DEVIL; ಹೆಚ್ಚು ದಿನ ವಿಶ್ರಾಂತಿಯಿಲ್ಲ, ಅಕ್ಟೋಬರ್‌ನಲ್ಲಿ ಡೆವಿಲ್‌ ಬರೋದು ಪಕ್ಕಾ: ದರ್ಶನ್‌

Team Udayavani, Apr 5, 2024, 3:03 PM IST

ನಟ ದರ್ಶನ್‌ ಅವರ ಎಡಗೈಗೆ ಗುರುವಾರ ಶಸ್ತ್ರಚಿಕಿತ್ಸೆ ನಡೆದಿದೆ. ಅದಕ್ಕೆ ಕಾರಣ “ಡೆವಿಲ್‌’ ಚಿತ್ರೀಕರಣದ ವೇಳೆ ಏಟು ಬಿದ್ದಿದ್ದು. ಸಹಜವಾಗಿಯೇ ಸಿನಿಮಾ ಪ್ರೇಮಿಗಳಲ್ಲಿ ಒಂದು ಪ್ರಶ್ನೆ ಎದ್ದಿದೆ, ಅದು ಸಿನಿಮಾ ಶೂಟಿಂಗ್‌ ತಡವಾಗುತ್ತಾ ಎಂಬುದು. ಖಂಡಿತಾ ಇಲ್ಲ, ದರ್ಶನ್‌ ಹೆಚ್ಚು ದಿನ ವಿಶ್ರಾಂತಿ ಪಡೆಯುತ್ತಿಲ್ಲ. ಶೀಘ್ರದಲ್ಲೇ ಚಿತ್ರೀಕರಣಕ್ಕೆ ಮರಳಲಿದ್ದಾರೆ.

ಈ ಕುರಿತು ಮಾತನಾಡುವ ದರ್ಶನ್‌, “ಡೆವಿಲ್‌ ಶೂಟಿಂಗ್‌ ಸಮಯದಲ್ಲಿ ಕೈಗೆ ಪೆಟ್ಟಾಗಿತ್ತು. ವೈದ್ಯರು ಕೂಡಲೇ ಆಪರೇಶನ್‌ ಮಾಡಬೇಕೆಂದು ಹೇಳಿದರು. ಆದರೆ, ಒಮ್ಮೆಲೇ ಆಪರೇಶನ್‌ಗೆ ಹೋದರೆ ಫೈಟ್‌ ಮಾಸ್ಟರ್ ಸೇರಿದಂತೆ ಎಲ್ಲರ ಕಾಲ್‌ಶೀಟ್‌ನಲ್ಲಿ ತೊಂದರೆಯಾಗುತ್ತದೆ ಎಂದು. ಇಷ್ಟು ದಿನ ಮುಂದೆ ಹಾಕಿಕೊಂಡು ಬಂದೆ’ ಎನ್ನುತ್ತಾರೆ.

ಶಸ್ತ್ರಚಿಕಿತ್ಸೆ ಆದ ನಂತರ ದರ್ಶನ್‌ ಎಷ್ಟು ದಿನ ವಿಶ್ರಾಂತಿಯಲ್ಲಿರಬೇಕು ಎಂಬ ಪ್ರಶ್ನೆ ಸಹಜ. “ಹೆಚ್ಚು ದಿನ ವಿಶ್ರಾಂತಿ ಪಡೆಯುತ್ತಿಲ್ಲ. ಮುಂದಿನ ವಾರದಿಂದ ಮತ್ತೆ ಚಿತ್ರೀಕರಣಕ್ಕೆ ಹೋಗುತ್ತೇನೆ. ಅಕ್ಟೋಬರ್‌ನಲ್ಲಿ ಬರುತ್ತೇನೆ ಎಂದು ಪ್ರಾಮಿಸ್‌ ಮಾಡಿದ್ದೇನೆ. ಅದರಂತೆ ಸಿನಿಮಾವನ್ನು ರಿಲೀಸ್‌ ಮಾಡಬೇಕಿದೆ’ ಎನ್ನುವುದು ದರ್ಶನ್‌ ಮಾತು.

ಇನ್ನು, ದರ್ಶನ್‌ ಕೈ ನೋವಿನಲ್ಲೂ ತಮ್ಮ ಆಪ್ತರ ಕಾರ್ಯಕ್ರಮಗಳಲ್ಲಿ ಭಾಗಿಯಾಗಿ, ಬೆಂಬಲ ನೀಡಿದ್ದರು

ಕ್ರೇಜ್‌ ಹೆಚ್ಚಿಸಿದ ಫ‌ಸ್ಟ್‌ಲುಕ್‌

“ಡೆವಿಲ್‌’ ಚಿತ್ರದ ಫ‌ಸ್ಟ್‌ಲುಕ್‌ ಟೀಸರ್‌ ಬಿಡುಗಡೆಯಾಗಿ, ಹಿಟ್‌ಲಿಸ್ಟ್‌ ಸೇರಿದೆ. ಟೀಸರ್‌ನಲ್ಲಿ ಅಭಿಮಾನಿಗಳಿಗೆ ಹೊಸ ದರ್ಶನ್‌ ಸಿಕ್ಕಿದ್ದಾರೆ. ಅದು ನೆಗೆಟಿವ್‌ ಶೇಡ್‌ನ‌ಲ್ಲಿ. ಟೀಸರ್‌ನಲ್ಲಿ ಬರುವ ಡೈಲಾಗ್‌ ಕೂಡಾ ಗಮನ ಸೆಳೆದಿದೆ. “ನಮ್ಮ ಮನೆಯಲೊಂದು ಪುಟ್ಟ ಪಾಪು ಇರುವುದು. ಫೋಟೋ ತೆಗೆದರೆ ಅದಕೆ ಬಲು ಕೋಪ ಬರುವುದು. ಫೋಟೋ ತೆಗೆದ ಪಾಪು ಕೈಯ ಮುರಿದು ಬಿಡುವುದು. ಸರ್ಸು ಪಾಪು ಹೆಸರು ಕೇಳಲ್ವ? ಡೆವಿಲ್‌ ‘ ಎಂದು ಹೇಳಿ ದರ್ಶನ್‌ ಅವರು ಜೋರಾಗಿ ನಗುತ್ತಾರೆ. ಈ ಟೀಸರ್‌ ಗಮನ ಸೆಳೆದಿದೆ. ದರ್ಶನ್‌ ಹಾವ-ಭಾವ ಇಷ್ಟ ಆಗಿದೆ. ಅವರ ಲುಕ್‌ ಕೂಡ ಬೇರೆಯದೇ ರೀತಿಯಲ್ಲಿ ಇದೆ. ಮಿಲನಾ ಪ್ರಕಾಶ್‌ ಈ ಚಿತ್ರದ ನಿರ್ದೇಶಕರು.