Paytm ಯುಪಿಐ ಸೇವೆ ಮುಂದುವರಿಸಲು ಅವಕಾಶ

Team Udayavani, Mar 15, 2024, 6:16 AM IST

ಮುಂಬಯಿ: ಎಸ್‌ಬಿಐ, ಆ್ಯಕ್ಸಿಸ್‌ ಬ್ಯಾಂಕ್‌, ಎಚ್‌ಡಿಎಫ್ಸಿ ಮತ್ತು ಯೆಸ್‌ ಬ್ಯಾಂಕ್‌ ಮೂಲಕ ಯುಪಿಐ ಕಾರ್ಯಾಚರಣೆ ಮುಂದುವರಿಸಲು ಪೇಟಿಎಂಗೆ ಭಾರತೀಯ ರಾಷ್ಟ್ರೀಯ ಪಾವತಿ ನಿಗಮ(ಎನ್‌ಪಿಸಿಐ) ಅವಕಾಶ ನೀಡಿದೆ. ಈ ಮೂಲಕ ಪೇಟಿಎಂ ಬಳಕೆದಾರರು ಯುಪಿಐ ಪಾವತಿ ಮುಂದುವರಿಸಬಹುದಾಗಿದೆ.

ಮಾ.15ರ ಅನಂತರ ಯಾವುದೇ ಗ್ರಾಹಕರ ಖಾತೆಗಳಿಗೆ ಠೇವಣಿ, ಸಾಲ ವರ್ಗಾವಣೆ, ಟಾಪ್‌ ಅಪ್‌ಗ್ಳನ್ನು ಸ್ವೀಕರಿಸದಂತೆ ಪೇಟಿಎಂ ಪೇಮೆಂಟ್ಸ್‌ ಬ್ಯಾಂಕ್‌ ಲಿ.(ಪಿಪಿಬಿಎಲ್‌)ಗೆ ಆರ್‌ಬಿಐ ನಿರ್ಬಂಧ ವಿಧಿಸಿದೆ. ಈ ಹಿನ್ನೆಲೆಯಲ್ಲಿ ಪೇಟಿಎಂ ಆ್ಯಪ್‌ ಹೊಂದಿರುವ ಬಳಕೆದಾರರು ಯುಪಿಐ ಪಾವತಿ ಗಳನ್ನು ಮುಂದುವರಿಸಲು ಎನ್‌ಪಿಸಿಐ ಅನುಮೋದನೆ ನೀಡಿದೆ.

ಆರ್‌ಬಿಐ ನಿರ್ಬಂಧದ ನಡುವೆ ಶೇ.20ರಷ್ಟು ಉದ್ಯೋಗಿಗಳ ವಜಾಗೆ ಪಿಪಿಬಿಎಲ್‌ ಮುಂದಾ ಗಿದೆ. 2023ರ ಡಿಸೆಂಬರ್‌ನ ಮಾಹಿತಿ ಪ್ರಕಾರ, ಪಿಪಿಬಿಎಲ್‌ನಲ್ಲಿ ಒಟ್ಟು 2,275 ಉದ್ಯೋಗಿಗಳು ಕಾರ್ಯನಿರ್ವಹಿ­ಸುತ್ತಿದ್ದಾರೆ.

ಪಿಪಿಬಿಎಲ್‌ ಖಾತೆ ಹೊಂದಿರುವ ಗ್ರಾಹಕರಿಗೆ ಶುಕ್ರವಾರದ ಬಳಿಕ‌ ಠೇವಣಿ, ವೇತನ ಪಾವತಿ, ಇತರ ಪಾವತಿ ಸಾಧ್ಯವಿಲ್ಲ. ಪಿಪಿಬಿಎಲ್‌ ಲಿಂಕ್‌ ಆಗಿರುವ ಖಾತೆಗಳಿಂದ ಯುಪಿಐ ಸಾಧ್ಯವಿಲ್ಲ. ಜತೆಗೆ ಫಾಸ್ಟಾಗ್‌, ಐಎಂಪಿಎಸ್‌ ಕಾರ್ಯಾಚರಣೆ ಸಾಧ್ಯವಿಲ್ಲ.