GalaxEye; ರಾತ್ರಿಯಲ್ಲೂ ಭೂಮಿ ಚಿತ್ರ ಕ್ಲಿಕ್ಕಿಸುವ ಟೆಕ್ನಾಲಜಿ ಪರೀಕ್ಷೆ

Team Udayavani, May 22, 2024, 5:54 AM IST

ಹೊಸದಿಲ್ಲಿ: ಮೋಡ ಕವಿದಿದ್ದರೂ ಮತ್ತು ರಾತ್ರಿಯ ವೇಳೆಯೂ ಭೂಮಿಯ ಚಿತ್ರವನ್ನು ಸೆರೆ ಹಿಡಿಯಬಲ್ಲ ಸ್ವದೇಶಿ ನಿರ್ಮಿತ ಸಿಂಥೆಟಿಕ್‌ ಅಪರ್ಚರ್‌ ರೇಡಾರ್‌(ಎಸ್‌ಎಆರ್‌) ತಂತ್ರಜ್ಞಾನದ ಪರೀಕ್ಷೆಯನ್ನು ಬೆಂಗಳೂರು ಮೂಲದ ಸ್ಟಾರ್ಟ್‌ಅಪ್‌ ಗ್ಯಾಲಕ್ಸಿಐ ಯಶಸ್ವಿಯಾಗಿ ನೆರವೇರಿಸಿದೆ.

ಮೇ 13ರಂದು 25,000 ಅಡಿ(7.62 ಕಿ.ಮೀ.) ಎತ್ತರದಲ್ಲಿ ಹಾರಾಟ ನಡೆಸಿದ ಹೈ ಅಲ್ಟಿಟ್ಯೂಟ್‌ ಸ್ಯೂಡೋ ಸ್ಯಾಟ್‌ಲೈಟ್‌ (ಎಚ್‌ಎಪಿಎಸ್‌) ಡ್ರೋನ್‌ ಮೂಲಕ ಸಿಎಸ್‌ಐಆರ್‌-ನ್ಯಾಷನಲ್‌ ಏರೋಸ್ಪೇಸ್‌ ಲ್ಯಾಬೋರೇಟರಿ (ಸಿಎಸ್‌ಐಆರ್‌-ಎನ್‌ಎಎಲ್‌) ಈ ಪರೀಕ್ಷೆ ನಡೆಸಿದೆ. ಸಿಂಥೆಟಿಕ್‌ ಅಪರ್ಚರ್‌ ರೇಡಾರನ್ನು 1 ಕಿ.ಮೀ. ಎತ್ತರದಲ್ಲಿ ಪರೀಕ್ಷಿಸಲಾಗಿದ್ದು, ಹಂತ ಹಂತವಾಗಿ ಅದನ್ನು 7 ಕಿ.ಮೀ.ಗೆ ಹೆಚ್ಚಿಸಲಾಗುವುದು ಎಂದು ಗ್ಯಾಲಕ್ಸಿಐ ಸಹ ಸಂಸ್ಥಾಪಕ ಸುಯಶ್‌ ಸಿಂಗ್‌ ತಿಳಿಸಿದ್ದಾರೆ.

ಗ್ಯಾಲಕ್ಸಿ ಐ ಈ ರೀತಿಯ ಸಾಧನೆ ಮಾಡಿದ ಮೊದಲ ಖಾಸಗಿ ಕಂಪನಿಯಾಗಿದೆ ಎಂದು ಅವರು ತಿಳಿಸಿದ್ದಾರೆ. ಎಚ್‌ಎಪಿಎಸ್‌ಗಳಿಗಾಗಿ ಎಸ್‌ಎಆರ್‌ ತಂತ್ರಜ್ಞಾನವು ಜಾಗತಿಕವಾಗಿ ಕೆಲವೇ ರಾಷ್ಟ್ರಗಳ ಸರ್ಕಾರಿ ಸಂಸ್ಥೆಗಳಿಗೆ, ಕನಿಷ್ಠ ಕಾರ್ಯಾಚರಣೆಯ ಜಾರಿಯೊಂದಿಗೆ ಮಾತ್ರವೇ ಸೀಮಿತವಾಗಿವೆ ಎಂದು ತಿಳಿಸಿದ್ದಾರೆ.