Ranganayaka; ರಚಿತಾ ಮಹಾಲಕ್ಷ್ಮೀ ಭರ್ಜರಿ ನಿರೀಕ್ಷೆ

Team Udayavani, Mar 5, 2024, 6:03 PM IST

Rachitha mahalakshmi lead actress in Ranganayaka

ಜಗ್ಗೇಶ್‌ ನಾಯಕರಾಗಿರುವ “ರಂಗನಾಯಕ’ ಚಿತ್ರ ಮಾ.8ರಂದು ಬಿಡುಗಡೆಯಾಗುತ್ತಿದೆ. ಈಗಾಗಲೇ ಬಿಡುಗಡೆಯಾಗಿರುವ ಚಿತ್ರದ ಟ್ರೇಲರ್‌ ಹಿಟ್‌ಲಿಸ್ಟ್‌ ಸೇರಿದೆ. ಈ ಚಿತ್ರದಲ್ಲಿ ರಚಿತಾ ಮಹಾಲಕ್ಷ್ಮೀ ನಾಯಕಿಯಾಗಿ ನಟಿಸಿದ್ದಾರೆ.

ಯಾರು ಈ ರಚಿತಾ ಎಂದು ನೀವು ಕೇಳಿದರೆ ಪಕ್ಕಾ ಕನ್ನಡದ ಹುಡುಗಿ ಎನ್ನಬೇಕು. ಕೆಲವು ವರ್ಷಗಳ ಹಿಂದೆ ಕನ್ನಡ ಕಿರುತೆರೆ ಹಾಗೂ ಕೆಲವು ಸಿನಿಮಾಗಳಲ್ಲಿ ನಟಿಸಿದ್ದ ರಚಿತಾ ಬಳಿಕ ತಮಿಳಿನತ್ತ ಮುಖ ಮಾಡಿದರು. ತಮಿಳು ಕಿರುತೆರೆಯಲ್ಲಿ ಸಿಕ್ಕಾಪಟ್ಟೆ ಬೇಡಿಕೆಯ ಹಾಗೂ ಬಿಝಿ ನಟಿಯಾಗಿದ್ದ ರಚಿತಾ ಅವರನ್ನು ಮತ್ತೆ ಕನ್ನಡಕ್ಕೆ ಕರೆತಂದಿದ್ದು ನಿರ್ದೇಶಕ ಗುರು ಪ್ರಸಾದ್‌. ಚಿತ್ರದ ಪಾತ್ರಕ್ಕೆ ರಚಿತಾ ಹೊಂದಿಕೆಯಾಗುತ್ತಾರೆ ಎಂಬ ಕಾರಣಕ್ಕೆ ಕರೆತಂದಿದ್ದಾರೆ. ಈಗ ಈ ಸಿನಿಮಾ ಮೇಲೆ ರಚಿತಾ ಕೂಡಾ ನಿರೀಕ್ಷೆ ಇಟ್ಟಿದ್ದಾರೆ.

“ಇದು ಒಳ್ಳೆಯ ಕಂಬ್ಯಾಕ್‌. ನನ್ನ ಪಾತ್ರಕ್ಕೆ ತುಂಬಾ ಸ್ಕೋಪ್‌ ಇದೆ. ಚಿತ್ರದ ಕಾಸ್ಟ್ಯೂಮ್ ನಿಂದ ಹಿಡಿದು ಪ್ರತಿ ಅಂಶವೂ ಭಿನ್ನವಾಗಿದೆ. ಜಗ್ಗೇಶ್‌ ಅವರ ಜೊತೆ ನಟಿಸಿದ್ದು ಒಂದು ಒಳ್ಳೆಯ ಅನುಭವ. ಗುರುಪ್ರಸಾದ್‌ ಅವರ ಮಾರ್ಗದರ್ಶನದೊಂದಿಗೆ ಪಾತ್ರಕ್ಕೆ ನ್ಯಾಯ ಒದಗಿಸಿದ ಖುಷಿ ಇದೆ’ ಎನ್ನುತ್ತಾರೆ ರಚಿತಾ ಮಹಾಲಕ್ಷ್ಮೀ.

ನಟ ಜಗ್ಗೇಶ್‌-ಗುರುಪ್ರಸಾದ್‌ ಕಾಂಬಿನೇಶನ್‌ನಲ್ಲಿ ಈಗಾಗಲೇ ಬಂದಿರುವ ಎರಡೂ ಸಿನಿಮಾಗಳು ಸೂಪರ್‌ ಹಿಟ್‌ಆಗಿದ್ದು ಇತಿಹಾಸ. ಈಗ ಇದೇ ಜೋಡಿ ಸುಮಾರು 15 ವರ್ಷಗಳ ನಂತರ ಮತ್ತೆ ಒಂದಾಗಿ ತೆರೆಮೇಲೆ ಹ್ಯಾಟ್ರಿಕ್‌ ಬಾರಿಸಲು ರೆಡಿಯಾಗಿದೆ.

ಹೌದು, ಜಗ್ಗೇಶ್‌ – ಗುರು ಜೋಡಿಯ ಬಹು ನಿರೀಕ್ಷಿತ ಸಿನಿಮಾ “ರಂಗನಾಯಕ’ ಬಿಡುಗಡೆಗೆ ಕೌಂಟ್‌ಡೌನ್‌ ಶುರುವಾಗಿದ್ದು, ಮಾ.8ರಂದು ತೆರೆಕಾಣುತ್ತಿದೆ. ಸಿನಿಮಾವನ್ನು “ವಿಖ್ಯಾತ್‌ ಚಿತ್ರ ಪ್ರೊಡಕ್ಷನ್ಸ್‌’ ಬ್ಯಾನರ್‌ನಲ್ಲಿ ಎ. ಆರ್‌. ವಿಖ್ಯಾತ್‌ ನಿರ್ಮಿಸುತ್ತಿದ್ದಾರೆ