Ukraine ನ್ಯಾಟೊ ಜತೆ ಸೇರದಿದ್ದರೆ ಕದನ ವಿರಾಮ ಘೋಷಣೆ: ಪುತಿನ್‌

Team Udayavani, Jun 15, 2024, 6:34 AM IST

ಮಾಸ್ಕೋ: ಉಕ್ರೇನ್‌ ನ್ಯಾಟೊ ಸಂಘಟನೆಗೆ ಸೇರಿ ಕೊಳ್ಳಬಾರದು ಹಾಗೂ ರಷ್ಯಾದಲ್ಲಿನ ತನ್ನ ಸೈನ್ಯಗಳನ್ನು ಹಿಂಪಡೆದುಕೊಂಡರೆ ಕೂಡಲೇ ಕದನ ವಿರಾಮ ಘೋಷಿಸುತ್ತೇವೆ ಎಂದು ರಷ್ಯಾ ಅಧ್ಯಕ್ಷ ವ್ಲಾದಿಮಿರ್‌ ಪುತಿನ್‌ ತಿಳಿಸಿದ್ದಾರೆ.

ಕಳೆದ ಎರಡು ವರ್ಷಗಳಿಂದ ರಷ್ಯಾ- ಉಕ್ರೇನ್‌ ನಡುವೆ ಯುದ್ಧ ನಡೆಯುತ್ತಿದ್ದು, ಯುದ್ಧದ ಅಂತ್ಯ ಹಾಗೂ ಶಾಂತಿ ಸ್ಥಾಪನೆಗೆ ರಷ್ಯಾ ಈ ಪ್ರಸ್ತಾವನೆ ಇಟ್ಟಿದೆ.

ಅಶಾಂತಿಯ ದುರ್ಘ‌ಟನೆಗಳನ್ನು ನಿಲ್ಲಿಸಿ, ರಷ್ಯಾ ಹಾಗೂ ಉಕ್ರೇನ್‌ ನಡುವೆ ಏಕತೆ ಸ್ಥಾಪಿಸಲು ನಾವು ಬಯಸುತ್ತೇವೆ. ಉಕ್ರೇನ್‌ ತನ್ನ ಪ್ರದೇಶಗಳ ಬಗ್ಗೆ ನಿಖರ ಮಾಹಿತಿ ನೀಡಬೇಕು ಮತ್ತು ನ್ಯಾಟೊ ಸಂಘಟನೆಗೆ ಸೇರುವ ಯೋಜನೆ ಕೈ ಬಿಡಬೇಕು. 2022ರಲ್ಲಿ ರಷ್ಯಾ ವಶಪಡಿಸಿಕೊಂಡ 4 ಪ್ರದೇಶಗಳಲ್ಲಿ ಉಕ್ರೇನ್‌ ಸೈನ್ಯ ಉಳಿದುಕೊಂಡಿವೆ. ಶೀಘ್ರ ತನ್ನ ಸೈನ್ಯಗಳನ್ನು ಉಕ್ರೇನ್‌ ಹಿಂಪ ಡೆಯಬೇಕು. ಈ ಪ್ರಸ್ತಾವನೆಗೆ ಉಕ್ರೇನ್‌ ಒಪ್ಪದಿದ್ದರೆ, ಮುಂದಿನ ಅನಾಹುತಗಳಿಗೆ ಅವರೇ ಹೊಣೆಯಾಗುತ್ತಾರೆ ಎಂದು ಪುಟಿನ್‌ ಎಚ್ಚರಿಕೆ ನೀಡಿದ್ದಾರೆ. ರಷ್ಯಾದ ಈ ಪ್ರಸ್ತಾವನೆಗೆ ಉಕ್ರೇನ್‌ ಇನ್ನೂ ಯಾವುದೇ ಪ್ರತಿಕ್ರಿಯೆ ನೀಡಿಲ್ಲ. 2022ರ ಫೆಬ್ರವರಿಯಿಂದ ರಷ್ಯಾ ಮತ್ತು ಉಕ್ರೇನ್‌ ನಡುವೆ ಸೇನಾ ಕಾರ್ಯಾಚರಣೆ ನಡೆಯುತ್ತಿದೆ. ಇದುವರೆಗೂ ಕದನ ವಿರಾಮ ಘೋಷಣೆಯಾಗಿಲ್ಲ.