ಸ್ವಾತಂತ್ರ್ಯ ದಿನಕ್ಕೆ 3 ಸಿನಿಮಾ ರಿಲೀಸ್‌ ಪಕ್ಕಾ.. ಅಲ್ಲು,ಶಿವಣ್ಣ,ದೇವಗನ್‌ ನಡುವೆ ಪೈಪೋಟಿ

Team Udayavani, Mar 10, 2024, 3:49 PM IST

ಬೆಂಗಳೂರು: ಚಿತ್ರರಂಗದಲ್ಲಿ ಸಿನಿಮಾಗಳು ಹಬ್ಬದ ಸಂದರ್ಭದಲ್ಲಿ ರಿಲೀಸ್‌ ಆಗುತ್ತವೆ. ಅದರಲ್ಲೂ ವಿಶೇಷವಾಗಿ ಸಂಕ್ರಾಂತಿ ಹಬ್ಬದ ವೇಳೆ ದಕ್ಷಿಣದಲ್ಲಿ ಒಂದಕ್ಕೊಂದು ಟಕ್ಕರ್‌ ಕೊಡುವಂತೆ ಸ್ಟಾರ್‌ ನಟರ ಸಿನಿಮಾಗಳು ತೆರೆ ಕಾಣುತ್ತದೆ. ಈ ವೇಳೆ ಬರುವ ಸಿನಿಮಾಗಳು ಬಾಕ್ಸ್‌ ಆಫೀಸ್‌ ನಲ್ಲಿ ಭರ್ಜರಿ ಗಳಿಕೆ ಕಾಣುತ್ತದೆ ಎನ್ನುವುದು ಚಿತ್ರತಂಡದ ಲೆಕ್ಕಚಾರ ಆಗಿರುತ್ತದೆ.

ಇದೀಗ ಸೌತ್‌ ಸಿನಿಮಾದಲ್ಲಿ ಈ ಟ್ರೆಂಡ್‌ ಬದಲಾದಂತೆ ಕಾಣುತ್ತಿದೆ. ಈ ವರ್ಷ ಹಬ್ಬದ ಬದಲಾಗಿ ಸ್ವಾತಂತ್ರೋತ್ಸವಕ್ಕೆ ಬಿಗ್‌ ಬಜೆಟ್‌ ಸಿನಿಮಾಗಳು ಒಂದೇ ದಿನ ತೆರೆಗೆ ಅಪ್ಪಳಿಸಲಿವೆ.

ಪ್ಯಾನ್‌ ಇಂಡಿಯಾದಲ್ಲಿ ʼಪುಷ್ಪ-2ʼ ಮಾಡುತ್ತಾ ಕಮಾಲ್?:‌ ಅಲ್ಲು ಅರ್ಜುನ್‌ ವೃತ್ತಿ ಬದುಕಿನ ಬಹುದೊಡ್ಡ ಹಿಟ್‌ ನಲ್ಲಿ ಒಂದಾಗಿರುವ ʼಪುಷ್ಪʼ ಸಿನಿಮಾದ ಸೀಕ್ವೆಲ್‌ ʼಪುಷ್ಪ-2ʼ ಗಾಗಿ ದಕ್ಷಿಣ ಭಾರತ ಮಾತ್ರವಲ್ಲದೆ, ಉತ್ತರದಲ್ಲೂ ಪ್ರೇಕ್ಷಕರು ಕಾಯುತ್ತಿದ್ದಾರೆ. ಸುಕುಮಾರನ್‌ ನಿರ್ದೇಶನದ ಈ ಸಿನಿಮಾದ ಬಗ್ಗೆ ಪರಿಚಯ ಮಾಡಿಕೊಡಬೇಕಿಲ್ಲ. ಸಿನಿಮಾದ ಮೊದಲ ಭಾಗ ತಂದುಕೊಟ್ಟ ಹಿಟ್‌ ನಿಂದ ಎರಡನೇ ಭಾಗದ ಹೈಪ್‌ ಶೂಟಿಂಗ್‌ ಹಂತದಲ್ಲೇ ಹೆಚ್ಚಾಗಿದೆ.

ಈ ಸಿನಿಮಾ ಇದೇ ವರ್ಷದ ಆಗಸ್ಟ್‌ 15 ರಂದು ರಿಲೀಸ್‌ ಆಗಲಿದೆ. ಬಾಕ್ಸ್‌ ಆಫೀಸ್‌ ನಲ್ಲಿ ಎಲ್ಲಾ ದಾಖಲೆಗಳನ್ನು ಪುಡಿಗಟ್ಟುವ ನಿರೀಕ್ಷೆ ಸಿನಿಮಾದ ಮೇಲಿದೆ.

ಬಿಟೌನ್‌ನಲ್ಲಿ ಬಿಗ್‌ ಬಜೆಟ್‌ ʼಸಿಂಗಂ ಎಗೇನ್‌ʼ: ಇನ್ನು ʼಸಿಂಗಂʼ ಫ್ರಾಂಚೈಸಿ ಮೂಲಕ ಬಿಟೌನ್‌ ಬಾಕ್ಸ್‌ ಆಫೀಸ್‌ ನಲ್ಲಿ ಕೋಟಿ ಕೋಟಿ ಕಮಾಯಿ ಮಾಡಿರುವ ರೋಹಿತ್‌ ಶೆಟ್ಟಿ ಈ ಬಾರಿ ʼಸಿಂಗಂ ಎಗೇನ್‌ʼ ಮೂಲಕ ಮೋಡಿ ಬರಲು ಬರುತ್ತಿದ್ದಾರೆ. ಈ ಸಲಿ ಸಿನಿಮಾದಲ್ಲಿ ಮಲ್ಟಿಸ್ಟಾರ್ಸ್‌ ಗಳಿದ್ದು, ಹವಾ ಎಬ್ಬಿಸೋದು ಪಕ್ಕಾ ಎನ್ನುವುದು ಬಿಟೌನ್‌ ಮಂದಿಯ ನಿರೀಕ್ಷೆ.

ಅಜಯ್ ದೇವಗನ್, ಕರೀನಾ ಕಪೂರ್ , ದೀಪಿಕಾ ಪಡುಕೋಣೆ, ರಣ್ವೀರ್ ಸಿಂಗ್, ಅರ್ಜುನ್ ಕಪೂರ್, ಟೈಗರ್ ಶ್ರಾಫ್ ಸೇರಿದಂತೆ ಬಹುದೊಡ್ಡ ಕಲಾವಿದರ ದಂಡು ಸಿನಿಮಾದಲ್ಲಿದೆ. ಅಂದಹಾಗೆ ಈ ಸಿನಿಮಾ ಕೂಡ ಆಗಸ್ಟ್‌ 15 ರಂದೇ ರಿಲೀಸ್‌ ಆಗಲಿದೆ.

ಪ್ಯಾನ್‌ ಇಂಡಿಯಾ ಸಿನಿಮಾಕ್ಕೆ ಟಕ್ಕರ್‌ ಕೊಡುತ್ತಾ ʼಭೈರತಿ ರಣಗಲ್ʼ ? : ಸ್ವಾತಂತ್ರೋತ್ಸವಕ್ಕೆ ʼಪುಷ್ಪ-2ʼ ಹಾಗೂ ʼಸಿಂಗಂ ಎಗೇನ್‌ʼ ಸಿನಿಮಾಗಳು ಬಾಕ್ಸ್‌ ಆಫೀಸ್‌ ನಲ್ಲಿ ಪೈಪೋಟಿ ನಡೆಸಲಿವೆ ಎನ್ನಲಾಗುತ್ತಿತ್ತು. ಈ ನಡುವೆ ಕರ್ನಾಟಕದಲ್ಲಿ ಶಿವರಾಜ್‌ ಕುಮಾರ್‌ ಅವರ ʼಭೈರತಿ ರಣಗಲ್‌ʼ ಸಿನಿಮಾ ಕೂಡ ಆ.15 ರಂದೇ ರಿಲೀಸ್‌ ಆಗಲಿದ್ದು, ಚಂದನವನದಲ್ಲಿ ಪರಭಾಷಾ ಸಿನಿಮಾಗಳ ಮುಂದೆ ನರ್ತನ್‌ ಅವರ ʼಭೈರತಿ ರಣಗಲ್‌ʼ ಮ್ಯಾಜಿಕ್‌ ಮಾಡುತ್ತಾ ಎನ್ನುವುದನ್ನು ಕಾದು ನೋಡಬೇಕಾಗಿದೆ.

‘ಭೈರತಿ ರಣಗಲ್’ ‘ಮಫ್ತಿ’ಸಿನಿಮಾದ ಪ್ರೀಕ್ವೆಲ್ ಆಗಿದ್ದು, ಬಹುದೊಡ್ಡ ನಿರೀಕ್ಷೆಯನ್ನು ಹುಟ್ಟುಹಾಕಿದೆ.

ಇನ್ನು ಈ ಪೈಪೋಟಿಯಲ್ಲಿ ಮತ್ತಷ್ಟು ಸಿನಿಮಾಗಳು ಕೂಡ ಸೇರುವ ಸಾಧ್ಯತೆಯಿದೆ ಎನ್ನಲಾಗುತ್ತಿದೆ. ಕಾಲಿವುಡ್‌ ನಿಂದ ದಳಪತಿ ವಿಜಯ್‌ ಅವರ ʼ ದಿ ಗ್ರೇಟೆಸ್ಟ್ ಆಫ್ ಆಲ್ ಟೈಮ್ʼ ಹಾಗೂ ಸೂಪರ್‌ ಸ್ಟಾರ್‌ ರಜಿನಿಕಾಂತ್‌ ಅವರ ‘ವೆಟ್ಟೈಯನ್​’ ಸಿನಿಮಾ ಕೂಡ ಆ.15 ರಂದು ಬಿಡುಗಡೆ ಆಗುವ ಸಾಧ್ಯತೆಯಿದೆ ಎನ್ನಲಾಗುತ್ತಿದೆ. ಆದರೆ ಈ ಬಗ್ಗೆ ಅಧಿಕೃತ ಮಾಹಿತಿ ಇನ್ನಷ್ಟೇ ಹೊರಬೀಳಬೇಕಿದೆ.