Vijaypura: ವಿಶ್ವ ದಾಖಲೆಗಾಗಿ ವೈದ್ಯಕೀಯ ಜಾಗೃತಿ ರಂಗೋಲಿ

10 ಟನ್ ರಂಗೋಲಿ ಪುಡಿ... ಗಿನ್ನಿಸ್, ಲಿಮ್ಕಾ, ಐಬಿಆರ್ ದಾಖಲೆ ಸೇರಲಿರುವ ವೈದ್ಯಕೀಯ ವಿಷಯಾಧಾರಿತ 250 ವಿನ್ಯಾಸ

Team Udayavani, Mar 10, 2024, 6:23 PM IST

ವಿಜಯಪುರ : ಸ್ವಾಸ್ಥ್ಯ ಸಂತುಲನ ರಂಗೋಲಿ ಮಹೋತ್ಸವದಲ್ಲಿ ಆರೋಗ್ಯ, ವೈದ್ಯಕೀಯ ಸೇವೆ, ಕಾನೂನು, ಮನುಷ್ಯನ ದೇಹದ ಅಂಗ ರಚನೆ, ವೈದ್ಯಕೀಯ ಕ್ಷೇತ್ರದಲ್ಲಿ ವಿಶ್ವ ದಾಖಲೆಯ ಗಿನ್ನಿಸ್ ಸೇರಿದಂತೆ ಇತರೆ ದಾಖಲೆ ಬರೆಯುವುದಕ್ಕಾಗಿ ನಗರದಲ್ಲಿ ರಂಗೋಲಿಯಲ್ಲಿ ವಿನ್ಯಾಸ ಬಿಡಿಸಿ ಸೃಷ್ಟಿಸಲಾಗಿದೆ.

ನಗರದ ಬಿ.ಎಲ್.ಡಿ.ಇ. ಡೀಮ್ಡ್ ವಿಶ್ವವಿದ್ಯಾಲಯದ ಬಿ.ಎಂ.ಪಾಟೀಲ ವೈದ್ಯಕೀಯ ಕಾಲೇಜು ವಿದ್ಯಾರ್ಥಿಗಳಿಂದ ಸಾಧನೆ ಸೃಷ್ಟಿಸಲಾಗಿದೆ. ವೈದ್ಯಕೀಯ ವಿಷಯದ ಈ ಜಾಗೃತಿಯ ಗಿನ್ನಿಸ್ ಬುಕ್ ಆಫ್ ರೆಕಾರ್ಡ್ಸ್ , ವಲ್ರ್ಡ್ ಬುಕ್ ಆಫ್ ರೆಕಾರ್ಡ್ಸ್, ಇಂಡಿಯಾ ಬುಕ್ ಆಫ್ ರೆಕಾರ್ಡ್ಸ್, ಎಲೈಟ್ ವಲ್ರ್ಡ್ ರೆಕಾರ್ಡ್ಸ್, ಲಿಮ್ಕಾ ಬುಕ್ ಆಫ್ ರೆಕಾರ್ಡ್ಸ್ ನಲ್ಲಿ ಸೇರ್ಪಡೆಗೆ ಸಿದ್ಧವಾಗಿದೆ.

ವಿಜಯಪುರ ನಗರದಲ್ಲಿರುವ ಬಿಎಲ್‍ಡಿಇ ಡೀಮ್ಡ್ ವಿಶ್ವವಿದ್ಯಾಲಯದ ಬಿ.ಎಂ.ಪಾಟೀಲ ವೈದ್ಯಕೀಯ ಕಾಲೇಜು ವಿದ್ಯಾರ್ಥಿಗಳು, ಬೋಧಕರು ಸ್ವಾಸ್ಥ್ಯ ಸಂತುಲನ ರಂಗೋಲಿ ಮಹೋತ್ಸವಕ್ಕಾಗಿ ರಂಗೋಲಿಯಲ್ಲಿ ವಿಶ್ವ ದಾಖಲೆ ಬರೆಯಲು ಮುಂದಾಗಿದ್ದಾರೆ.

ಸದರಿ ರಂಗೋಲಿಯಲ್ಲಿ ವೈದ್ಯಕೀಯ ವಿಷಯಗಳ ವೈವಿಧ್ಯಮಯ ವರ್ಣ ಚಿತ್ರಗಳನ್ನು ಬಿಡಿಸಲಾಗಿದೆ. 10*12 ಅಡಿ ವಿಸ್ತಾರದ, 250 ವಿನ್ಯಾಸಗಳ, 1500 ವಿದ್ಯಾರ್ಥಿಗಳು, ಉಪನ್ಯಾಸಕರಿಂದ 50 ಸಾವಿರ ಚದರ ಅಡಿಪ್ರದೇಶದಲ್ಲಿ ರಂಗೋಲಿ ಬಿಡಿಸಿ ದಾಖಲೆ ಬಿಡಿಸಲಾಗಿದೆ.

ವೈದ್ಯಕೀಯ ವಿಷಯಗಳು, ರೋಗಗಳು, ಕಾಯಿಲೆಗಳು, ಮನುಷ್ಯನ ದೇಹ ರಚನೆ, ಶರೀರದ ಅಂಗಾಂಗಗಳ ಕಾರ್ಯವಿಧಾನ, ವೈದ್ಯಕೀಯ ಕಾನೂನು ವಿಷಯಾಧಾರಿ ಚಿತ್ರಗಳು, ವಿನ್ಯಾಸಗಳು ಈ ದಾಖಲೆಯ ವರ್ಣಮಯ 250 ವೈವಿಧ್ಯಮಯ ವಿನ್ಯಾಸಗಳು ವರ್ಣಮಯ ರಂಗೋಲಿಯಲ್ಲಿ ಮೂಡಿಬಂದಿವೆ.

ದುಶ್ಚಟಗಳ ದುಷ್ಪರಿಣಾಮಗಳು, ಔಷಧೋಪಚಾರ, ಮುನ್ನೆಚ್ಚರಿಕೆ ಕ್ರಮಗಳು, ರೋಗಗಳ ನಿಯಂತ್ರಣ, ವ್ಯಾಯಾಮ, ಆಹಾರ ನಿಯಮತ ಸೇವನೆ, ಆರೋಗ್ಯದ ತುರ್ತು ಸಂದರ್ಭದಲ್ಲಿ ಕೈಗೊಳ್ಳಬೇಕಾದ ಪ್ರಾಥಮಿಕ ಚಿಕಿತ್ಸೆ, ಅತ್ಯಾಧುನಿಕ ವೈದ್ಯಕೀಯ ಚಿಕಿತ್ಸೆಗಳು ಸೇರಿದಂತೆ ಮನೋಸ್ಥೈರ್ಯ ಹೆಚ್ಚಳ, ಸ್ವಚ್ಛ ಪರಿಸರ, ಪ್ರಕೃತಿಯ ಸಂರಕ್ಷಣೆ, ಧ್ಯಾನ ಹೀಗೆ ವಿವಿಧ ವಿಷಯಗಳು ರಂಗೋಲಿಯಲ್ಲಿ ಚಿತ್ತಾರಗಳಾಗಿ ಮೂಡಿ ಬಂದಿವೆ.

ವಿಶ್ವ ದಾಖಲೆಯ ಬರೆಯುವ ವೈದ್ಯಕೀಯ ವಿಷಯಗಳ ಜಾಗೃತಿಗಾಗಿ ರಂಗೋಲಿ ಬಿಡಿಸಲು 10 ಟನ್ ರಂಗೋಲಿ ಪುಡಿ ಹಾಗೂ 15 ವೈವಿಧ್ಯಮಯ ವರ್ಣಗಳ ಬಳಕೆ ಮಾಡಲಾಗಿದೆ.

ತಲಾ 5 ವೈದ್ಯಕೀಯ ವಿದ್ಯಾರ್ಥಿಗಳ ತಂಡದ ರೂಪದಲ್ಲಿ ತಮ್ಮ ವೈದ್ಯಕೀಯ ಪಠ್ಯಕ್ರಮಕ್ಕೆ ಸಂಬಂಧಿಸಿದ ರಂಗೋಲಿ ಚಿತ್ರಗಳನ್ನು ಬಿಡಿಸಿದ್ದಾರೆ. ವಿಶ್ವವಿದ್ಯಾಲಯದ 24 ವಿಭಾಗಗಳ ವಿದ್ಯಾರ್ಥಿಗಳಿಗೆ ಕಾಲೇಜಿನ ಪ್ರಾಧ್ಯಾಪಕರು, 40 ಜನ ಮಾರ್ಗದರ್ಶಕರು ಮತ್ತು 20 ಜನ ಮೇಲ್ವಿಚಾರಕರು ವಿಶ್ವ ದಾಖಲೆ ಬರೆಯುವ ಈ ಸಾಧನೆಯಲ್ಲಿ ತಮ್ಮ ಪರಿಶ್ರಮ ಹಾಕಿದ್ದಾರೆ.

ವಿಶ್ವ ದಾಖಲೆ ಬರೆಯುವುದಕ್ಕಾಗಿ ರಂಗೋಲಿಯಲ್ಲಿ ವೈದ್ಯಕೀಯ ವಿಷಯಧಾರಿತ ವಿನ್ಯಾಸ ಬಿಡಿಸುವುದನ್ನು ಆನ್‍ಲೈನ್ ಮೂಲಕ ನೇರ ಪ್ರಸಾರ ಮಾಡಿದ್ದು, ಇದನ್ನು ಗಿನ್ನಿಸ್ ಬುಕ್ ಆಫ್ ರೆಕಾಡ್ರ್ಸ್, ವಲ್ರ್ಡ್ ಬುಕ್ ಆಫ್ ರೆಕಾರ್ಡ್ಸ್, ಇಂಡಿಯಾ ಬುಕ್ ಆಫ್ ರೆಕಾರ್ಡ್ಸ್, ಎಲೈಟ್ ವಲ್ರ್ಡ್ ರೆಕಾರ್ಡ್ಸ್, ಲಿಮ್ಕಾ ಬುಕ್ ಆಫ್ ರೆಕಾರ್ಡ್ಸ್ ದಾಖಲೆ ಸಂಸ್ಥೆಗಳ ಅಧಿಕಾರಿಗಳು ಪ್ರತಿಕ್ಷಣದ ಮಾಹಿತಿ ಪಡೆದಿದ್ದಾರೆ.

ವಿಶ್ವದಾಖಲೆಯ ವೈದ್ಯಕೀಯ ವಿಷಯಾಧಾರಿತ ರಂಗೋಲಿ ಬಿಡಿಸುವ ಕಾರ್ಯಕ್ರಮಕ್ಕೆ ಬಿಎಲ್‍ಡಿಇ ಡೀಮ್ಡ್ ವಿಶ್ವವಿದ್ಯಾಲಯದ ಕುಲಾಧಿಪತಿಯೂ ಆಗಿರುವ ಕೈಗಾರಿಕೆ ಸಚಿವ ಎಂ.ಬಿ.ಪಾಟೀಲ ಚಾಲನೆ ನೀಡಿ, ವಿಡಿಯೋ ಕಾಲ್ ಮೂಲಕ ಕಾರ್ಯಕ್ರಮದ ಮಾಹಿತಿ ವಿನಿಮಯ ಮಾಡಿಕೊಂಡಿರು.

ಜಿಲ್ಲಾಧಿಕಾರಿ ಭೂಬಾಲನ್, ವಿಶ್ವವಿದ್ಯಾಲಯದ ಸಮಕುಲಾಧಿಪತಿ ಡಾ.ವೈ.ಎಂ.ಜಯರಾಜ, ವೈದ್ಯಕೀಯ ಕಾಲೇಜಿನ ಪ್ರಾಚಾರ್ಯ ಡಾ.ಅರವಿಂದ ಪಾಟೀಲ, ವೈದ್ಯಕೀಯ ಅಧೀಕ್ಷಕ ಡಾ.ರಾಜೇಶ ಹೊನ್ನುಟಗಿ, ಡಾ.ದೀಪಕಕುಮಾರ ಚವ್ಹಾಣ, ಕಾರ್ಯಕ್ರಮ ಸಂಯೋಜಕಿ ಡಾ.ನಂದಿನಿ ಮುಚ್ಚಂಡಿ ಸೇರಿದಂತೆ ಇತರರು ಅವಿಸ್ಮರಣೀಯ ಘಟನೆಗೆ ಪ್ರತ್ಯಕ್ಷ ಸಾಕ್ಷಿಯಾದರು.