Tollywood: ಬಹುನಿರೀಕ್ಷಿತ ʼಪುಷ್ಪ-2ʼ ರಿಲೀಸ್‌ ಡೇಟ್‌ ಮುಂದೂಡಿಕೆ?

Team Udayavani, May 16, 2024, 3:38 PM IST

ಹೈದರಾಬಾದ್:‌ ಅಲ್ಲು ಅರ್ಜುನ್‌ ಅವರ ಬಹು ನಿರೀಕ್ಷಿತ ಪ್ಯಾನ್‌ ಇಂಡಿಯಾ ʼಪುಷ್ಪ-2ʼ ಚಿತ್ರದ ಬಗ್ಗೆ ದಿನ ಕಳೆದಂತೆ ಕುತೂಹಲ ಹೆಚ್ಚಾಗುತ್ತಿದೆ. ಇನ್ನೇನು ಕೆಲವೇ ತಿಂಗಳಿನಲ್ಲಿ ಬಿಗ್‌ ಸ್ಕ್ರೀನ್‌ ಮೇಲೆ ಸಿನಿಮಾ ಅಪ್ಪಳಿಸಲಿದೆ.

ಶೂಟಿಂಗ್‌ ಹಂತದಲ್ಲಿರುವ ಸಿನಿಮಾ ಪೋಸ್ಟರ್‌, ಬರ್ತ್‌ ಡೇ ಟೀಸರ್‌ ಹಾಗೂ ಫಸ್ಟ್‌ ಸಿಂಗಲ್‌ ಹಾಡಿನಿಂದ ಹೈಪ್‌ ಹೆಚ್ಚಿಸಿದೆ. ಇತ್ತೀಚೆಗೆ ಬಂದ ʼಪುಷ್ಪ ಪುಷ್ಪʼ ಹಾಡು ಸಖತ್‌ ಸೌಂಡ್‌ ಮಾಡಿದೆ.

ದೊಡ್ಡಮಟ್ಟದಲ್ಲೇ ಸದ್ದು ಮಾಡಿರುವ ʼಪುಷ್ಪ-2ʼ ಸಿನಿಮಾದ ಬಗ್ಗೆ ಟಾಲಿವುಡ್‌ ನಲ್ಲಿ ನೆಗೆಟಿವ್‌ ಸುದ್ದಿಯೊಂದು ಹರಿದಾಡಿದೆ. ರಿಲೀಸ್‌ ಗಾಗಿ ಕಾಯುತ್ತಿರುವ ಫ್ಯಾನ್ಸ್‌ ಗಳಿಗೆ ಈ ವಿಚಾರ ಭಾರೀ ನಿರಾಸೆ ಮೂಡಿಸಿದೆ.

ʼಪುಷ್ಪ-2ʼ ಚಿತ್ರದ ರಿಲೀಸ್‌ ಡೇಟ್‌ ಮುಂದೂಡಿಕೆ ಆಗಿದೆ ಎನ್ನುವ ವಿಚಾರ ಟಾಲಿವುಡ್‌ ನಲ್ಲಿ ಹರಿದಾಡಿದೆ.

ಚಿತ್ರದ ಎಡಿಟರ್ ಆಂಟೋನಿ ರೂಬೆನ್ ದಿನಾಂಕ ಹೊಂದಾಣಿಕೆಯಾಗದ ಕಾರಣದಿಂದ ಸಿನಿಮಾದಿಂದ ಹೊರನಡೆದಿದ್ದಾರೆ. ಅವರ ಬದಲಿಗೆ‌ ನವೀನ್ ನೂಲಿ ಅವರು ಬರಲಿದ್ದಾರೆ. ಈ ಕಾರಣದಿಂದ ಸಿನಿಮಾದ ರಿಲೀಸ್ ಡೇಟ್‌ ಮುಂದೂಡಿಕೆ ಆಗಿದೆ ಎಂದು ಕೆಲ ತೆಲುಗು ವೆಬ್‌ ಸೈಟ್‌ ಗಳು ವರದಿ ಮಾಡಿದೆ.

ಆದರೆ ರಿಲೀಸ್‌ ಡೇಟ್‌ ಯಾವುದೇ ಕಾರಣದಿಂದ ಮುಂದೂಡಿಕೆ ಆಗಿಲ್ಲ ಎಂದು ಮೂಲವೊಂದು ಹೇಳಿರುವುದಾಗಿ ʼಹಿಂದೂಸ್ತಾನ್‌ ಟೈಮ್ಸ್‌ʼ ವರದಿ ಮಾಡಿದೆ.

ʼಪುಷ್ಪ 2ʼ ಆಗಸ್ಟ್ 15 ರಂದೇ ಬಿಡುಗಡೆಯಾಗಲಿದೆ. ಇದರಲ್ಲಿ ಯಾವುದೇ ಸಂಶಯವಿಲ್ಲ. ಅಲ್ಲು ಅರ್ಜುನ್ ಈ ತಿಂಗಳು ಚಿತ್ರದ ಚಿತ್ರೀಕರಣವನ್ನು ಪೂರ್ಣಗೊಳಿಸಲಿದ್ದಾರೆ. ಜೂನ್ ವೇಳೆಗೆ ಉಳಿದ ಚಿತ್ರೀಕರಣವನ್ನು ಪೂರ್ಣಗೊಳಿಸಲಾಗುವುದು. ಹಾಗಾಗಿ ಚಿತ್ರ ತಡವಾಗುವ ಸಾಧ್ಯತೆ ಇಲ್ಲ” ಎಂದು ಮೂಲಗಳು ಹೇಳಿರುವುದಾಗಿ ವರದಿ ತಿಳಿಸಿದೆ.

ಚಿತ್ರದ ಎಡಿಟರ್ ಬದಲಾಯಿಸಲಾಗಿದೆಯೇ ಎನ್ನುವ ಪ್ರಶ್ನೆಗೆ ಸ್ಷಷ್ಟವಾದ ಉತ್ತರ ಮೂಲಗಳಿಂದ ತಿಳಿದು ಬಂದಿಲ್ಲ.

ಸುಕುಮಾರ್‌ ನಿರ್ದೇಶನದ ಈ ಸಿನಿಮಾದಲ್ಲಿ ಅಲ್ಲು ಅರ್ಜುನ್‌, ರಶ್ಮಿಕಾ ಮಂದಣ್ಣ, ಫಾಹಾದ್‌ ಫಾಸಿಲ್‌ ಮುಂತಾದವರು ನಟಿಸಿದ್ದಾರೆ. ಇದೇ ಆಗಸ್ಟ್‌ 15 ರಂದು ಸಿನಿಮಾ ತೆರೆಕಾಣಲಿದೆ.