Surathkal ಕುಳಾಯಿ ಕಿರು ಜೆಟ್ಟಿಯ ಬ್ರೇಕ್‌ವಾಟರ್‌ ಕಲ್ಲು ಸಮುದ್ರಪಾಲು

Team Udayavani, Jun 24, 2024, 1:25 AM IST

ಸುರತ್ಕಲ್‌: ಕುಳಾಯಿ ಹೊಸಬೆಟ್ಟು ಬಳಿ ನಿರ್ಮಾಣವಾಗುತ್ತಿರುವ ನೂತನ ಕಿರು ಜಟ್ಟಿಯ ಬ್ರೇಕ್‌ ವಾಟರ್‌ನ ಒಂದು ಭಾಗ ಸಮುದ್ರದ ಅಬ್ಬರಕ್ಕೆ ರವಿವಾರ ಕೊಚ್ಚಿಹೋಗಿದೆ.

ಕಳೆದ ವರ್ಷದ ಮೇ ತಿಂಗಳಿನಲ್ಲಿ ಬ್ರೇಕ್‌ ವಾಟರ್‌ನ ಕಾಮಗಾರಿ ಆರಂಭವಾಗಿ ಕೆಲವು ತಿಂಗಳ ಹಿಂದೆಯಷ್ಟೇ ಮುಗಿದಿತ್ತು. ಈಗ ಪೂರ್ವ ಭಾಗದ ಬ್ರೇಕ್‌ ವಾಟರ್‌ ಕುಸಿದು, ಇಬ್ಭಾಗವಾಗಿದೆ. ಪಶ್ಚಿಮ ದಿಕ್ಕಿನಲ್ಲಿರುವ ಇನ್ನೊಂದು ಬ್ರೇಕ್‌ ವಾಟರ್‌ ಸದ್ಯ ಸುರಕ್ಷಿತವಾಗಿದೆ.

ಒಂದು ಮಳೆಗಾಲವನ್ನೂ ಎದುರಿಸಿಲ್ಲ!
ಕಳೆದ ವರ್ಷದ ಮಳೆಗಾಲದ ವೇಳೆ ಕಾಮಗಾರಿ ಆರಂಭವಾಗಿತ್ತಷ್ಟೇ. ಅನಂತರ ಎದುರಾದ ಮೊದಲ ಮಳೆಗಾಲದ ಆರಂಭದಲ್ಲಿಯೇ ಅದು ಕುಸಿದಿರುವುದು ಸಂಶಯಕ್ಕೆಡೆ ಮಾಡಿಕೊಟ್ಟಿದೆ. ಬ್ರೇಕ್‌ ವಾಟರ್‌ ನಿರ್ಮಾಣದ ವೇಳೆ ತಳಭಾಗದಲ್ಲಿ ಅವೈಜ್ಞಾನಿಕವಾಗಿ ಕಾಮಗಾರಿ ನಡೆಸಿರುವ ಕಾರಣ ಬ್ರೇಕ್‌ವಾಟರ್‌ ಕಲ್ಲುಗಳು ಹೊಗೆಯಲ್ಲಿ ಹುದುಗಿ ಹೋಗುತ್ತಿವೆ. ಕಿರುಜೆಟ್ಟಿಯ ಕಾಮಗಾರಿ ಕಳೆದ ಕೆಲವು ಸಮಯದಿಂದ ನಡೆಯುತ್ತಿದೆ. ಸುಮಾರು 172 ಕೋ. ರೂ. ಅಧಿಕ ವೆಚ್ಚದ ಕಿರುಜೆಟ್ಟಿಯ ಕಾಮಗಾರಿ ತೀರಾ ಕಳಪೆಯಾಗಿದೆ ಎಂದು ಸ್ಥಳೀಯರು ಆರೋಪಿಸುತ್ತಿದ್ದಾರೆ.