ಸಿಇಟಿ ಅರ್ಜಿ: ಆರ್‌ಡಿ ತಿದ್ದುಪಡಿ ಅವಕಾಶ

Team Udayavani, Mar 2, 2024, 11:32 PM IST

ಬೆಂಗಳೂರು: ಯುಜಿಸಿಟಿ-2024ಗೆ ಸಲ್ಲಿಸಿರುವ ಅರ್ಜಿಗಳಲ್ಲಿ ಆರ್‌ಡಿ ನಂಬರ್‌ ತಾಳೆ ಆಗದಿರುವ ಅರ್ಜಿಗಳಿದ್ದು, ಲೋಪ ಸರಿಪಡಿಸಿಕೊಂಡು ಸರಿಯಾದ ಆರ್‌ಡಿ ಪ್ರಮಾಣ ಪತ್ರವನ್ನು ಸಲ್ಲಿಸಲು ಎಪ್ರಿಲ್‌ 1ರಿಂದ 15ರ ವರೆಗೆ ಕಾಲಾವಕಾಶ ನೀಡಲಾಗಿದೆ.

ಈ ಬಾರಿಯ ಸಿಇಟಿ ಅರ್ಜಿಯಲ್ಲಿ ಅಭ್ಯರ್ಥಿಗಳಿಗೆ ತಮ್ಮ ಹತ್ತನೇ ತರಗತಿಯ ಅಂಕಪಟ್ಟಿಯಲ್ಲಿರುವ ಹೆಸರಿಗೆ (ಮೊದಲಕ್ಷರಗಳು, ಡಾಟ್‌, ಸ್ಪೇಸ್‌, ಉಪನಾಮ) ಆರ್‌ಡಿ ಪ್ರಮಾಣ ಪತ್ರದಲ್ಲೂ ತಾಳೆ ಆಗಬೇಕೆಂದು ಸೂಚಿಸಲಾಗಿತ್ತು. ಆದರೆ ಕೆಲವು ಅಭ್ಯರ್ಥಿಗಳು ಜಾತಿ, ಆದಾಯ, ಪ್ರವರ್ಗ, ಹೈದರಾಬಾದ್‌ ಕರ್ನಾಟಕ, ನಾನ್‌ ಕ್ರೀಮಿ ಲೇಯರ್‌ ಮತ್ತು ಧಾರ್ಮಿಕ ಅಲ್ಪಸಂಖ್ಯಾಕ ನೆಲೆಯಲ್ಲಿ ಮೀಸಲಾತಿ ಕೋರಿದ್ದರೂ ಅವರು ನೀಡಿರುವ ಆರ್‌ಡಿ ನಂಬರ್‌ ತಾಳೆ ಆಗುತ್ತಿಲ್ಲ. ಆರ್‌ಡಿ ನಂಬರ್‌ ತಾಳೆ ಆಗದ ಅಭ್ಯರ್ಥಿಗಳ ಪಟ್ಟಿಯನ್ನು ಕರ್ನಾಟಕ ಪರೀಕ್ಷಾ ಪ್ರಾಧಿಕಾರ (ಕೆಇಎ) ವೆಬ್‌ಸೈಟ್‌ನಲ್ಲಿ ಪ್ರಕಟಿಸಲಾಗಿದೆ.

ಪಟ್ಟಿಯಲ್ಲಿ ಹೆಸರು ಇರುವ ಅಭ್ಯರ್ಥಿಗಳು ಆರ್‌ಡಿ ಪ್ರಮಾಣ ಪತ್ರದಲ್ಲಿ ಹೆಸರನ್ನು ಸರಿಪಡಿಸಿಕೊಳ್ಳಲು ತಿಳಿಸಲಾಗಿದೆ ಎಂದು ಕಾರ್ಯನಿರ್ವಾಹಕ ನಿರ್ದೇಶಕಿ ಎಸ್‌.ರಮ್ಯಾ ತಿಳಿಸಿದ್ದಾರೆ.