ಹೊರಬಿತ್ತು ಅಂಬಾನಿ ಪುತ್ರನ ವೆಡ್ಡಿಂಗ್ ಕಾರ್ಡ್‌: ಎಲ್ಲಿ,ಯಾವಾಗ,ವಿಶೇಷಗಳೇನು? ಇಲ್ಲಿದೆ ವಿವರ

Team Udayavani, May 30, 2024, 5:55 PM IST

ಮುಂಬಯಿ: ಉದ್ಯಮಿ ಮುಕೇಶ್‌ – ನೀತಾ ಅಂಬಾನಿ ಪುತ್ರ ಅನಂತ್  – ರಾಧಿಕಾ ಮರ್ಚೆಂಟ್ ಅವರ ಎರಡನೇ ಪ್ರೀ ವೆಡ್ಡಿಂಗ್‌ ಕಾರ್ಯಕ್ರಮ ಇಟಲಿಯಲ್ಲಿ ನಡೆಯುತ್ತಿದೆ.

ಬಿಟೌನ್‌ ನ ಖ್ಯಾತ ಸೆಲೆಬ್ರಿಟಿಗಳು ಸೇರಿದಂತೆ ಅಂಬಾನಿ ಕುಟುಂಬದ ಆತ್ಮೀಯರು ಕ್ರೂಸ್‌ ನಲ್ಲಿ ನಡೆಯುತ್ತಿರುವ ಅದ್ಧೂರಿ ಪ್ರೀ ವೆಡ್ಡಿಂಗ್‌ ನಲ್ಲಿ ಭಾಗಿಯಾಗಿದ್ದಾರೆ. ಇದೀಗ ಅನಂತ್‌ – ರಾಧಿಕಾ ಅವರ ವಿವಾಹ ಸಮಾರಂಭದ ಆಮಂತ್ರಣ ಪತ್ರ ಬಿಡುಗಡೆ ಆಗಿದ್ದು, ಸೋಶಿಯಲ್‌ ಮೀಡಿಯಾದಲ್ಲಿ ವೈರಲ್‌ ಆಗಿದೆ.

ಗುರುವಾರ(ಮೇ.30 ರಂದು) ʼಸೇವ್ ದಿ ಡೇಟ್‌ʼ ಎಂದು ಬರೆದಿರುವ ಆಮಂತ್ರಣ ಪತ್ರ ರಿವೀಲ್‌ ಆಗಿದೆ. ಕೆಂಪು ಮತ್ತು ಚಿನ್ನದ ಸಾಂಪ್ರದಾಯಿಕ ಶೇಡ್ಸ್‌ ನಿಂದ ವಿನ್ಯಾಸಗೊಳಿಸಲಾದ ಆಹ್ವಾನ ಪತ್ರಿಕೆಯಲ್ಲಿ ಮೂರು ದಿನಗಳ ಕಾಲ ನಡೆಯುವ ಕಾರ್ಯಕ್ರಮದ ವಿವರವನ್ನು ಬಹಿರಂಗಪಡಿಸಲಾಗಿದೆ.

ಜುಲೈ 12 ರಂದು ನಡೆಯುವ ಸಮಾರಂಭಕ್ಕೆ ʼಶುಭ್‌ ವಿವಾಹʼ ಎಂದು ಹೆಸರಿಡಲಾಗಿದೆ. ಈ ಕಾರ್ಯಕ್ರಮಕ್ಕೆ “ಭಾರತೀಯ ಸಾಂಪ್ರದಾಯಿಕ” ಡ್ರೆಸ್‌ ಕೋಡ್‌ ಇರಲಿದೆ.

ಜುಲೈ 13 ರಂದು “ಶುಭ್‌ ಆಶೀರ್ವಾದ್ ” ಸಮಾರಂಭ ನಡೆಯಲಿದೆ. ಇದರಲ್ಲಿ ಭಾರತದ ಫಾರ್ಮಲ್‌ ಡ್ರೆಸ್‌ ಕೋಡ್‌ ಇರಲಿದೆ.

ಜುಲೈ 14 ರಂದು ʼಮಂಗಲ್‌ ಉತ್ಸವ್‌ʼ(ಮದುವೆ ಆರತಕ್ಷತೆ) ನಡೆಯಲಿದೆ. ಈ ಸಮಾರಂಭದಲ್ಲಿ ಭಾರತದ ಸ್ಟೈಲಿಸ್ಟ್‌ ಉಡುಗೆಗಳ ಡ್ರೆಸ್‌ ಕೋಡ್‌ ಇರಲಿದೆ.

ಎಲ್ಲಾ ಸಮಾರಂಭ ಮುಂಬೈನಲ್ಲಿರುವ ಜಿಯೋ ವರ್ಲ್ಡ್ ಕನ್ವೆನ್ಷನ್ ಸೆಂಟರ್ ನಲ್ಲಿ ನಡೆಯಲಿದೆ.

ಸದ್ಯ ಈ ಮದುವೆ ಆಮಂತ್ರಣ ಪತ್ರವನ್ನು ಅಂಬಾನಿ ಕುಟುಂಬಸ್ಥರು ಕೆಲವರಿಗೆ ಮಾತ್ರ ಕಳುಹಿಸಿದ್ದಾರೆ ಎನ್ನಲಾಗಿದೆ.