ ಅನ್ವಯವಾಗಲಿದೆ.

ಸರ್ಕಾರ ಹೊರಡಿರುವ ಈ ಆದೇಶ ಜು.31ರವರೆಗೆ ಜಾರಿಯಲ್ಲಿರಲಿದೆ. ಈಗಾಗಲೇ ಪಾವತಿಸಿದ ಆಸ್ತಿ ತೆರಿಗೆ, ಬಡ್ಡಿ ಅಥವಾ ದಂಡವನ್ನು ಮರುಪಾವತಿ ಅಥವಾ ಮುಂಬರುವ ಸಾಲಿನ ತೆರಿಗೆಗೆ ಅಥವಾ ಬಿಬಿಎಂಪಿಯ ಇತರೆ ವಿಧಿಸುವಿಕೆಗಳಿಗೆ ಹೊಂದಾಣಿಕೆ ಮಾಡಲಾಗುವುದಿಲ್ಲ ಎಂದು ಆದೇಶದಲ್ಲಿ ಸ್ಪಷ್ಟಪಡಿಸಲಾಗಿದೆ.

ಒಂದು ಬಾರಿ ತೀರುವಳಿ ಆನ್‌ಲೈನ್‌ ಮೂಲಕ ಪಾವತಿಸಲು ಅವಕಾಶ: 

ಬೆಂಗಳೂರು: ಬಿಬಿಎಂಪಿ ವ್ಯಾಪ್ತಿಯಲ್ಲಿ ಆಸ್ತಿ ತೆರಿಗೆ ತಪ್ಪಾಗಿ ಘೋಷಿಸಿಕೊಂಡಿರುವ ಆಸ್ತಿ ಮಾಲೀಕರು ಸರ್ಕಾರದ ಆದೇಶದಂತೆ “ಒನ್‌ ಟೈಮ್‌ ಸೆಟ್ಲ ಮೆಂಟ್‌'(ಒಟಿಎಸ್‌) ಯೋಜನೆಯನ್ನು ಸದ್ಬಳಕೆ ಮಾಡಿಕೊಂಡು, ಆನ್‌ಲೈನ್‌ ಮೂಲಕವೂ ಪಾವತಿಸಲು ಅವಕಾಶ ಕಲ್ಪಿಸಲಾಗಿದೆ.

ರಾಜ್ಯ ಸರ್ಕಾರವು ಫೆ.22ರಂದು ಒಟಿಎಸ್‌ ಯೋಜನೆಯ ಕುರಿತು ಅಧಿಸೂಚನೆ ಹೊರಡಿಸಿದೆ. ಅದರಂತೆ ಪಾಲಿಕೆಯ ಆಸ್ತಿ ತೆರಿಗೆಯನ್ನು ಆನ್‌ಲೈನ್‌ ಮೂಲಕ ಪಾವತಿಸುವ ಸಾಫ್ಟ್ವೇರ್‌ನಲ್ಲಿ ಒಟಿಎಸ್‌ಅನ್ನು ಪಾವತಿಸಲು ಅವಕಾಶ ಕಲ್ಪಿಸಿದೆ.

ನಾಗರೀಕರು ಸಂಪೂರ್ಣ ಬಡ್ಡಿ ಮನ್ನಾ, ವಂಚನೆ ಪ್ರಕರಣಗಳಲ್ಲಿ ಶೇ.50ರಷ್ಟು ದಂಡ ಕಡಿತ ಹಾಗೂ ವಸತಿ ಮತ್ತು ಮಿಶ್ರ ಬಳಕೆಗೆ ಪ್ರಕರಣಗಳಲ್ಲಿ ಮಾತ್ರ ಗರಿಷ್ಠ 5 ವರ್ಷಗಳ ಮಿತಿ  ಪ್ರಯೋಜನವನ್ನು ತಕ್ಷಣವೇ ಪಡೆಯಬಹುದಾಗಿದೆ.

ಪಾಲಿಕೆಯ ಅಧಿಕೃತ ವೆಬ್‌ ಸೈಟ್‌ https://bbmptax.karnataka.gov.in  ಗೆ ಭೇಟಿ ನೀಡಿ, ಒಟಿಎಸ್‌ನ ಸಂಪೂರ್ಣ ಪ್ರಯೋಜನ ಆನ್‌ಲೈನ್‌ನಲ್ಲಿ ಪಡೆದು ಪಾವತಿಸಬಹುದಾಗಿದೆ.