Siddaramaiah ಪಕ್ಷ ಬೇರೆಯಾದರೂ ಸಂಸದ ಪ್ರಸಾದ್‌ ಜತೆಗಿನ ಸ್ನೇಹಕ್ಕೆ ಧಕ್ಕೆ ಇರಲಿಲ್ಲ

Team Udayavani, May 12, 2024, 12:22 AM IST

ಮೈಸೂರು: ನಮ್ಮ ಹಾಗೂ ಶ್ರೀನಿವಾಸ ಪ್ರಸಾದ್‌ ಅವರ ಪಕ್ಷಗಳು ಬೇರೆಯಾದರೂ ಸ್ನೇಹಕ್ಕೆ ಧಕ್ಕೆ ಇರಲಿಲ್ಲ. ರಾಜಕೀಯವಾಗಿ ದೂರ ಇದ್ದರೂ ಹಿಂದಿನಷ್ಟೇ ಆತ್ಮೀಯತೆಯಿಂದ ಮಾತನಾಡಿಸುತ್ತಿದ್ದರು. ನಮ್ಮ ನಡುವೆ ಪರಸ್ಪರ ಗೌರವ, ಸ್ನೇಹ ಇತ್ತು ಎಂದು ಮುಖ್ಯಮಂತ್ರಿ ಸಿದ್ದರಾಮಯ್ಯ ಅವರು ತಮ್ಮ ಹಾಗೂ ಶ್ರೀನಿವಾಸ ಪ್ರಸಾದ್‌ ನಡುವಿನ ಬಾಂಧವ್ಯವನ್ನು ಮೆಲುಕು ಹಾಕಿದರು.

ಡಾ| ಬಿ.ಆರ್‌.ಅಂಬೇಡ್ಕರ್‌ ಶೈಕ್ಷಣಿಕ ಹಾಗೂ ಸಾಂಸ್ಕೃತಿಕ ಟ್ರಸ್ಟ್‌, ಸಮಾನತೆ, ಸ್ವಾಭಿಮಾನ, ಸ್ವಾವಲಂಬನೆ ಪ್ರತಿಷ್ಠಾನ ಹಾಗೂ ಸಮಾನತೆ ಪ್ರಕಾಶನದ ವತಿಯಿಂದ ಶನಿವಾರ ಆಯೋಜಿಸಿದ್ದ “ವಿ.ಶ್ರೀನಿವಾಸ ಪ್ರಸಾದ್‌: ಶ್ರದ್ಧಾಂಜಲಿ ಸ್ವಾಭಿಮಾನಿಗೆ ಸಾವಿರದ ನುಡಿ ನಮನ’ ಕಾರ್ಯಕ್ರಮದ ಅಧ್ಯಕ್ಷತೆ ವಹಿಸಿ ಅವರು ಮಾತನಾಡಿದರು.

ಇತ್ತೀಚಿನ ದಿನಗಳಲ್ಲಿ ಅವರ ಜತೆ ನನ್ನ ಭೇಟಿಯಾಗಿರಲಿಲ್ಲ. ಅವರು ಚುನಾವಣ ರಾಜಕೀಯದಿಂದ ನಿವೃತ್ತಿ ಹೊಂದಿದ ಮೇಲೆ, ಅವರನ್ನು ಭೇಟಿಯಾಗಿ ಬರುವಂತೆ ಮಹದೇವಪ್ಪ ಅವರಿಗೆ ಸೂಚನೆ ನೀಡಿದ್ದೆ. ಮಹದೇವಪ್ಪ ಅವರು ಪ್ರಸಾದ್‌ ಅವರನ್ನು ನೋಡಿಕೊಂಡು ಬಂದರು. ನಾನು ಹೋಗಿ ಭೇಟಿ ಮಾಡಬೇಕೋ-ಬೇಡವೋ ಎನ್ನುವ ಗೊಂದಲದಲ್ಲಿ ಇದ್ದಾಗ, ಮಹದೇವಪ್ಪ ಹೋಗಿ ನೋಡಿಕೊಂಡು ಬನ್ನಿ ಎಂದರು. ನಾನು ಹೋದಾಗ ಹಿಂದಿನ ಸ್ನೇಹದ ರೀತಿಯಲ್ಲೇ ಮಾತನಾಡಿಸಿದ್ದರು ಎಂದರು.