Israel ಸಡ್ಡು; ಮಾಲ್ದೀವ್ಸ್‌ ಬೀಚ್‌ ಬಿಡಿ, ಭಾರತಕ್ಕೆ ತೆರಳಿ

Team Udayavani, Jun 4, 2024, 6:35 AM IST

ಮಾಲೆ: ಭಾರತೀಯರ ಕೆಂಗಣ್ಣಿಗೆ ಗುರಿಯಾಗಿ ಇಕ್ಕಟ್ಟಿಗೆ ಸಿಲುಕಿದ ಮಾಲ್ದೀವ್ಸ್‌ಗೆ ಈಗ ಇಸ್ರೇಲ್‌ ನಾಗರಿಕರೂ ಸಡ್ಡು ಹೊಡೆಯುವುದು ಖಚಿತವಾಗಿದೆ. ಗಾಜಾ ಯುದ್ಧ ಖಂಡಿಸಿ ಪ್ರತಿಭಟನಾರ್ಥವಾಗಿ ಮಾಲ್ಡೀವ್ಸ್‌ ಇಸ್ರೇಲ್‌ ಪಾಸ್‌ಪೋರ್ಟ್‌ ಹೊಂದಿರುವವರಿಗೆ ತನ್ನ ದೇಶ ಪ್ರವೇಶಿಸಲು ನಿರ್ಬಂಧ ಹೇರಿದೆ. ಇದರ ಬೆನ್ನಲ್ಲೇ ಮಾಲ್ದೀವ್ಸ್‌ಗೆ ತಿರುಗೇ ಟು ನೀಡಿರುವ ಇಸ್ರೇಲ್‌, “ಮಾಲ್ದೀವ್ಸ್‌ ಗೆ ಯಾರೂ ಹೋಗಬೇಡಿ. ಅದರ ಬದಲು ಭಾರತದ ಸುಂದರ ಬೀಚ್‌ಗಳಿಗೆ ಭೇಟಿ ನೀಡಿ’ ಎಂದು ತನ್ನ ನಾಗರಿಕರಿಗೆ ಸಲಹೆ ನೀಡಿದೆ.

ಇಸ್ರೇಲ್‌ ಪಾಸ್‌ಪೋರ್ಟ್‌ ಹೊಂದಿರುವ ಯಾವುದೇ ವ್ಯಕ್ತಿ ದೇಶದೊಳಕ್ಕೆ ಪ್ರವೇಶ ಮಾಡದಂತೆ ಪರಿಶೀಲಿಸುವ ನಿಟ್ಟಿನಲ್ಲಿ ದೇಶದ ಕಾನೂನಿನಲ್ಲಿ ಸೂಕ್ತ ಮಾರ್ಪಾಡು ಮಾಡಲಾಗಿದೆ ಎಂದು ಮಾಲ್ದೀವ್ಸ್‌ ಸರಕಾರ ಪ್ರಕಟಿಸಿತ್ತು. ಈಗಾಗಲೇ ಬಾಂಗ್ಲಾದೇಶ, ಅಲ್ಜೀರಿಯಾ, ಬ್ರೂನೈ, ಇರಾನ್‌, ಸಿರಿಯಾ ಸೇರಿದಂತೆ 12 ದೇಶಗಳು ಇಸ್ರೇಲ್‌ ಪ್ರಜೆಗಳ ಪ್ರವೇಶಕ್ಕೆ ನಿಷೇಧ ಹೇರಿವೆ.

ಪಟ್ಟಿ ಕೊಟ್ಟ ಇಸ್ರೇಲ್‌: ಇಸ್ರೇಲ್‌ ರಾಯಭಾರ ಕಚೇರಿಯು ಭಾರತದ ಸಮುದ್ರತೀರಗಳ ಪಟ್ಟಿಯನ್ನು ಟ್ವೀಟ್‌ ಮಾಡಿದ್ದು ಭೇಟಿ ನೀಡುವಂತೆ ತನ್ನ ಪ್ರಜೆಗಳಿಗೆ ಸಲಹೆ ನೀಡಿದೆ.